పాకే పాపకు జాగ్రత్తలు తీసుకోండి!

By B N Sharma

Published: Saturday, August 27, 2011, 8:44 [IST]

మీ పాప పాకటం మొదలు పెట్టి అన్ని పట్టుకుంటుండే సరికి మీరు ఇంటిలో కొన్ని జాగ్రత్తలు పాటించాలి. మీ బేబీ దశలవారీగా పెరుగుతుంది. కనుక బేబీ పాకటం మొదలెట్టిందంటే దాని జీవితంలో ఎదిగిన మరో దశకు చేరందన్నమాట. అయితే కొన్ని ఆశించని జబ్బులు, దెబ్బలు కూడా వుంటూ వుంటాయి. ఇంతవరకు మీ ఇంటిని పరిసరాలను మీకు అనువుగా వుంచుకున్నారు. ఇకపై పాకే పాపకు అనుకూలంగా మీ ఇంటి ఏర్పాట్లు చేసుకోవలసి వస్తుంది. పాకే పాప కొరకు ఇంటిని ఎలా అమర్చాలి అనేందుకు కొన్ని సూచనలిస్తున్నాం. గమనించి ఆచరించేందుకు ప్రయత్నం చేయండి.

1. ఇంటి శుభ్రత: బేబీ ఎదుగుదల దిశగా అడుగులు వస్తోంది. కనుక మీరు ఇంటిని మరింత పరిశుభ్రంగా ఉంచాలి. ఇప్పటి వరకు మీ బేబీ నిలకడగా ఒక చోటే కూర్చునేది. కాని ఇపుడు ఇంట్లో ఎక్కడ పడితే అక్కడకు పాకేస్తోంది. పిల్లలు తమ చేతులు, కాళ్ళతో నేలపైనా, సోఫాలపైనా, టేబుల్స్, వంటగది ప్లాట్ ఫారం, ఈ రకంగా ఎక్కడ వారికి అనువుగా వుంటే అక్కడల్లా పాకేస్తారు. ఏది దొరికితే దాన్ని నోటిలో పెట్టుకొని జబ్బులు కూడా పడతారు. రోజుకు మీరు కనీసం రెండు సార్లయినా ఫినాయిలు వేసి నేల తుడవాలి. నేలపై కార్పెట్ వేశారా? అయితే దానిని తీసేయండి. కార్పెట్లను నేల చేసినంత శుభ్రం చేయలేము. మీ ఇంటిలోకి ఎవరూ కూడా మురికిపట్టిన బూట్లు లేదా సాక్స్ తో నడవకుండా చూడండి.

2. గాయాలు : పాకే పిల్లలకు దెబ్బలు తగులుతూండటం కూడా జరుగుతుంది. పాకటంలో గల ఆనందంతో జరగబోయే యాక్సిడెంట్లను వారు లెక్కపెట్టరు.

3. పదునైన వస్తువులను వారికందకుండా ఉంచండి. పిల్లలు నోటిలో పెట్టుకుంటారనుకునే చిన్న గోలీల వంటి వాటిని కూడా అందకుండా చూడండి. బేబీ పాకుతోందంటే, నించోటానికి కూడా ప్రయత్నిస్తుంది. కనుక పదునుగా వున్న అంచులుకల ఫర్నిచర్ కు ప్లాస్టర్ వేసి వుంచండి.

4. మీ ఇంటిలో మెట్లు వుంటే మరింత జాగ్రత్త అవసరం. ఇరవై నాల్గు గంటలు బేబీని గమనించటం కుదరదు. కనుక మెట్ల గదికి తాళం వేయండి. లేదా మెట్ల భాగంలో బేబీ బయటకు పోకుండా ఒక చిన్న తలుపు ఏర్పాటు చేయండి. పిల్లలకు మెట్లు ఆసక్తికరం. అవి చూసిన వెంటనే వారు వాటి వద్దకు పాకేస్తారు. మెట్ల కారణంగా ఎన్నో మరణాలు సంభవించిన కేసులు కూడా వున్నాయి.

5. బేబీ బెడ్ మీద నిద్రిస్తున్నపుడు కనీసం 4 దిండ్లను పక్కన వుంచండి. నిద్రలో పక్కకు దొర్లకుండా తగిన జాగ్రత్త తీసుకోండి.

6. పిల్లల పరిశుభ్రత: మీ ఇంటి పరిశుభ్రతే కాదు బేబీ పరిశుభ్రత కూడా మీరు జాగ్రత్తపడాలి.

7. పిల్లల మోకాళ్ళు, చేతులు దుమ్ములో తిరుగుతూంటాయి. వీటికి కనీసం రోజుకు రెండు సార్లు యాంటీ సెప్టిక్ లోషన్ తో కడగాలి. బేబీ పాకేటపుడు మోకాళ్ళు జాయింట్ల వద్ద నల్లగా అవుతుంది. దాని గురించి ఆందోళన చెందకండి. వారు నడవటం మొదలుపెడితే అది పోతుంది.

బేబీ పాకేటపుడు ఈ మాత్రం జాగ్రత్తలు పాటిస్తే బేబీ పాకే దశ చాలా వరకు సురక్షితంగా గడచిపోగలదు.