చరిత్రలోనే తొలిసారిగా కుప్పకూలిన రూపాయి.. డాలర్‌తో పోలిస్తే రూ. 90 కి పడిపోయిన విలువ

మంగళవారం ముగింపు 89.96తో పోలిస్తే.. ఈరోజు భారత రూపాయి విలువ అమెరికా డాలర్‌తో పోలిస్తే 90.16కి పడిపోయింది. రూపాయి తొలిసారిగా 90 స్థాయిని దాటడం మార్కెట్‌లో ఆందోళన కలిగించడమే కాకుండా.. రాబోయే నెలల్లో ఆర్థిక ఒత్తిడి పెరిగే అవకాశం ఉందనే సంకేతాన్ని స్పష్టంగా చూపిస్తోంది. ఈ పతనం భారత కరెన్సీపై కొత్త ఒత్తిడిని సూచిస్తుండగా.. దిగుమతి ఖర్చులు, ఇంధన ధరలు, విదేశీ విద్య, ప్రయాణాల వంటి అనేక రంగాల్లో ప్రభావం తక్షణమే కనిపించనుంది.

ఈ సంవత్సరం భారత రూపాయి అమెరికా డాలర్‌తో పోలిస్తే దాదాపు ఐదు శాతం క్షీణించింది. ఆసియాలో అత్యంత దారుణంగా మారిన కరెన్సీలలో ఒకటిగా రూపాయి నిలవడానికి ప్రధాన కారణాలు ఏంటంటే.. రికార్డు స్థాయికి పెరిగిన వాణిజ్య లోటు, విదేశీ పోర్ట్‌ఫోలియో పెట్టుబడుల ఉపసంహరణ, అమెరికా-భారత్ వాణిజ్య ఒప్పందం ముగియడంలో జాప్యంతో పాటుగా బలమైన అమెరికా డాలర్. భారత విదేశీ వాణిజ్యంలో దిగుమతులు, ముఖ్యంగా బంగారం, వెండి, భారీగా పెరుగుతుండగా, ఎగుమతి పనితీరు తగ్గుముఖం పట్టడం వలన వాణిజ్య లోటు 41.68 బిలియన్ డాలర్లకు విస్తరించింది. ఈ లోటును సమకూర్చడానికి మరిన్ని డాలర్లు అవసరం కావడం Rupee విలువపై మరింత ఒత్తిడిని పెంచుతోంది.

విదేశీ పెట్టుబడిదారులు ఈ ఏడాది ఇప్పటివరకు భారత ఈక్విటీ మార్కెట్ల నుండి దాదాపు 17 బిలియన్ డాలర్లను ఉపసంహరించుకోవడంతో కరెన్సీపై అదనపు భారం పడింది. రూపాయి పడిపోతుందనే అంచనాల కారణంగా ఎగుమతిదారులు తమ డాలర్ ఆదాయాలను అమ్మడానికి ఉత్సాహం చూపకపోవడం, మరోవైపు దిగుమతిదారులు అత్యవసరంగా డాలర్లను కొనుగోలు చేయడం కూడా డాలర్ డిమాండ్‌ను పెంచి రూపాయిని మరింత బలహీనపర్చింది. మార్కెట్ విశ్లేషకులు చెబుతున్నట్టుగా.. డాలర్ ప్రవాహాలు ప్రస్తుతం చాలా మందగించిన దశలో ఉన్నాయని, ఇది కరెన్సీ స్థిరత్వాన్ని కష్టతరం చేస్తోందని చెబుతున్నారు.

జీవితం చాలా బోరింగ్‌గా ఉంది.. ఉద్యోగం వదిలేస్తున్నా.. 22 ఏళ్ళ యువకుడి నిర్ణయంపై హాట్ డిబేట్ ఇదిగో..

ఈ పరిస్థితుల్లో రూపాయి విలువ ఇంకా పడిపోతుందా అనే ప్రశ్నపై ఆర్థిక వర్గాల్లో పెద్ద చర్చ జరుగుతోంది. మార్కెట్ నిపుణుల అభిప్రాయం ప్రకారం.. స్వల్పకాలంలో అయితే రూపాయి పతనం కొనసాగవచ్చు. వాణిజ్య లోటు విస్తరణ, విదేశీ పెట్టుబడి అవుట్‌ఫ్లోలు అమెరికా-భారత్ వాణిజ్య ఒప్పందంపై కొనసాగుతున్న అనిశ్చితి రూపాయి పతన దిశను నిర్ణయించే కీలక అంశాలు. రిజర్వ్ బ్యాంక్ ఆఫ్ ఇండియా కరెన్సీ స్థిరీకరణ కోసం చురుకుగా జోక్యం చేసుకుంటున్నప్పటికీ.. ప్రపంచవ్యాప్తంగా బలపడుతున్న డాలర్ ప్రభావంతో RBI చర్యల ఫలితం పరిమితమే అయ్యే ప్రమాదం ఉంది.

బార్క్లేస్ విశ్లేషణ ప్రకారం.. అమెరికా-భారత్ వాణిజ్య ఒప్పందం విజయవంతంగా ముగియడం మాత్రమే రూపాయికి అర్థవంతమైన ఉపశమనాన్ని అందించగలది. మానసికంగా అత్యంత కీలకమైన 90 స్థాయి ఇప్పుడు ఉల్లంఘించబడినందున, రూపాయి రాబోయే రోజుల్లో 90.30 వరకు మరింత దిగజారే అవకాశం ఉందని HDFC సెక్యూరిటీస్ అంచనా వేస్తోంది. ఈ పరిణామాలు ప్రజల జీవితాలపై ప్రత్యక్ష ప్రభావం చూపే అవకాశం ఉంది. ఇంధన ధరలు, దిగుమతి ఉత్పత్తుల ధరలు, విదేశీ రుణాలు, EMIs, విదేశీ విద్య ఖర్చులు అన్ని పెరిగే ప్రమాదం ఉంది.ఈ నేపథ్యంలో రాబోయే కాలంలో రూపాయి భవిష్యత్తు ఏంటనేది ప్రశ్నార్థకంగా మారింది.

Credit: Goodreturns