ఒకసారి వాడాక నల్లగా మారిన నూనెను ఎలా క్లీన్ చేయాలో తెలుసా? రెస్టారెంట్లలో చెఫ్ ల సీక్రెట్ ట్రిక్ ఇదే!

ఇంట్లో డీప్ ఫ్రై వంటకాలు చేసిన ప్రతిసారీ వంట నూనె రంగు నల్లగా మారిపోవడం గమనిస్తుంటాం. కమ్మని వంటకాలు చేసి ప్లేట్లలో సర్వ్ చేసిన తర్వాత, కడాయిలో మిగిలిపోయిన నూనెను చూస్తే అందులో నల్లటి ఆహారపు రేణువులు, పిండి ముక్కలు పేరుకుపోయి మురికిగా కనిపిస్తుంది. ఇలాంటి పరిస్థితుల్లో నూనెను పారబోయాలంటే మనసొప్పదు, అలాగని మళ్లీ వాడాలంటే ఆ నల్లటి నూనెను చూసి ఇబ్బందిగా అనిపిస్తుంది.

కొందరు వృధా ఎందుకని అదే నూనెను మళ్లీ మళ్లీ డీప్ ఫ్రైకి వాడుతుంటారు, మరికొందరు చేసేది లేక పారబోస్తుంటారు. అయితే ఒక చిన్న సింపుల్ చిట్కాతో ఈ నల్లబడిన నూనెను నిమిషాల్లో మునుపటిలా శుభ్రంగా మార్చేయవచ్చన్న విషయం మీకు తెలుసా?

వేయించిన తర్వాత నూనె ఎందుకు నల్లగా మారుతుంది?
వేడి వేడి నూనెలో మనం ఏదైనా పిండి వంటలు వేయించినప్పుడు, ఆ వంటకాలకు సంబంధించిన చిన్న చిన్న పిండి కణాలు లేదా ముక్కలు నూనెలోనే విడిపోయి అడుగున మిగిలిపోతాయి. మనం వంటకాలు చేస్తున్నంత సేపు నూనె మరుగుతూనే ఉంటుంది కాబట్టి ఆ చిన్న కణాలు విపరీతమైన వేడికి మాడిపోయి విచ్ఛిన్నం కావడం మొదలవుతాయి.

ఈ మాడిపోయిన కణాల వల్లే నూనె తన సహజమైన లేత పసుపు రంగును కోల్పోయి, ముదురు రంగులోకి లేదా నల్లగా మారుతుంది. అందుకే ఒకసారి వాడిన తర్వాత నూనె మునుపటిలా పారదర్శకంగా, శుభ్రంగా కనిపించదు. నిజానికి నూనె పాడవకపోయినా, అందులో ఉన్న ఈ మాడిన కార్బన్ రేణువుల వల్లే అది మురికిగా కనిపిస్తుంది. ఈ మలినాలను సులభంగా తొలగించి, నూనెను మళ్లీ వాడుకోవచ్చు.

బ్రెడ్ చిట్కాతో క్లీన్ చేయండిలా
పెద్ద పెద్ద రెస్టారెంట్లలో ప్రముఖ చెఫ్‌ లు తరచుగా ఉపయోగించే ఒక రహస్యమైన, అత్యంత సులభమైన చిట్కా ఒకటి ఉంది. అదే బ్రెడ్ వాడటం. ఇంట్లో మిగిలిపోయిన ఒక చిన్న బ్రెడ్ ముక్కతో నల్లటి నూనెను అద్భుతంగా శుభ్రం చేయవచ్చు. దీనికోసం మీరు చేయాల్సిందల్లా.. వాడిన నూనెను స్టవ్ మీద పెట్టి గోరువెచ్చగా వేడి చేయండి. మరీ ఎక్కువగా మరిగించకూడదు.

ఇప్పుడు అందులో ఒక చిన్న బ్రెడ్ స్లైస్ లేదా బ్రెడ్ ముక్కను వేయండి. బ్రెడ్ కు ఉండే స్పాంజ్ లాంటి ప్రత్యేక గుణం వల్ల, అది నూనెలో కరిగి ఉన్న చిన్న చిన్న నల్లటి రేణువులను, మలినాలను అయస్కాంతంలా పీల్చుకుంటుంది. రెండు మూడు నిమిషాల తర్వాత నల్లబడిన ఆ బ్రెడ్ ముక్కను గరిటెతో బయటకు తీసేయండి. ఇప్పుడు నూనె మునుపటి కంటే చాలా శుభ్రంగా మారడం మీరు గమనిస్తారు. ఆ తర్వాత నూనెను పూర్తిగా చల్లారనివ్వాలి.

చల్లారిన తర్వాత సన్నని రంధ్రాలు ఉండే టీ జల్లెడ, లేదా రెండు మడతలు వేసిన మెత్తని కాటన్ వస్త్రం, లేదంటే కాఫీ ఫిల్టర్ లాంటివి ఉపయోగించి గాలి చొరబడని ఒక గాజు సీసాలోకి జాగ్రత్తగా వడకట్టండి. ఇలా చేయడం వల్ల నూనెలో మిగిలిన అతి సూక్ష్మమైన రేణువులు కూడా తొలగిపోయి, నూనె మళ్లీ స్వచ్ఛంగా మారుతుంది. ఈ నూనెను కూరల్లో పోపు వేసుకోవడానికి వాడుకోవచ్చు.

ఈ నూనెను పదేపదే వాడటం ఆరోగ్యానికి మంచిదేనా?
నూనెను ఫిల్టర్ చేసుకోవడం బాగానే ఉన్నా, ఒకే నూనెను పదేపదే అధిక ఉష్ణోగ్రతల వద్ద మరిగించి వాడటం ఆరోగ్యానికి ఏమాత్రం శ్రేయస్కరం కాదని ఆరోగ్య నిపుణులు తీవ్రంగా హెచ్చరిస్తున్నారు. నూనెను పదేపదే వేడి చేయడం వల్ల అందులో ఫ్రీ రాడికల్స్, ట్రాన్స్ ఫ్యాట్స్ వంటి ఆరోగ్యానికి హాని కలిగించే ప్రమాదకరమైన సమ్మేళనాలు ఉత్పత్తి అవుతాయి. ఇవి క్యాన్సర్, గుండె జబ్బులు, కొలెస్ట్రాల్ పెరగడం వంటి తీవ్రమైన వ్యాధులకు దారి తీయవచ్చు.

మీరు వాడుతున్న నూనె నుండి ఘాటైన లేదా చెడు వాసన వస్తున్నా, స్టవ్ మీద పెట్టగానే విపరీతంగా పొగ వస్తున్నా, లేదా రంగు బాగా ముదురుగా, జిగటగా మారినా.. ఆ నూనెను ఎట్టి పరిస్థితుల్లోనూ మళ్లీ వాడకూడదు. బ్రెడ్ తో తుడవడం వంటి చిట్కాలతో నూనె పైకి శుభ్రంగా కనిపించినా, దానిలో జరిగిన రసాయన మార్పులను మనం ఆపలేం