పూలమొక్కలు బాగా ఎదగాలంటే కుండీల ఎంపిక

Published: Wednesday, February 29, 2012, 15:42 [IST]

How to choose correct size of flower pots

ఇంటి ఆవరణంలో పూల మొక్కలు ఉంటే పూలు సువాసన నిస్తాయి. మనసును ఆహ్లాద పరుస్తాయి. ఉల్లాసంతో పొంగిపోతాం. పట్టణాలు, నగరాల్లో ఒకప్పుడు కేవలం మహిళలే పూల మొక్కలను పెంచుకునేవారు. అయితే ఇప్పుడు మహిళలు వృద్ధులు, పిల్లలు, యూత్ అనే తారతమ్యాలు లేకుండా అందరి ఇళ్లల్లో కిటికీల దగ్గర, మేడపైన విరబూసిన పూలు కనిపిస్తున్నాయి. పూలమొక్కల వల్ల ఇంటికి అందం, అలంకరణ బోలెడెంత. ఉదయం లేవగానే పూలచెట్లను చూస్తే రోజంతా ఉల్లాసమే. ఇక వర్షాకాలం మొదలయితేచాలు గులాబీ, చామంతి, బంతి, మందారం, సంపెంగ, సన్నజాజి పూల మొక్కలు ఇంటి వావరణాన్ని అలంకరించేస్తాయి. ఈ పూల మొక్కలను నాటి మొక్క దశ నుంచి పూలు పూసే వరకు ఎలా పెంచుకోవాలో, ఎలా కాపాడుకోవాలో తెలుసుకుందాం...

సాధారణంగా మొక్కలను పెంచే కుండీలు మట్టితోగాని, సిమెంట్‌ తో గానీ తయారుచేస్తారు. పూల తొట్లకు అడుగు భాగాన మురికి నీరు కారిపోవడానికి రంధ్రాలు ఉండాలి. ఇవి పూడిపోకుండా వీటి పెంకు ముక్కలను బోర్లించి వాటిపై ఇటుక ముక్కలు, కొబ్బరిపీచు వేసి వాటిపైన ఒక అంగుళం మందం గరుకు ఇసుక పోసి తొట్లను ఎరువు మట్టితో నింపాలి. ఈ మట్టి మిశ్రమంలోని పదార్థాల పాళ్ళు మొక్కలను బట్టి మారుతుంది.

ఇంటి దగ్గర పెంచే పూల తొట్టేల మన్ను తయారు చేయడంలో బాగా వ్యర్థమైన ఆకుపొట్టు, పశువుల ఎరువు, ఎర్రమట్టి, ఇసుక సమ భాగాళ్ళలో తీసుకొని, ఎరువు మట్టిని తొట్లలో నింపాలి. మొక్కల వేర్లు మడత పడకుండా నాటాలి. నాటిన వెంటనే ఎక్కువగా నీరు పోయాలి. తొట్లు చిన్నవి అయితే దాన్ని నీటితో నిండి ఉన్న పెద్ద తొట్టిలో ముంచి గాలి బుడగలు అన్ని బయటకు వచ్చే వరకు అలాగే ఉంచాలి.

నాటిన మొక్క పొడవుగా ఉంటే పక్కకు వాలిపోకుండా ఒక కట్టె పుల్లను పక్కనే నాటి దానికి సపోర్ట్ గా కట్టాలి. మొక్కను కంపౌండు భూమిలో నాటుకోవాలంటే రెండు అడుగుల పొడవు, వెడల్పు గల గుంతను తవ్వి దానిలోని మట్టికి రెండింట ఒకబాగం పశువుల ఎరువును వేసి గోతిని నింపాలి. నేల బంకమట్టిది అయితే ఒకబాగం ఇసుక కూడా కలపాలి. తరువాత నీరుపోసి మొక్కను వారం, పది రోజుల్లో నాటుకోవచ్చు.