కొత్త సంవత్సరాన్ని సెలబ్రేట్ చేసుకోవడానికి మన తెలుగు రాష్ట్రాల్లోని బెస్ట్ ప్లేసెస్ ఇవే

1. లంబసింగి - విశాఖపట్నం

జిల్లాల పునర్విభజన తర్వాత లంబసింగి అల్లూరి సీతారామరాజు జిల్లా కిందకు వచ్చింది. లంబసింగి తుని రైల్వే స్టేషన్ నుండి 75 కిలోమీటర్ల దూరంలో ఉంటుంది. లంబసింగిని కశ్మీర్ ఆఫ్ సౌత్ అని అంటారు. ఇక్కడి దృశ్యాలు ఎంతో మధురమైన అనుభూతిని కలిగిస్తాయి.

దట్టమైన పొగమంచు చూస్తుంటే మేఘాల్లో తేలుతున్నట్లుగా అనిపిస్తుంది. ఇక్కడ ట్రెక్కింగ్, క్లైంబింగ్ కూడా ఉంటుంది. ఫ్రెండ్స్‌తో వెళ్తే ఫుల్ ఎంజాయ్ చేయవచ్చు.

లంబసింగికి 10 కిలోమీటర్ల దూరంలో ఉన్న తాజంగి ప్రాంతం కూడా చాలా అందంగా ఉంటుంది. పచ్చదనం, పొగమంచుతో కప్పబడి ఉంటుంది. దారి వెంట రోడ్డు పక్కన వేడి వేడి, మెత్తని, మల్లెపూల లాంటి ఇడ్లీలు ఉంటాయి. చల్లని వాతావరణంలో వేడి వేడి ఇడ్లీలు తింటే ఆ అనుభూతి వేరే లెవల్ అంతే.

ఇక్కడికి వెళ్లే వారికి ఒకటే సూచన. ఫోటోలు, సెల్ఫీలతో సమయాన్ని వృథా చేయకుండా ప్రకృతి రమణీయతను ఆస్వాదించండి.

2. పాకాల సరస్సు - వరంగల్

పాకాల లేక్ అడవులు, కొండల మధ్య ఎంతో మనోహరమైన ప్రదేశం. ఈ సరస్సు ఒడ్డున 839 కిలోమీటర్ల విస్తీర్ణంలో ఉన్న పాకాల అభయారణ్యం ఉంటుంది. ఇందులో అనేక జాతులకు చెందిన జంతువులు, సరీసృపాలు ఉంటాయి. క్షీరదాలు, చిరుతలు సహా అనేక జంతువులు ఉంటాయి.

ఈ ప్రాంతం చాలా కాలం నుండి ప్రకృతి ఆరాధకులను, పర్యాటక ప్రియులను ఆకర్షిస్తోంది. కాలుష్య రహిత సరస్సుల్లో భారతదేశంలో పాకాలా సరస్సు రెండో స్థానంలో ఉంది. ప్రపంచంలోనే ఎనిమిదో స్థానంలో ఉంది.

ఇక్కడ పాకాల గుట్ట చూడొచ్చు. ట్రెక్కింగ్ చేస్తూ గుట్టపైకి చేరుకోవడం మంచి అనుభూతిని ఇస్తుంది. ఈ మార్గంలో సరస్సు అందాలను ఆస్వాదించడానికి వ్యూ పాయింట్లు ఉంటాయి. ఈ సరస్సులో బోటింగ్ చేయవచ్చు. బోటులో సరస్సు మధ్యలో ఉన్న దీవికి వెళ్లొచ్చు. సరస్సుకు అవతలి వైపు చిలకలగుట్టపై కాకతీయ రాజుల కాలంలో నిర్మించిన విడిది మందిరాన్ని తిలకించవచ్చు.

3. గండికోట - కడప

ప్రకృతి సోయగాల కోట - గండికోట. గండికోటకు పర్యాటకుల సంఖ్య రోజురోజుకూ పెరుగుతోంది. అలనాటి కోటలు, చారిత్రక వైభవం పర్యాటకులను కట్టిపడేస్తుంది. శత్రు దుర్భేధ్యమైన కోటకు మూడు వైపుల పెన్నానది ఉంటుంది. ఎత్తైన కొండలు మధ్యలో పారే నది చూడముచ్చటగా ఉంటుంది.

కొండలపై నుండి నీళ్లు జారువారుతుంటే ఆ దృశ్యం కన్నులవిందుగా ఉంటుంది. గండి కోట అందాలు తప్పకుండా ఆకట్టుకుంటాయి.

4. పోచారం అభయారణ్యం - మెదక్

మెదక్‌కు 15 కిలోమీటర్ల దూరంలో, హైదరాబాద్ నుండి 115 కిలోమీటర్ల దూరంలో ఉంటుంది పోచారం అభయారణ్యం. ఒకప్పుడు దీనిని నిజాం రాజులు వేట మైదానంగా ఉపయోగించేవారు. తర్వాతి కాలంలో దీనిని వన్య ప్రాణుల సంరక్షణ కేంద్రంగా మార్చారు.

ఈ అభయారణ్యంలో అపారమైన వృక్ష, జంతు సంపద ఉన్నాయి. అడవి కుక్కలు, తోడేళ్లు, చిరుతలు, పిల్లులు, జింకలు, లేళ్లు, ఎలుగుబంట్లు ఉంటాయి. నవంబర్ నుండి జనవరి వరకు పోచారం అభయారణ్యం సందర్శన ఎంతో మనోహరంగా ఉంటుంది.

5. పాపికొండలు - భద్రాచలం

ప్రశాంతమైన, సుందరమైన, రమణీయమైన, ఆహ్లాదకరమైన ప్రదేశం పాపికొండలు. ఇక్కడ కొండలు, కొండల మధ్య నుండి పారే గోదావరి, పక్కన ఇసుక తిన్నెలు, వెన్నెల వెలుగులో ఈ ఇసుక తిన్నెల్లో చలి మంటలు వేసుకుని గడిపితే ఆహా.. ఆలోచించుకుంటేనే ఎంత మనోహరంగా ఉందో కదా. ఇంకా అనుభవిస్తే ఎలా ఉంటుందో ఆలోచించండి.

భద్రాచలం నుండి, రాజమండ్రి నుండి ఈ ప్రాంతానికి చేరుకోవచ్చు. రెండు తెలుగు రాష్ట్రాల ప్రభుత్వాలు టూరిజం బోట్లు నడుపుతున్నాయి.

ఇక్కడ టూరిజం ప్యాకేజీలు అందుబాటులో ఉంటాయి. ఒక రోజు, ఒక రాత్రి ఇక్కడ ఉండేలా ప్యాకేజీ ఎంచుకోవచ్చు. మనకంటూ ప్రత్యేకంగా గుడారం ఇస్తారు. ఆహారం, నీళ్లు అన్నీ వాళ్లే సప్లై చేస్తుంటారు.