Neeraj Chopra:‘నీరజ్ నీకిదే మా సలామ్.. వందేళ్ల కలను సాకారం చేశావు’

పసిడి ప్రయత్నం సక్సెస్..

టోక్యో ఒలింపిక్స్ లో యువ అథ్లెట్ నీరజ్ చోప్రా కొత్త చరితకు నాంది పలికాడు. దాదాపు వందేళ్లుగా భారత ప్రజలు కంటున్న కలని నిజం చేశాడు. తొలిసారిగా ఒలింపిక్స్ లో పాల్గొన్న నీరజ్ చోప్రా.. జావిలెన్ త్రో విభాగంలో ఫైనల్ లో అద్భుతమైన ప్రదర్శన చేసి స్వర్ణ పతకాన్ని సాధించాడు.

నేరుగా ఫైనల్ కు..

జావెలిన్ త్రో క్వాలిఫికేషన్ రౌండ్లో 86.5 మీటర్ల దూరం విసిరి నేరుగా ఫైనల్ కు అర్హత సాధించాడు. ఇక శనివారం రోజున జరిగిన ఫైనల్ లో కూడా ఏ దేశానికి చెందిన క్రీడాకారుడు నీరజ్ దరిదాపుల్లోకి రాలేకపోయారు. తొలి ప్రయత్నంలోనే 87.03 మీటర్లు విసిరిన నీరజ్ చోప్రా.. ఆ తర్వాత రెండో ప్రయత్నంలో ఏకంగా 87.58 మీటర్ల దూరం విసిరాడు. ఇక మూడో ప్రయత్నంలో 76.93 మీటర్ల దూరం విసిరాడు. నాలుగో ప్రయత్నంలో 80 మీటర్ల దూరం వరకు విసిరాడు.

బింద్రా తర్వాత..

తను రెండో రౌండ్ లో సాధించిన 87.58 మీటర్లు ఈ ఒలింపిక్స్ లోనే కొత్త రికార్డు కావడంతో పసిడి పతకం తననే వరించింది. 2008 సంవత్సరంలో బీజింగ్ ఒలింపిక్స్ లో అభినవ్ బింద్రా తర్వాత, వ్యక్తిగత విభాగంలో భారత్ కు ఇదే తొలి స్వర్ణం కావడం విశేషం. అంతేకాదు అథ్లెటిక్స్ విభాగంలో ఇది మన దేశానికి తొలి స్వర్ణం కావడం మరో విశేషం. ఈ సందర్భంగా పలువురు సెలబ్రీటీలు నీరజ్ కు అభినందనలు తెలుపుతున్నారు.

నీరజ్ ఎవరంటే..

ఇంతకీ నీరజ్ చోప్రా ఎవరు? ఏ ప్రాంతానికి చెందిన వాడో చెప్పలేదు కదా.. అక్కడికే వస్తున్నా..నీరజ్ చోప్రాది హర్యానాలోని పానిపట్ సమీపంలోని ఖాంద్రా గ్రామానికి చెందిన ఓ రైతు కుటుంబం. 2018 సంవత్సరంలో జరిగిన ఆసియా క్రీడల్లో జావెలిన్ త్రో 88.06 మీటర్లు విసిరి గోల్డ్ మెడల్ సాధించిన ఈ కుర్రాడు ఒక్కసారిగా వెలుగులోకొచ్చాడు.

నీరజ్ ఎవరంటే..

ఇంతకీ నీరజ్ చోప్రా ఎవరు? ఏ ప్రాంతానికి చెందిన వాడో చెప్పలేదు కదా.. అక్కడికే వస్తున్నా..నీరజ్ చోప్రాది హర్యానాలోని పానిపట్ సమీపంలోని ఖాంద్రా గ్రామానికి చెందిన ఓ రైతు కుటుంబం. 2018 సంవత్సరంలో జరిగిన ఆసియా క్రీడల్లో జావెలిన్ త్రో 88.06 మీటర్లు విసిరి గోల్డ్ మెడల్ సాధించిన ఈ కుర్రాడు ఒక్కసారిగా వెలుగులోకొచ్చాడు.

కొద్ది రోజులు దూరం..

అయితే ఆ తర్వాత తన మోచేతికి గాయం కావడంతో కొన్ని నెలల పాటు ఆటకు దూరమయ్యాడు. అయితే పునరాగమనంలో అద్భుతంగా సత్తా చాటాడు. ఇంటర్నేషనల్ గేమ్స్ లో మువ్వన్నెల జెండాను రెపరెపలాడించాడు. నీరజ్ చోప్రా జావెలిన్ త్రో టెక్నిక్స్ ని యూట్యూబ్ లో చూసి నేర్చుకోవడం విశేషం.