World Radio Day 2022:వరల్డ్ రేడియో డే ఎప్పుడు.. ఎందుకు జరుపుకుంటారంటే...

అతి తక్కువ కాలంలోనే...

తర్వాత ప్రతిరోజూ ఉదయం, మధ్యాహ్నం, సాయంత్రం, రాత్రి వేళల్లో అనేక రకాల భాషల్లో వార్తలను ప్రసారం చేస్తూ.. పాటలు, జానపద గీతాలు, శాస్త్రీయ-లలిత సంగీతం, వ్యవసాయానికి సంబంధించిన కార్యక్రమాలు, క్విజ్, కథానిక, సినిమాలకు సంబంధించిన ఆడియోలన్నింటినీ ప్రసారం చేసిన రేడియో అందరికీ అతి తక్కువ కాలంలోనే చేరువైపోయింది. కొన్నేళ్ల క్రితం చిన్నపిల్లల నుండి పెద్దలు, పండు ముసలివాళ్ల వరకు అందరూ రేడియోకు బాగా కనెక్ట్ అయ్యారు.

రేడియోను తొలిసారిగా..

అందరినీ ఎంతగానో ఆకట్టుకున్న రేడియోను ఆంగ్లేయులు భారతదేశంలోని మహారాష్ట్రలోని ముంబైలో తొలిసారిగా ప్రారంభించారు. అందరి కంటే ముందు 1886 సంవత్సరంలో హెన్రిచ్ హెర్ట్జ్ అనే శాస్త్రవేత్త రేడియో తరంగాలను కనుగొన్నారు. ఆ తర్వాత మార్కోనీ రేడియోను కనిపెట్టారు. అనంతరం 2012 సంవత్సరంలో ఐక్య రాజ్య సమితి జనరల్ అసెంబ్లీ తీర్మానం చేయడం వల్ల రేడియో డేను ప్రపంచ వ్యాప్తంగా యునెస్కో(UNESCO) సభ్యత్వమున్న అన్ని దేశాల్లో ‘వరల్డ్ రేడియో డే'ను అధికారికంగా నిర్వహిస్తున్నారు.

భిన్నమైన కార్యక్రమాలు..

వరల్డ్ రేడియో డే సందర్భంగా ప్రతి ఏటా సెమినార్లు, చర్చలు, రేడియో చరిత్ర, వైభవం, ప్రస్థానం వంటి ప్రత్యేకమైన కార్యక్రమాలను నిర్వహిస్తుంటారు. Seeking Modern Applications for Real Transformation(SMART) భాగస్వామ్యంతో మన దేశంలో రేడియో డేను నిర్వహిస్తున్నారు. ఇందుకు ఆలిండియా రేడియో సహకారం కూడా అందిస్తోంది. గత ఏడాది గణాంకాల ప్రకారం, దేశవ్యాప్తంగా 215 రేడియో స్టేషన్లు ఉన్నాయి. ప్రతి ఏటా రేడియో డే సందర్భంగా ఫిబ్రవరి 13, 14వ తేదీల్లో అంటే రెండురోజుల పాటు ‘న్యూ వరల్డ్, న్యూ రేడియో' థీమ్ తో భారీగా కార్యక్రమాలు నిర్వహిస్తుంటారు.

మంచి పాపులారిటీ..

ఒకప్పుడు ఓ ఊపు ఊపిన రేడియో ఇప్పుడు ఇంటర్నెట్, ఇతర టెక్నాలజీ కారణంగా మూలన పడుతూ వచ్చింది. అయితే ఇప్పటికీ దీన్ని చిన్న చిన్న పల్లెటూళ్లలో ఆస్వాదించడాన్ని మనం చూస్తు ఉంటాం. రేడియో ప్రస్తుతం ఎదుర్కొంటున్న సమస్యలపై అంతర్జాతీయంగా చర్చ జరుగుతోంది. మరోవైపు ప్రధానమంత్రి నరేంద్ర మోడీ నిర్వహిస్తున్న ‘మన్ కీ బాత్' కారణంగా ఆలిండియా రేడియోకు మంచి పాపులారిటీ వచ్చింది. అంతేకాదు సోషల్ మీడియా ద్వారా కూడా రేడియోకు ప్రాధాన్యత పెరుగుతోంది.

ప్రత్యేక థీమ్ లతో..

ప్రతి సంవత్సరం వరల్డ్ రేడియో డేని ప్రత్యేక థీమ్ లతో నిర్వహిస్తుంటారు. గత ఏడాది కూడా మూడు ప్రత్యేక థీమ్ ‘ఎవల్యూషన్, ఇన్నోవేషన్, కనెక్షన్ పేరుతో వీటిని నిర్వహించారు. దీని వెనుక ఉన్న ఆంతర్యం అత్యధిక ప్రజలు రేడియోను మరింత ఎక్కువగా ఉపయోగించేలా చేయడమే. ఇప్పటికీ అత్యంత ఎక్కువ మందికి సమాచారాన్ని చేసే అత్యంత ఉత్తమమైన సాధనం రేడియోనే అని యునెస్కో తేల్చింది. ఎందుకంటే ప్రపంచవ్యాప్తంగా ప్రతి నలుమూలల దీనికి రీచ్ ఉన్నది. దీన్ని ఎప్పుడైనా.. ఎక్కడైనా సులభంగా వినొచ్చు. దీన్ని మన వెంట తీసుకెల్లొచ్చు. అంతేకాదు ఇది స్మార్ట్ ఫోన్ తో పాటు చిన్న ఫోన్లలో కూడా అందుబాటులో ఉంటుంది. ఎఫ్ఎం వచ్చాక రేడియోకు మళ్లీ పూర్వ వైభవం వచ్చింది.