పెరడులో మొక్కల స్థానం...వాటి సంరక్షణ..!

Gardening

oi-Saraswathi

By Sindhu

Published: Saturday, January 14, 2012, 15:01 [IST]

ఇంట్లో పెంచుకోవాల్సిన మొక్కలలో ముందు గా చెప్పుకోవాల్సింది తులసి. ఎంతో పవిత్ర మైన మొక్కగా భావించే తులసిని ఎక్కడ పడితే అక్కడ నాటడం సరికాదు. దీనికి ఒక ప్రత్యేక స్థానం కల్పించాలి. ఉత్తరం, ఈశాన్యం లేదా ఇంటికి తూర్పు వైపుగా ఈ మొక్కను నాటాలి. అలాగే ఇంటి గుమ్మానికి ఎదురుగా వుండేలా మొక్కలను నాటకూడదు. వీటి వల్ల కూడా కుటుంబంలో లాభ నష్టాలు సంభవించే అవకాశం వుంది. అందుకే వీటిని సరైన స్థానాల్లో వుంచాలి. పెద్ద పెద్ద చెట్లు నాటుకోవాలనుకునేవారు ఇంటికి దక్షిణం లేదా పశ్చిమం వైపుగా నాటాలి. ఈ రెండు భాగాల్లో లేదా ఏదో ఒకవైపు అయినా నాటొచ్చు. పొడువుగా ఏపుగా పెరిగే చెట్లను ఉత్తరం, ఈశాన్యం లేదా తూర్పు వైపుగా నాటడం మంచిది కాదు. దీని వల్ల కుటుంబంలో ప్రతికూల ప్రభావాలు కలిగే అవకాశం ఎక్కువగా వుంటుంది.

1. ఇంటిలోపల స్థలాన్ని బట్టి కుండీలను ఏర్పాటు చేసుకోవాలి. గాలి, వెలుతురు, ఉష్ణోగ్రతల మేరకు పెరిగే మొక్కలను ఎంపిక చేసుకోవాలి.
2. మట్టికుండీల్లో నీరు త్వరగా ఇంకిపోతుంది. ప్లాస్టిక్ కుండీలైతే అప్పుడప్పుడు నీరు పోస్తే సరిపోతుంది. రంధ్రాలు లేని కుండీల్లో నీరు నిల్వ ఉండడం వల్ల మొక్కలు కుళ్లిపోయే ప్రమాదం ఉంది.
3. మొక్కలు బాగా పెరగాలంటే గాలి బాగా ఉండే ప్రదేశంలో కుండీలు ఉంచాలి. సారవంతమైన మట్టిని వాడాలి.
4. వర్షాకాలం, చలికాలంలో మొక్కల వేళ్లలో ఎదుగుదల తక్కువగా ఉంటుంది గనుక నీటిని అధికంగా పోయరాదు. ఉష్ణోగ్రత అధికంగా ఉండే వేసవిలో మాత్రమే కుండీల్లో నీరు తరచూ పోయాలి. లేకుంటే మొక్కల్లో ఆకులు మాడిపోయే అవకాశం ఉంది.
5. మధ్యాహ్నం కన్నా సాయంత్రం వేళలో మాత్రమే కుండీల్లో నీరు పోయాలి.
6. కుండీల్లో ద్రవరూపంలో ఉండే ఎరువులను వేయాలి. వేసవిలో ఎరువుల మోతాదు పెంచడం, చలికాలంలో తగ్గించడం చేయాలి.
7. మొక్కలు త్వరితగతిన పెరగాలంటే తరచూ కుండీలను మార్చడం లేదా పై భాగంలోని మట్టిని మార్చాలి.