బంగారం, వెండి ధరలు తగ్గాయని సంబరపడకండి.. ముందుంది ముసళ్ల పండగ..హెచ్చరిస్తున్న ఆర్థిక నిపుణులు..

బంగారం, వెండి ధరలు నేడు కుప్పకూలాయి. ఈ మధ్య కాలంలో నింగిని తాకిన ధరలు ఇప్పుడు ఒక్కసారిగా నేల చూపులు చూడటం పెట్టుబడిదారులను ఆశ్చర్యానికి గురి చేస్తోంది. గత నెలలో భారీగా ఎగసిన ధరలు ఇప్పుడు పతనం కావడంతో పెట్టుబడిదారులు అలర్ట్ కావాల్సిన పరిస్థితులు కనిపిస్తున్నాయి. అంతర్జాతీయంగా పరిస్థితులు ఇంకా ఉద్రిక్తకరంగానే ఉన్నా బంగారం ధరలు తగ్గడంతో ఇన్వెస్టర్లు అయోమయంలో పడ్డారు.

ప్రపంచ వాణిజ్య కార్యకలాపాలు మందగించిన సమయంలో ఇలాంటి పతనం చోటుచేసుకోవడం వల్ల ధరల్లో పదునైన హెచ్చుతగ్గులు ఏర్పడి, మార్కెట్ అనిశ్చితి మరింత పెరిగింది. ఫిబ్రవరి 17న ఈ కథనం రాసే సమయానికి Gold ధర రూ.2,561 లేదా 1.65 శాతం తగ్గి రూ.1,52,199 వద్ద ట్రేడవుతోంది. వెండి ధర మరింతగా క్షీణించి రూ.6,241 లేదా 2.6 శాతం తగ్గి రూ.2,33,650కు చేరింది. ఈ తగ్గుదలకు ప్రధాన కారణం ప్రపంచ మార్కెట్లలో బులియన్ ట్రేడింగ్ సన్నగిల్లడమేనని చెప్పవచ్చు.

చైనా చంద్ర నూతన సంవత్సర వేడుకల కారణంగా ఫిబ్రవరి 15 నుంచి 23 వరకు అక్కడి మార్కెట్లు మూసివేయనున్నారు.ఇక అమెరికాలో అధ్యక్షుల దినోత్సవ సెలవుదినం కారణంగా ట్రేడింగ్ జరగలేదు. ప్రపంచంలోని రెండు అతిపెద్ద వాణిజ్య కేంద్రాలు నిష్క్రియంగా ఉండటంతో ద్రవ్యత తగ్గి, ధరలు మరింత అస్థిరంగా మారాయి. తక్కువ వాల్యూమ్ ట్రేడింగ్ ఉన్నప్పుడు సాధారణంగా ధరల్లో ఆకస్మిక కదలికలు కనిపిస్తాయి. ఈసారి కూడా అదే జరిగింది.

సెలవులతో పాటు పెట్టుబడిదారులు వడ్డీ రేట్లు, ద్రవ్యోల్బణం, ప్రపంచ ఆర్థిక వృద్ధి సంకేతాలను కూడా జాగ్రత్తగా పరిశీలిస్తున్నారు. బంగారం, వెండి వంటి విలువైన లోహాలు ప్రత్యక్ష ఆదాయాన్ని ఇవ్వవు. కాబట్టి వడ్డీ రేట్లు అధికంగా ఉన్న సమయంలో ఇతర పెట్టుబడులు మెరుగైన రాబడిని ఇస్తే, వీటి ఆకర్షణ కొంత తగ్గుతుంది.

బంగారం ధరలు ఈ రోజు కూడా ఢమాల్.. ఇంకా భారీగా తగ్గేదాకా కొనుగోలు ఆపేయండి.. ఫిబ్రవరి 17,మంగళవారం పసిడి ధరలు ఇవే..

