బంగారం ధరలు తగ్గాయని సంబర పడకండి..కీలక హెచ్చరిక చేస్తున్న JP మోర్గాన్ .. ఈ ఏడాది చివరి నాటికి..

బంగారం ధరలు ఈ మధ్య కాలంలో పెరిగినట్లుగా ఎప్పుడూ పెరగలేదు. జనవరి నెలలో భారీ ర్యాలీ నమోదు చేశాయి. అయితే ఫిబ్రవరి నెలలో ఈ ర్యాలీకి బ్రేక్ పడింది. ఈ వారంలో పసిడి ధరలు నింగి నుంచి నేల చూపులు చూశాయి. భారీగా పతనాన్ని నమోదు చేశాయి. అంతర్జాతీయంగా పరిస్థితులు కుదురుకోవడంతో బంగారం ధరల పతనానికి బ్రేక్ పడింది. అయితే మళ్లీ ఈ రోజు బంగారం ధరలు పెరగడం స్టార్ట్ అయ్యాయి. ఈ నేపథ్యంలో పెట్టుబడిదారులు అయోమయంలో పడ్డారు. కొనుగోలు చేయాలా వద్దా అనే మీమాంసలో పడ్డారు.

తాజాగా బంగారం భవిష్యత్ దృక్పథం అమెరికా దిగ్గజ బ్యాంకు JP మోర్గాన్ తన అంచనాను విడుదల చేసింది. స్వల్పకాలిక ఆర్థిక చక్రాలు లేదా వడ్డీ రేట్ల ఊగిసలాటలతో మాత్రమే బంగారం భవిష్యత్ నిర్ణయించబడదని తెలిపింది. ప్రపంచ ఆర్థిక వ్యవస్థలో నిల్వలను (రిజర్వ్స్) ఎలా నిర్వహించాలనే దానిపై జరుగుతున్న లోతైన నిర్మాణాత్మక మార్పులే బంగారం ధరలను నిర్ణయిస్తున్నాయని ఈ బ్యాంక్ అంచనావేసింది.

ఈ దీర్ఘకాలిక మార్పుల ఫలితంగా 2030 నాటికి బంగారం ధర ఔన్సుకు 8 వేల డాలర్లకు చేరే అవకాశముందని బ్యాంకు అంచనా వేస్తోంది. ఇది కేవలం ధరల పెరుగుదల కాదు, ప్రపంచ ఆర్థిక వ్యవస్థలో బంగారం పాత్రకు జరుగుతున్న మౌలిక పునర్మూల్యాంకనానికి నిదర్శనమని JP మోర్గాన్ చెబుతోంది. ప్రస్తుతం అంతర్జాతీయ మార్కెట్లో బంగారం ధర ఔన్సుకు సుమారు 4,000 డాలర్ల స్థాయిలో ట్రేడవుతోంది. అయితే ఈ స్థాయిని JP మోర్గాన్ తాత్కాలిక గరిష్టంగా చూడటం లేదు. ఇది దీర్ఘకాలిక, నిర్మాణాత్మక బుల్ల్ ట్రెండ్‌కు ఆరంభ దశ మాత్రమేనని బ్యాంకు అభిప్రాయపడుతోంది. ఈ బుల్లిష్ దృక్పథానికి ప్రధాన బలం కేంద్ర బ్యాంకుల నిరంతర బంగారం కొనుగోళ్లేనని చెబుతోంది.

ప్రపంచ బంగారు మండలి (World Gold Council) గణాంకాల ప్రకారం.. 2024లో కేంద్ర బ్యాంకుల బంగారం కొనుగోళ్లు 1,000 టన్నుల మార్కును దాటాయి. ఇది గత దశాబ్దానికి పైగా కొనసాగుతున్న కొనుగోలు ధోరణిని మరింత బలపరుస్తోంది. ఈ డిమాండ్ తాత్కాలిక వ్యూహాత్మక చర్య కాదని, దీర్ఘకాలిక వ్యూహాత్మక నిర్ణయమని JP మోర్గాన్ స్పష్టం చేస్తోంది. అనేక దేశాల కేంద్ర బ్యాంకులు రాజకీయంగా తటస్థంగా ఉండే, ఏ దేశం లేదా సంస్థపై ఆధారపడని, ఆంక్షలు లేదా కరెన్సీ విలువ పతనం నుంచి రక్షణ కలిగించే రిజర్వ్ ఆస్తులను కోరుకుంటున్నాయి. ఈ లక్షణాలన్నీ బంగారాన్ని మరింత ఆకర్షణీయంగా మారుస్తున్నాయి.

