కృత్రిమ జలపాతంలో మీ ఇంటికి మరింత శోభ..!!

Published: Tuesday, August 16, 2011, 10:44 [IST]

Artificial Waterfalls for Home Decor..!!

జలపాతమంటే ఇష్టంలేని ఎవరు చెప్పండి..రమణీయమైన ప్రకృతి అందాల మధ్య ఆ నీరు జాలువారే విధానం వర్ణనకే అందని వింత అనుభూతి.. అయితే ఆ అనుభూతిని మర్చిపోలేని ప్రకృతి ప్రేమికులు మాత్రం తమ ఇళ్లలో కృత్రిమ జలపాతాలను (వాటర్ ఫౌంటేన్) ఏర్పాటు చేసుకుంటున్నారు.

అంతేకాదు ఇప్పుడి ప్రక్రియ ఫ్యాషన్ గా కూడా మారిపోయింది. మార్కెట్లో దొరుకుతున్న ఈ కృత్రిమ జలపాతాలు ఇంట్లో ఎలా అమర్చుకోవాలో ఇప్పుడు చూద్దాం. విశాలమైన బాల్కనీ ఉండేవారికి కృత్రిమ ఫైబర్ జలపాతం బాగా నప్పుతుంది. అలాగే బాల్కనీ చిన్నదిగా ఉండేవారికి వాల్ ఫౌంటేయిన్ సరిపోతుంది. ఇవి ఏ గదులకైనా అనువుగానే ఉంటాయి. బాల్కనీల సైజును బట్టి కనీసం నాలుగు అడుగుల ఫౌంటెయిన్ లు అమర్చుకోవచ్చు.

కొంత మంది ఇంటి ప్రవేశ ద్వారం వద్ద కృత్రిమ జలపాతాలను ఏర్పాటు చేసుకునేందుకు ఇష్టపడుతుంటారు. ఇంటికి వచ్చే అతిథులకు స్వాగతం పలికేలా వీటిని ఏర్పాటు చేస్తుంటారు. అయితే ఇలాంటివి ఎక్కువగా నేడు విగ్రహాల రూపంలోనే మార్కెట్లో లభిస్తున్నాయి. అయితే ఇవి ఎక్కువగా దృశ్యప్రధానంగా ఉంటేనే చూసేందుకు ఆకర్షణీయంగా ఉంటాయి.

లివింగ్ రూమ్ పరిమాణాన్ని బట్టి కొంత మంది కృత్రిమ జలపాతాలను ఏర్పాటు చేస్తుంటారు. ఇలాంటి వాటికి పువ్వులు, మొక్కలు ఉన్నవయితే బాగుంటాయి. పడక గదిలో అయితే ఉత్సాహం, మానసిక ప్రశాంతతను కలిగించేలా సూర్యోదయం, చంద్రోదయం లాంటి దృశ్యప్రధాన కృత్రిమ జలపాతాలు బాగా నప్పుతాయి.

పిల్లలు చదువుకునే గదిలో టేబుల్ టాప్ లైటింగ్, షేకింగ్ లైటింగ్ టేబుల్ టాప్ రకాలలో లభ్యమయ్యే కృత్రిమ జలపాతాలు సరిపోతాయి. వీటిలో ప్రకృతిని ప్రతిబింబించేలా ఉండేవి కూగా లబిస్తాయి. చదువుమీద ధ్యాస పట్టేందుకు, పిల్లల మనస్సు నిర్మలంగా ఉండేందుకు ఇవి బాగా సహకరిస్తాయి.

ఇక అతిథులకు చల్లగా స్వాతగం పలికేందుకు గెస్ట్ రూమ్ లలో దృశ్య ప్రధాన కృత్రిమ జలపాతాలను పెడితే చాలా బాగుంటాయి. గదిలో ప్రశాంత వాతావరణాన్ని ప్రతిబింబించేలా ఉండే కృత్రిమ జలపాతాలు అతిథులను చక్కగా ఆకట్టకుంటాయి.