నిపుణుల అభిప్రాయం ప్రకారం ఇది పెద్ద తిరోగమనం కాకుండా తాత్కాలిక దిద్దుబాటు మాత్రమే. India Bullion and Jewellers Association (IBJA) వైస్ ప్రెసిడెంట్, ఆస్పెక్ట్ గ్లోబల్ వెంచర్స్ ఎగ్జిక్యూటివ్ చైర్‌పర్సన్ Aksh Kamboj మాట్లాడుతూ.. ఇటీవలి సడలింపు సాధారణ విరామంలో భాగమేనని అన్నారు. Gold ధరలు కొద్దిగా తగ్గినప్పటికీ, అవి గత వారం స్థాయిల కంటే ఇప్పటికీ ఎక్కువగానే ఉన్నాయి. మొత్తం ట్రెండ్ ఇప్పటికీ మద్దతుగా ఉంది. ఇది లాభాల బుకింగ్ కారణంగా వచ్చిన తాత్కాలిక కదలిక మాత్రమే. ప్రపంచ అనిశ్చితులు కొనసాగితే బంగారం కీలక స్థాయిల కంటే బలంగా ఉండే అవకాశం ఉందని ఆయన వివరించారు.

వెండిపై కూడా ఇదే తరహా అభిప్రాయం వ్యక్తమైంది. బలమైన ర్యాలీ తర్వాత వెండి తన కరెక్షన్ దశలోకి వెళ్లిందని కాంబోజ్ తెలిపారు. వెండి ధరలు పారిశ్రామిక డిమాండ్‌కు ఎక్కువగా స్పందిస్తాయన్న కారణంతో.. చిన్న మార్పులకే తీవ్రంగా ఊగిసలాడతాయని చెప్పారు. అయినప్పటికీ, దీర్ఘకాలిక ధోరణి ఇప్పటికీ సానుకూలంగానే ఉందని స్పష్టం చేశారు.

సాంకేతిక విశ్లేషణ పరంగా కూడా దీర్ఘకాలిక బలహీనతకు ఇప్పటికీ సంకేతాలు లేవని నిపుణులు చెబుతున్నారు. Enrich Money CEO Ponmudi R మాట్లాడుతూ.. Multi Commodity Exchange of India (MCX) గోల్డ్ ఫ్యూచర్స్ ప్రస్తుతం రూ.1,50,000 నుంచి రూ.1,60,000 పరిధిలో కన్సాలిడేషన్ దశలో ఉన్నాయని చెప్పారు. ఆల్‌టైమ్ హై స్థాయిల నుంచి వచ్చిన పదునైన కరెక్షన్ తర్వాత కూడా, విస్తృత అప్‌ట్రెండ్ నిర్మాణం చెక్కుచెదరకుండా ఉందని ఆయన అన్నారు. వెండి ఫ్యూచర్స్ కూడా దీర్ఘకాలికంగా బుల్లిష్ నిర్మాణంలోనే ఉన్నప్పటికీ.. స్వల్పకాలికంగా ఒత్తిడిని ఎదుర్కొంటున్నాయని తెలిపారు.

విశ్లేషకుల మాటలో చెప్పాలంటే.. ఇది దీర్ఘకాలిక ట్రెండ్ మార్పు కాదు. తాత్కాలిక దిద్దుబాటు మాత్రమే. అస్థిర సెషన్లలో భయాందోళనలకు లోనవ్వకుండా ఉండాలని వారు సూచిస్తున్నారు. దీర్ఘకాలిక పెట్టుబడిదారులు కీలక మద్దతు స్థాయిల దగ్గర క్రమంగా కొనుగోళ్లను పరిగణించవచ్చు. అయితే, స్వల్పకాలిక ట్రేడర్లు జాగ్రత్తగా వ్యవహరించాలని చెబుతున్నారు. ముందు రోజుల్లో ధరల దిశ ప్రధానంగా వడ్డీ రేట్లపై ఆధారపడి ఉంటుంది. Federal Reserve రాబోయే నెలల్లో వడ్డీ రేట్లను తగ్గిస్తుందన్న అంచనాలు బలపడితే.. బంగారం, వెండి మళ్లీ బలపడే అవకాశం ఉంది. అప్పటివరకు సమతుల్య పెట్టుబడి వ్యూహంతో క్రమంగా ముందుకెళ్లడమే ఉత్తమ మార్గమని నిపుణులు సూచిస్తున్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.

Credit: Goodreturns