బంగారం, వెండి ధరల పెరుగుదల స్టార్ట్.. తగ్గిన కొన్ని గంటలకే మళ్లీ మెగా ర్యాలీ.. కారణం ఏంటంటే..

JP మోర్గాన్ రూపొందించిన 8 వేల డాలర్ల అంచనా కేవలం కేంద్ర బ్యాంకుల డిమాండ్‌పైనే ఆధారపడలేదు. ప్రైవేట్ పెట్టుబడిదారుల పోర్ట్‌ఫోలియో కేటాయింపుల్లో వచ్చే మార్పులు కూడా ఇందులో కీలక పాత్ర పోషిస్తాయి. ప్రస్తుతం ప్రపంచ పెట్టుబడిదారులు తమ పోర్ట్‌ఫోలియోలలో సగటున 3 శాతం వరకు మాత్రమే బంగారం ఎక్స్‌పోజర్‌ను కలిగి ఉన్నారు. ఇది 4.6 శాతానికి పెరిగితే, ఏర్పడే అదనపు డిమాండ్ మార్కెట్లో అందుబాటులో ఉన్న సరఫరిని మించి పోతుందని JP మోర్గాన్ విశ్లేషణ చెబుతోంది.

బంగారం ఉత్పత్తి ధరల సంకేతాలకు చాలా నెమ్మదిగా స్పందిస్తుంది. కొత్త గనుల అభివృద్ధి, ఉత్పత్తి పెంపు అన్నీ సంవత్సరాలు పడే ప్రక్రియలు. అందువల్ల, డిమాండ్ ఒక్కసారిగా పెరిగినప్పుడు, మార్కెట్ సమతుల్యత సాధించేందుకు ధరలు తీవ్రంగా పెరగాల్సి రావొచ్చు. ఇదే బంగారం ధరలను భారీ స్థాయిలకు నడిపించే ప్రధాన కారణంగా బ్యాంకు పేర్కొంటోంది.

ఇక్కడ ముఖ్యంగా గమనించాల్సిన విషయం ఏమిటంటే.. ఈ అంచనా ఎలాంటి ఆర్థిక సంక్షోభం ఆధారంగా చేసినది కాదు. ప్రపంచ వాణిజ్యం విచ్ఛిన్నమవడం, భౌగోళిక రాజకీయ ఉద్రిక్తతలు పెరగడం, ఫియట్ కరెన్సీల ఆధిపత్యంపై విశ్వాసం క్రమంగా తగ్గడం వంటి దీర్ఘకాలిక పరిణామాల నేపథ్యంలో జరుగుతున్న శాశ్వత పోర్ట్‌ఫోలియో రీబ్యాలెన్సింగ్‌ను ఆధారంగా చేసుకుని JP మోర్గాన్ ఈ లక్ష్యాన్ని నిర్దేశించింది.

ఈ పరిణామాలన్నీ పరిశీలించిన నేపథ్యంలో.. దశాబ్దం చివరి నాటికి బంగారం మళ్లీ ప్రపంచ ఆర్థిక వ్యవస్థలో ఒక ప్రధాన ద్రవ్య ఆస్తిగా అవతరించే అవకాశం ఉందని JP మోర్గాన్ అభిప్రాయపడుతోంది. ఊహాగానాలు కాకుండా, నిర్మాణాత్మక మార్పులే బంగారం ధరల దీర్ఘకాలిక ప్రయాణాన్ని నిర్ణయించనున్నాయని బ్యాంకు స్పష్టం చేస్తోంది.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.

Credit: Goodreturns