పిల్లలలో వినికిడి.... చెవుల శుభ్రత ఎలా?

By B N Sharma

Published: Monday, July 16, 2012, 13:12 [IST]

సాధారణంగా పిల్లలలో చెవి నొప్పి తరచుగా వస్తూ ఉంటుంది. ఎన్ని జాగ్రత్తలు తీసుకున్నప్పటికి వీరికి చిన్నతనంలోనే వినికిడి సమస్యలు వస్తూంటాయి. పిల్లలలో వినికిడి శక్తిని పెద్దలు గమనిస్తూ ఉండాలి. బిడ్డ పుట్టినపుడే, అందుకుగాను కొన్ని పరీక్షలు చేయించాలి. శబ్దాలు చేస్తూ బిడ్డ ఆ దిశగా చూస్తోందా లేదా, తాను విన్నదానికి సరైన రీతిలో స్పందిస్తోందా లేదా వంటివి బేబీ పసితనంనుండే పరీక్సించాలి. బిడ్డలు ఎదిగారంటే శరీరంలో చెవులు గుబిలిని తయారు చేస్తాయి. దీనివలన బయటనుండి మురికి లేదా బాక్టీరియా వంటివి లోపలికి చేరకుండా ఇది అడ్డుకుంటుంది. చెవికి వ్యాధులురాకుండా శుభ్రంగా వుంచాలంటే పిల్లలకు అపుడపుడు చెవులు శుభ్రం చేస్తూ మురికి పట్టిన ఆ గుబిలిని అతి జాగ్రత్తగా బయటకు తీస్తూ వుండాలి. అందుకుగాను కొన్ని చిట్కాలు పరిశీలించండి.

1. పిల్లలు స్నానం చేసినపుడు చెవి బయటి భాగాన్ని టవల్ తో శుభ్రంగా తుడవండి. చెవిలో కొద్ది చుక్కలు బేబీ ఆయిల్ వేసి లోపల వున్న మురికి గుబిలి మెత్తబడేలా చేయండి.
2. ఒక కాటన్ గుడ్డ ముక్క తీసుకుని వేడినీటిలో ముంచండి. దానిని సన్నగా చుట్టి మరోమారు చెవి అంతా శుభ్రంగా బయటివైపు తుడవండి.
3. చెవి వెనుక భాగాలు ప్రధానంగా శుభ్రం చేయాలి. సాధారణంగా ఈ భాగాలను స్నానం తర్వాత తుడవటానికి అశ్రద్ధ చేస్తూ ఉంటాము. ఇక చెవి లోపలి భాగం శుబ్రం చేయటానికి గాను మరో పలుచటి గుడ్డ ముక్కను సన్నగా చుట్టి చెవిలో ఇప్పటికే మెత్తబడ్డ గుబిలిని బయటకు తీయండి.
4. చెవి పైభాగాలను కూడా ఇదే రకంగా శుభ్రం చేయవచ్చు.
5. చెవిలోపలి శుభ్రతకు గాను పెట్టే గుడ్డను సవ్యంగా తిప్పుతూ బయటకు లాగుతూంటే, లోపలి గుబిలి బయటకు వచ్చేస్తుంది.
6. రెండవసారి చెవిలోపల శుభ్రం చేయాలంటే అదే గుడ్డను కాకుండా మరొక తాజా గుడ్డ ముక్కను ఉపయోగించండి.
7. చెవిలోపల భాగంలోకి గుడ్డను అధికంగా ఒత్తిడి చేయకండి. లోపలి చెవి భాగాలు చాలా సున్నితంగా వుంటాయి. పిల్లల వినికిడిలో ఏ మాత్రం తేడా గమనించినా, వెంటనే చెవి వైద్య నిపుణులవద్దకు తీసుకు వెళ్ళండి. వారు చెవిని తగిన లోషన్లతో తేలికగా శుభ్రం చేస్తారు.
8. పిల్లలు స్కూలులో టీచర్లు చెప్పే అంశాలు సరిగా వినగలుగుతున్నారా లేదా అనేది కూడా టీచర్లను అడిగి తెలుసుకోండి.

ఈ రకమైన శుభ్రతతో అధికంగా వుండే గుబిలి తీసేయవచ్చు. లోపల ఇంకా కొంత వున్నప్పటికి అది హాని కలిగించదు. అధికంగా వుండే గుబిలిని మాత్రమే ఎప్పటికపుడు తీసేయాలి. చెవులు శుభ్రం చేసేటపుడు పిల్లలనుండి వ్యతిరేకత లేకుండా వారితో మాటలు చెపుతూ లేదా బొమ్మలతో ఆడిస్తూ మెల్లగా శుభ్రం చేయాలి.