ఒకే కారులో రెండు కుటుంబాలు హాయిగా వెళ్లొచ్చు! డబ్బుకు పూర్తి విలువ..సేల్స్ రిపోర్ట్ ఏం చెబుతుంది?

మారుతి సుజుకి ఎర్టిగా (maruti suzuki ertiga) భారత మార్కెట్లో సంవత్సరాలుగా సామాన్య కుటుంబాల నమ్మకాన్ని సంపాదించుకున్న ఒక విజయవంతమైన MPV. సరసమైన ధర, విశాలమైన కేబిన్, 7 సీట్ల సౌకర్యం, మంచి మైలేజ్ కారణంగా మధ్యతరగతి కుటుంబాల్లో ఇది ప్రత్యేక స్థానం సంపాదించింది. ముఖ్యంగా ఒకే కారుతో ఫ్యామిలీతో పాటు రోజువారీ అవసరాలు, లాంగ్ డ్రైవ్స్‌ను కూడా సులభంగా నిర్వహించగలగడం ఎర్టిగాను బడ్జెట్ 7 సీటర్ సెగ్మెంట్‌లో బలమైన ఎంపికగా మార్చింది. అయితే, తాజా అమ్మకాల గణాంకాలను పరిశీలిస్తే ఎర్టిగా సేల్స్‌లో స్వల్ప తగ్గుదల నమోదైనట్టు తెలుస్తోంది. నవంబర్ 2025లో మారుతి సుజుకి ఎర్టిగా మొత్తం 16,197 యూనిట్లు మాత్రమే అమ్ముడయ్యాయి. ఇది గత నెలతో పోలిస్తే గణనీయమైన తగ్గుదలగా చెప్పుకోవచ్చు.

అక్టోబర్ 2025లో ఎర్టిగా అమ్మకాలు 20,087 యూనిట్లుగా నమోదు అయ్యాయి, అంటే నెలవారీగా చూసినప్పుడు సుమారు 19.37 శాతం తగ్గుదల చోటుచేసుకుంది. ఈ తగ్గుదల వెనుక పలు కారణాలు ఉండొచ్చని ఆటో పరిశ్రమ వర్గాలు భావిస్తున్నాయి. పండుగ సీజన్ ముగియడం, కొత్త MPVలు, SUVల నుంచి పెరుగుతున్న పోటీ, అలాగే వినియోగదారుల అభిరుచులు మారడం వంటి అంశాలు అమ్మకాలపై ప్రభావం చూపి ఉండవచ్చు.

అయినప్పటికీ, ఎర్టిగా ఇప్పటికీ తన సెగ్మెంట్‌లో విశ్వసనీయత, తక్కువ నిర్వహణ ఖర్చులు, మైలేజ్ పరంగా బలమైన స్థానం కొనసాగిస్తోంది. రాబోయే నెలల్లో మారుతి సుజుకి తీసుకునే ఆఫర్లు, వేరియంట్ అప్‌డేట్లు ఎర్టిగా అమ్మకాలను మళ్లీ పుంజుకునే అవకాశముందని నిపుణులు అభిప్రాయపడుతున్నారు. ముఖ్యంగా కొత్త ఏడాదిలో కంపెనీ దీనిలో ఏమైనా మార్పులు తీసుకువచ్చి మారుతున్న కస్టమర్ల అభిరుచులను అనుగుణంగా అందించే అవకాశం ఉంది. ఈ క్రమంలో దీని సేల్స్ పెరగవచ్చు.

ప్రస్తుతం మారుతి సుజుకి ఎర్టిగా ధరలు భారత మార్కెట్లో రూ. 8.80 లక్షల నుంచి రూ. 12.94 లక్షల వరకు (ఎక్స్-షోరూమ్) ఉన్నాయి. ఈ ధర రేంజ్‌లో 7 సీట్ల లేఅవుట్‌ను అందించే MPVగా ఇది పెద్ద కుటుంబాలకు పూర్తిగా సరిపోతుంది. ఫ్యామిలీతో కలిసి సుదూర ప్రయాణాలు చేయాలనుకునే వారికి, అలాగే రోజువారీ అవసరాల కోసం ఒకే కారును ఉపయోగించాలనుకునే వారికి ఎర్టిగా ప్రాక్టికల్ ఎంపికగా నిలుస్తోంది.

ఇంజిన్ ఆప్షన్ల విషయానికి వస్తే, ఎర్టిగా వేరియంట్‌ను బట్టి 1.5-లీటర్ పెట్రోల్ ఇంజిన్తో పాటు 1.5-లీటర్ CNG ఇంజిన్ ఎంపికల్లో లభిస్తుంది. పెట్రోల్ వేరియంట్ స్మూత్ డ్రైవింగ్ అనుభూతిని అందిస్తే, CNG వేరియంట్ తక్కువ ఇంధన ఖర్చులతో ఎక్కువ ప్రయాణాలు చేసే వినియోగదారులకు ప్రత్యేక ఆకర్షణగా నిలుస్తోంది. మైలేజ్ పరంగా చూస్తే, మారుతి సుజుకి ఎర్టిగా 20 kmpl నుంచి 26.11 kmpl వరకు ఇంధన సామర్థ్యాన్ని అందిస్తుంది.

ముఖ్యంగా CNG వేరియంట్ రోజూ ఎక్కువగా డ్రైవ్ చేసే వారికి ఖర్చు పరంగా పెద్ద ఉపశమనం ఇస్తుంది. పెట్రోల్ ధరలు పెరుగుతున్న ప్రస్తుత పరిస్థితుల్లో, తక్కువ రన్నింగ్ కాస్ట్‌తో ఫ్యామిలీ MPV కావాలనుకునే వారికి ఎర్టిగా ఇప్పటికీ ఒక నమ్మకమైన, విలువైన ఎంపికగా కొనసాగుతోంది. ఇది అన్ని వర్గాల వినియోగదారులకు సులభంగా అందుబాటులో ఉంటుంది. ఇది LXI, VXI, ZXI, ZXI (O) వేరియంట్లలో కొనుగోలు చేయడానికి లభిస్తుంది.

లాంగ్ జర్నీలు చేసే కుటుంబాలకు ఉపయోగపడేలా మారుతి సుజుకి ఎర్టిగా ప్రాక్టికాలిటీపై ప్రత్యేక దృష్టి పెట్టింది. ఎక్కువ లగేజీని తీసుకెళ్లేందుకు ఇది 209 లీటర్ల బూట్ స్పేస్‌ను అందిస్తుంది. అవసరాన్ని బట్టి సీట్లను మడిచితే ఇంకా ఎక్కువ సామాను సులభంగా పెట్టుకునే అవకాశం కూడా ఉంటుంది, ఇది కుటుంబ ప్రయాణాల్లో పెద్ద ప్లస్ పాయింట్. ఫీచర్ల విషయానికి వస్తే, ఎర్టిగా ఈ సెగ్మెంట్‌లో మంచి ప్యాకేజీగా నిలుస్తుంది.

Credit: Drivespark