సుగందాలకు..అలంకరణకు పెట్టింది పేరు గులాబీలు...

Published: Friday, March 2, 2012, 16:00 [IST]

అందమైన అమ్మాయిలను అంతకంటే అందమైన పూలతో పోల్చుతుంటారు. ఆడవారికి పూలకు మధ్య ఉన్న అనుబంధం మాటల్లో చెప్పలేనిది..మరి అటువంటి అందాన్నిచ్చే పూల మొక్కలతో ఇంట్లో కొత్త అందాలను సృష్టిస్తే అద్భుతమైన లోకాన్ని తలపిస్తుంది. ఆ అందాల లోకాన్ని ఆస్వాధించాలంటే మన ఇంట్లో కూడా పూల మొక్కలుండాల్సిందే అయితే కొంతమందికి పూల మొక్కలను నాటిన దశ నుంచి ఎలా పెంచుకోవాలో..ఎలా కాపాడు కోవాలో తెలియదు. వాటి గురించి పూర్తిగా తెలుసుకొని పూలమొక్కలను పెంచుకొన్నట్లైతే ఆ ఇల్లు నందన వనం అవుతుంది. ఏదేమైతేనేమి వర్షాకాలం మొదలయితేచాలు గులాబీ, చామంతి, బంతి, మందారం, సంపెంగ, సన్నజాజి పూల మొక్క ఇంట్లో దారాళంగా పెంచుకోవచ్చు..ప్రతి ఒక్కరు ఇండ్లల్లో మొక్కలు పెంచుకుంటే మానసిక ప్రశాంతతోపాటు, ఆహ్లాదకర వాతావరణాన్ని సొంతం చేసుకోవచ్చు

గులాబి: అన్ని కాలాలలో లభించే ఈ పూపొద లేదా తీగ రోసా జాతికి చెందినది. కాండంపై పదునైన ముళ్ళను కలిగి ఉండే ఈ జాతి తిన్నని పొదలు, పైకి లేదా నేలపై పాకే మొక్కల సముదాయంగా ఉంటుంది. గులాబీలను అంటు కట్టుట లేదా కొమ్మలను నాటుట ద్వారా వృద్ధి చేస్తారు. గులాబీలను పువ్వులకోసం మొక్కలను పెంచుకొంటారు. మారుతున్న కాలానుగుణాన్ని బట్టి గులాబీలకు ఒక రోజుకు 5 గంటల సూర్యరశ్మి అవసరమవుతుంది. వికసించి ఉన్నపుడు మరియు శీతాకాలంలో మంచు కురుస్తున్నపుడు గులాబీలు నిద్రాణ దశకు చేరుకుంటాయి. గులాబీలు తోట మొక్కలుగా మరియు పూల అలంకరణలో వీటికి ఉన్న ప్రాధాన్యతతో పాటు, పరిమళ ద్రవ్యాల పరిశ్రమలో కూడా ఇవి గొప్ప విలువ కలిగి ఉన్నాయి.

గులాబీలను నేలల్లో, తొట్లలో పెంచవచ్చు. వీటికి నీడ గిట్టదుగాని, వడగాలి తగలకుండా గాలి కట్టువలు మాత్రం కావాలి. బాగా చవికిన పశువుల ఎరువుగాని, కంపోస్టుగాని వేసిన ఎర్రనేలలో ఇవి బాగా పెరుగుతాయి. నేలపై 50 సెం.మీ కొలతల గుంతలను ఒకటి, ఒకటిన్నర మీటర్ల దూరంలో తీసి మంచి ఎర్రమట్టి అయితే అదే మన్నుకు రెండింటా ఒకపాలు చేర్చి నింపాలి. ఎర్రమన్ను మంచిది కాకపోతే ఎరువు ఇసుకలను మూడు, రెండు, ఒకటి నిష్పత్తుల్లో మన్నుతో నింపాలి. గులాబీ మొక్కలను పురుగు మందులను తరచుగా పిచికారీ చేయడం మంచిదే ఐనప్పటికీ ఉపయోగకరమైన కీటకాలు నాశనం కాకుండా జాగ్రత్త వహించాలి.