పెళ్లి పీటలెక్కబోతున్న కుమారుడికి ఆ విషయంలో ట్రైనింగ్ ఇచ్చిన తల్లి...

కళ్యాణం గురించి కంగారు..

కళ్యాణం అంటేనే చాలా మంది అబ్బాయిలు, అమ్మాయిల్లో ఏదో తెలియని కంగారు మొదలవుతుంది. తాము అడుగుపెట్టే అత్తారింట్లో ఎలాంటి పద్ధతులు, ఆచారాలు, కట్టుబాట్లు ఉంటాయో.. వాటికి తాము సర్దుకుంటామో లేదో అని భయపడుతుంటారు..

ప్రతి ఒక్కరూ ఉచిత సలహాలు..

అయితే ఇదంతా ఒకప్పటి మాట.. ప్రస్తుతం ఆడపిల్లలే కాదు.. మగవారు కూడా అన్నీ నేర్చుకోవాలంటూ ప్రతి ఒక్కరూ ఉచిత సలహాలు ఇచ్చేస్తుంటారు.

తన కుమారుడికి..

ఇదే పరిస్థితి తన కుమారుడికి రాకూడదని.. మగవారికి కూడా ఈ విషయాలపై కచ్చితంగా అవగాహన ఉండాలని భావించింది ఆ తల్లి. త్వరలో పెళ్లి పీటలెక్కి.. మూడు ముళ్లు వేసి.. ఏడడుగులు నడిచి కొత్త కాపురం పెట్టే తన కొడుకు ఎలాంటి ఇబ్బందులు పడకూడదని భావించింది.

వంట చేయడం వచ్చినా..

ఇప్పటితరం కుర్రాళ్లలో చాలా మంది మగవారికి వంట చేయడం వచ్చినప్పటికీ.. పప్పుల విషయంలో చాలా కన్ఫ్యూజ్ అవుతూ ఉంటారు. ఇక వంటగది వైపు చూడని వారికి అది మరింత కష్టమనే చెప్పాలి. అందుకే ఆ తల్లి తన కుమారుడికి అర్థమయ్యేలా నేర్పించేందుకు వినూత్నంగా ప్రయత్నించింది.

ఓ పేపరు మీద..

ఆ తల్లి ఓ పేపరు మీద పప్పుదినుసుల పేర్లు రాసి.. ఆ పప్పులను ఓ కవర్ లో ఏర్పాటు చేసి వాటిని ఆ పేపరుకి అంటించి మరీ తన కొడుక్కి ఇచ్చింది. కాగా.. ఆ పేపర్ ని ఫోటో తీసి.. ఓ ఐపీఎస్ అధికారి సోషల్ మీడియాలో షేర్ చేశాడు.

వైరల్ గా మారిపోయింది..

దీంతో అది కాస్త వైరల్ గా మారిపోయింది. ఆ తల్లి చేసిన ప్రయత్నాన్ని నెటిజన్లు విపరీతంగా మెచ్చుకుంటున్నారు. పెళ్లికి ముందు ఇలాంటి శిక్షణ ఆడవారికే కాదు.. మగాళ్లకు కూడా కచ్చితంగా అవసరమే అని కామెంట్లు చేస్తున్నారు. ప్రతి ఒక్క తల్లి ఈ విషయంలో తమ పిల్లలకు శిక్షణ ఇవ్వాల్సిన అవసరం ఎంతైనా ఉందని కామెంట్లు చేస్తున్నారు నెటిజన్లు.