మన ఇంటి ఆవరణలో మనోల్లాసాన్ని కలిగించే లాన్స్...!

Published: Thursday, June 7, 2012, 14:12 [IST]

పెద్ద పెద్ద పట్టణాలు, నగరాల్లో పచ్చదనాన్నిచ్చేవి పార్కులే. అయితే ఆ పచ్చదనాన్ని ఇంటి ఆవరణలోకి తెచ్చుకోవచ్చు. దాని కోసం ఎకరాలకు ఎకరాలు స్థలం అవసరం లేదు. ఇంటి ముందున్న కాసింత వాకిట్లోనో, ఇంటిపై నున్న టెర్రస్‌ లోనో పచ్చదనాన్ని పెంచుకోవచ్చు లాన్ రూపంలో. ఆహ్లాదాన్ని, ఆనందాన్ని, ఆరోగ్యాన్ని ఇచ్చేవి లాన్స్‌. అనాదిగా పచ్చిక బయళ్ల ప్రాముఖ్యం, ప్రాచుర్యం ఎంతగానో ఉంది. వాటినే ఇప్పుడు లాన్స్‌ గా పిలుస్తున్నారు. ఇవి దినదినాభివృద్ధి చెందుతున్నాయి. చాలాకాలం వరకు పార్కులకు, పెద్దపెద్ద హోటల్స్‌, బంగ్లాలకే పరిమితమైన లాన్స్‌ ఇప్పుడు సాధారణ గృహాలకు, ఫ్యాక్టరీలకు ఆఫీసుల ఆవరణలలో ఎంతగానో అభివృద్ధి చెందాయి.

కొద్దిపాటి ఖర్చుతో లాన్స్ అందంగాను, ఆరోగ్యంగాను ఉంచుకోవచ్చు. లాన్స్‌ వల్ల దుమ్ము, ధూళిని అరికట్టవచ్చు. లాన్స్‌ వల్ల వేడి, రేడియేషన్‌ తగ్గుతుంది. ఇంటి ఆవరణలో లాన్‌ వేసినట్టయితే వేడి తీవ్రత తగ్గుతుంది. ఆకుపచ్చని లాన్స్‌పై నడవటం ఆరోగ్యానికి మంచిది. లాన్స్‌ మనోల్లాసాన్ని కలిగిస్తాయి. దుమ్ము,ధూళి తగ్గుతుంది కాబట్టి కాలుష్యాన్ని అరికట్టి. ఉదరసంబధ వ్యాధులను తగ్గించవచ్చు.

లాన్‌లో రకాలు: ఇంటి ఆవరణలోని కొద్ది స్థలంలో కూడా కొన్ని రకాల లాన్ లను పెంచుకోవచ్చు అలాంటివి మీకోసం...
1. కలకత్తా దూబ్ గ్రాస్
2. కార్పేటర్ గ్రాస్
3. ఫిస్కో గ్రాస్
4. షెడ్ గ్రాస్

1. కలకత్తా దూబ్ గ్రాస్: దూబ్‌ గ్రాస్‌లో ఫిస్క్యూ, బర్ముడా, జి2 కలకత్తా దూబ్‌ అనే రకాలు ఇంచుమించు ఒకేరకంగా ఉంటాయి. ఇవి తక్కువ ఖర్చుతో కూడినవి. వీటి నిర్వహణ ఖర్చు తక్కువ. కాని వీటిని తరచుగా కత్తిరిస్తూ ఉండాలి. పెద్దపెద్ద ఆవరణలలో హోటల్స్‌, దాబా. పార్క్‌, ఫంక్షన్‌హాల్స్‌లో కనిపిస్తుంటాయి.

ఇంటి ముందర ఏ మాత్రం కొద్దిపాటి స్థలం ఉన్నా ఈ రకమైన దూబ్ గ్రాస్‌ ను పెంచుకోవచ్చు. పెంచుకొనేముందు ఎర్రమట్టిని ఆరడుగుల లోపల నుంచి నింపి, దిమ్మిసతో సమాంతరంగా ఏర్పాటు చేసుకోవాలి. ఆ తర్వాత రెండు నెలలకు పెరుగుతుంది. దీనికి ఎక్కువగా నీటి అవసరం ఉండదు. చీడ, పీడలు కూడా పట్టవు. ఇది పురాతమైన గడ్డి. దీనికి ఓ ప్రాంతమంటూ పెంచాల్సిన అవసరం లేదు. ఎక్కడబడితే అక్కడ ఈ గ్రాసం మొలుస్తుంది. త్వరగా పెరుగుతుంది. కాబట్టి దీన్ని ఎక్కువ సార్లు కట్ చేయాల్సి ఉంటుంది..

