Lovlina Borgohain:అంచనాలకు మించి రాణించింది.. భారత్ ఖాతాలో మరో పతకాన్ని ‘లవ్లీగా’ జత చేసింది...

లవ్లీనా ఎవరు?

అస్సాం రాష్ట్రంలోని గోలాఘాట్ జిల్లాకు చెందిన టికెన్ మరియు మామోని బోర్గోహైన్ దంపతులకు లవ్లీనా జన్మించారు. ఆమె తండ్రి ఒక చిన్న వ్యాపారవేత్త. తన కుమార్తె కలను నిజం చేయడానికి అనేక అవమానాలను ఎదుర్కొన్నాడు. సమాజం నుండి ఎన్నో ఛీత్కారాలను సహించాడు. ముఖ్యంగా ఆర్థిక పరంగా ఎన్ని అవరోధాలు వచ్చినా.. పట్టుదలతో తన కూతురుని ఒలింపిక్స్ వరకు వెళ్లేలా చేయడంలో మాత్రం విజయవంతమయ్యాడు.

కిక్ బాక్సింగ్..

లవ్లీనాతో పాటు మరో ఇద్దరు సోదరీమణులు కిక్ బాక్సింగ్ ప్రారంభించారు. తన సోదరీమణులు కూడా కిక్ బాక్సింగులో జాతీయ ఛాంపియన్లుగా నిలిచారు. ఒకరోజు వారి తండ్రి మార్కెట్ నుండి తిరిగి ఇంటికి వస్తున్నప్పుడు.. వార్తాపత్రికలో కొన్ని వస్తువులను తీసుకువచ్చినప్పుడు.. అందులో గొప్ప బాక్సర్ మహ్మద్ ఆలీ చిత్రాన్ని చూసిన లవ్లీనా తన గురించి తెలుసుకోవడం ప్రారంభించింది. ఆ క్షణం నుండి బాక్సింగుతో ఆమె ఆసక్తికరమైన ప్రయాణం ప్రారంభమైంది.

2012లో కెరీర్ ప్రారంభం..

లవ్లీనా 2012 సంవత్సరంలో స్పోర్ట్స్ అథారిటీ ఆఫ్ ఇండియా ట్రయల్స్ స్కూల్ నుండి తన కెరీర్ లాంఛనంగా ప్రారంభమైంది. తనను కోచ్ పాడమ్ బోర్ గుర్తించారు. ఆమెకు ఐదు సంవత్సరల పాటు కఠినమైన శిక్షణ ఇచ్చారు. తను కూడా కఠోర శ్రమ చేసింది. ఐదు సంవత్సరాలలో తను ఛాంపియన్ షిప్ లో కాంస్య పతకానికి చేరుకుంది.

భాగస్వామి బాక్సర్లు లేరు..

భారతదేశంలో లవ్లీనా బాక్సర్ గా కెరీర్ ప్రారంభించిన సమయంలో తన తోటి భాగస్వాములు, తన లాంటి ఆటగాళ్లు అందుబాటులో లేరు. దీంతో తను శిక్షణ సమయంలో చాలా సమస్యలను ఎదుర్కొంది. కాబట్టి తను ప్రాక్టీస్ చేయడానికి పార్ట్నర్స్ కూడా లేరు. దీంతో తను ఇతర కేటగీరీలకు చెందిన బాక్సర్లతో శిక్షణ పొందాల్సి వచ్చింది.

ఒలింపిక్స్ కు ముందు..

టోక్యో ఒలింపిక్స్ లో పాల్గొనడానికి ముందు లవ్లీనాకు చాలా కష్టాలు ఎదురయ్యాయి. ఆ సమయంలో తన తల్లి కిడ్నీ మార్పిడి శస్త్రచికిత్స కారణంగా తను కొంత కాలం రింగ్ కు దూరంగా ఉండాల్సి వచ్చింది. అయితే ఆమెకు నయం అయిన తర్వాత, తను శిక్షణ నిమిత్తం బరిలోకి దిగింది. ముందుగా తనను తాను శారీరకంగా, మానసికంగా ఎంతో మెరుగుపరచుకుంది. ఆమె కఠోర శ్రమ వల్లే భారతదేశానికి లవ్లీనా రూపంలో మరో పతాకం వచ్చింది. ఈమె సెమీస్ లో ఓడిపోయినప్పటికీ.. భారతదేశం గర్వించదగ్గ ప్రదర్శన చేసింది. అందరి చేత శభాష్ అనిపించుకుంది...