కొత్తగా పుట్టిన పిల్లల సాధారణ ప్రవర్తనలు!

By B N Sharma

Published: Monday, February 27, 2012, 9:57 [IST]

పిల్లలు పుట్టిన కొత్తలలో తల్లి తండ్రుల జీవితంలో ఎన్నో మార్పులు తెస్తారు. ఎంతో ఆనందం, సమస్యలు వస్తే విచారం కలిగిస్తారు. పిల్లలు ఏడ్వటం, నవ్వటం, ఎన్నో చిలిపిపనులు చేయటం వంటివి చేస్తారు. సాధారణంగా పిల్లలు అందరూ ప్రవర్తించే కొన్ని తీరులు పరిశీలిద్దాం. అయితే, వారు ఏం చేసినప్పటికి వారి ఆరోగ్యానికి అపాయం వంటివి కలగకపోతే మీరు ఆందోళన చెందాల్సిన అవసరంలేదు.

1. ఏడ్వటం - ఏడవటం పిల్లలకు సాధారణమే. ఆకలి, అలసట, అసౌకర్యం, చికాకు వంటి వాటికి ఏడుస్తారు. కొంతమంది పగలు ఏడుస్తే, మరి కొంతమంది పిల్లలు రాత్రులందు ఏడుస్తూ వుంటారు.

2. నిద్ర - సాధారణంగా పిల్లలు రోజుకు 20 గంటలపాటు నిద్రిస్తారు. ఈ సమయం బిడ్డలకు వేరు వేరుగా కూడా వుంటుంది. ఏకబిగువున 3 లేదా 4 గంటలు పడుకుంటారు. కొన్ని సమయాలలో అరగంటలో లేచి కూర్చుంటారు. కొంతమంది రాత్రులలో చాలా ఆలస్యంగాను మరి కొంతమంది చాలా త్వరగాను కూడా నిద్రిస్తారు.

3. ఆహారం - కొత్తగా పుట్టిన బిడ్డల ఆహారపుటలవాట్లు రోజు రోజుకు మారుతూంటాయి. పుట్టిన రోజు, పాలు బలవంతంగా తాగించాలి. నిద్రపోతున్నా లేపి మరి తాగించాలి. అలవాటయిందంటో, తరచుగా కోరతారు. వారి పొట్ట చిన్నది కనుక, తరచుగా పాలు పట్టాలి.

4. చూపు - బిడ్డ పుట్టిన కొత్తల్లో చూపు నిలపలేదు. మెల్లగా తన చూపు నిలపటం చేర్చుకుంటుంది. ఒక నెలరోజులు అయిన తర్వాత వారికి నలుపు తెలుపు రంగులు తెలుస్తాయి. నెల తర్వాతే చూపుమీద అంటే వారి కంటి కండరాలపై వారికి నియంత్రణ వచ్చి గుర్తించటం మొదలుపెడతారు.

5. విషయాలు గ్రహించటం, వేళ్ళు, కాలి బొటన వేలు వంటివి చీకటం, చేతులూ ఊపటం, కాళ్ళు తన్నటం వంటివి కూడా కొత్తగా పుట్టిన పిల్లలలో నిదానంగా ఏర్పడటం గమనించవచ్చు. ఈ రకంగా పిల్లలు తమ కండరాలను స్వాధీనంలోకి తెచ్చుకోవడం గమనించవచ్చు.

సాధారణంగా బేబీలు అందరూ పైన చెప్పిన చర్యలు చేస్తూ వుంటారు. వీటికి వ్యతిరేకంగా ఏదైనా ప్రత్యేకతలు కనపడితే నిరంతరం ఏడుస్తున్నా, పాలు చాలటం లేదని ఏడుస్తున్నా అటువంటివి గ్రహించి అందుకవసరమైన పరిష్కారాలు కనుగొనాలి.