2. కార్పేటర్ గ్రాస్: కార్పెట్‌ గ్రాస్‌లో చాలా రకాలు ఉన్నాయి. ప్రస్తుతం వాడుకలో కొరియన్‌ కార్పెట్‌ గ్రాస్‌, మెక్సికన్‌ కార్పెట్‌ గ్రాస్‌, జేడ్‌ వెల్‌వెట్‌, సెంట్‌పీడ్‌ గ్రాస్‌ ఉన్నాయి. కొరియన్‌ గ్రాస్‌కు నీరు తక్కువ ఉన్నా కాస్తంత నీడ ఉన్నా పెరుగుతుంది. సాయంకాలం లేదా సూర్యోదయానికి ముందు లాన్స్‌కు నీళ్లు పెట్టాలి. ఈ గడ్డి చాలా సున్నితమైన గడ్డి. దీన్ని ఎక్కువగా ఖరీదైన భవంతుల ముందు పెంచుతారు. ఇది ఖర్చుతో కూడుకున్నది. ప్రతి రోజూ పరిశీలిస్తూ ఉండాలి. ఈ గడ్డి నీడలో ఉండాలి. ఎక్కువగా ఎండ తగిలితే అంత బాగా పెరగదు. బండలు బండలుగా పెరుగుతుంది. దీన్ని ఓ ప్రాంతం నుంచి మరో ప్రాంతానికి తీసుకెళ్లడం తేలిక.

కార్పెట్‌ గ్రాస్‌తో వేసవిలో రూప్‌గార్డెన్‌ కూడా వేయవచ్చు. రూఫ్‌ గార్డెన్‌ను నిపుణులైనవారిచేత వేయించడం మంచిది. రూఫ్‌ గార్డెన్‌ చల్లదనాన్ని ఎసి ఫీలింగును కలిగిస్తుంది. సాయంకాలం లాన్‌లో కూర్చోడానికి ఉపయోగపడుతుంది. లాన్స్‌లో ఇతర కలుపుమొక్కలను ఎప్పటికప్పుడు తీసివేయాలి. కార్పెట్‌గ్రాస్‌కు పశువుల ఎరువు వాడరాదు. దీనివల్ల కలుపు అధికంగా వచ్చే అవకాశం ఉంది. పైపొరగా కాస్తంత నల్లమట్టి వాడటం మంచిది.

3. ఫిస్కో గ్రాస్: ఈ గ్రాసాన్నీ పెద్ద పెద్ద బంగ్లాల్లోనే పెంచుతారు. దీనికి ఎర్రమట్టి నేల. అనువైనది. దీని మెయింటెనెన్స్ కూడా ఖరీదుతో కూడుకున్నది. ప్రతి పదిహేను నుంచి ఇరవై రోజులకొకసారి నీరు పోయవలసి ఉంటుంది. ఎండాకాలంలో అయితే వారానికి రెండుసార్లు నీరు ఇవ్వాల్సి వస్తుంది. చెదలు, చీమలు పట్టకుండా సెవిడానిల్ పౌడర్‌ను ఒక గ్రాము లీటరు నీటిలో కలిపి చల్లాలి. ఇది కొద్దిగా సున్నితమైన గ్రాసం. దీనిపై కూర్చుంటే మొత్తగా, పరుపులాగా ఉంటుంది. వీటి ఆకులు గట్టిగా ఉంటాయి. ఒకసారి నాటుకుంటే మూడు నుంచి నాలుగు సంవత్సరాల వరకు ఉంటుంది. ఎక్కువ కోతలు కూడా అవసరం ఉండదు.

4. షెడ్ గ్రాస్: ఇది పూర్తిగా చెట్ల నీడ కింద మాత్రమే పెరుగుతుంది. ఓ సారి నాటితే ఐదు ఆరు సంవత్సరాల వరకు ఉంటుంది. దీన్ని పెంచడానికి పెద్దగా ఖర్చుచేయాల్సిన పనిలేదు. నీరూ అంతగా అవసరం ఉండదు. ప్రత్యేక మెయింటెనెన్సూ చేయనక్కర లేదు. చీడ, పీడల బెడద కూడా తక్కువే. కంపౌండ్‌లో గల చెట్ల మధ్య ఈ గ్రాసాన్ని పెంచుకోవచ్చు. ఇది చల్లగా, హాయిగా ఉంటుంది.

సూచనలు:
1. లాన్ ఏర్పాటు చేసుకోవాలంటే.. 80శాతం ఎర్రమట్టి, 20శాతం ఇసుక నేల అయి ఉండాలి.
2. దాని ఏర్పాటుకు నల్ల మట్టి నేలలు అనుకూలం కావు.
3. కొన్ని గ్రాసాలు వేర్లతో సహా తీసుకొచ్చి నాటుకోవాలి.
4. లాన్ ఏర్పాటు చేసుకొనే ముందు నేలను బాగా కలియదున్నాలి.
5. వేప పిండి, వర్మికాంపోస్ట్ తప్పకుండా వేయాలి.
6. లాన్ ఏర్పాటు చేసుకున్న తర్వాత వీలును బట్టి పెరుగుదల కోసం, పచ్చదనం కోసం యూరియాను చల్లాలి.
7. పెరుగుదలను బట్టి కలుపు మొక్కలను తీసేయాలి.
8. గడ్డి కుళ్లిపోతున్నట్లయితే ఒక గ్రాము కార్బండిజం పౌడర్‌ను లీటర్ నీటిలో కలిపి పిచికారి చేయాలి.