పిల్లల భవిష్యత్తు ...పెద్దల పెంపకంపైనే!

By B N Sharma

Published: Saturday, December 24, 2011, 11:28 [IST]

నేటి పిల్లలే రేపటి పౌరులు. పిల్లల భవిష్యత్తును తీర్చిదిద్దే వారు పెద్దలే. బాల్యంలో పిల్లలకు సరైన మార్గదర్శకతలు లేకుంటే, వాటి లోపం పిల్లలను జీవితాంతం వెంటాడుతూనే వుంటుంది. అందుకని తల్లితండ్రులు పిల్లల పట్ల, వారి అలవాట్ల పట్ల శ్రద్ధ వహించాలి. మంచి అలవాట్లను వారికి ఒకటికి రెండు సార్లు చెప్పి ఆచరించేలా చేయాలి.మంచి అంశాలపై వారికి శ్రధ్ధ కలిగించాలి. అందుకుగాను కొన్ని చిట్కాలు పరిశీలించండి - మీరు చెప్పిన విషయాన్ని ముందుగా వారు శ్రధ్ధగా విన్నారా లేదా అనేది గమనించండి. వినినప్పటికి వారు స్పందించకపోతే, మరోసారి చెప్పి వారు దానిపై ఏకాగ్రత పెట్టేలా వివరించండి.

ఇంటిలో పిల్లలకు టి.వి. కంప్యూటర్, వీడియో గేమ్స్ వంటి వాటిని అందుబాటులో వుంచినప్పటికి వాటికి తగినంత సమయం మాత్రమే కేటాయించి. వారు దానినుండి మంచి విషయాలు నేర్చుకునేట్లు చేయండి. వ్యక్తిగతమైన శుభ్రత పాటించేలా చేయండి. ఉదయమే బ్రషింగ్, బాత్, డ్రసింగ్ వంటివి వారు సవ్యంగా ఆచరించేలా చూడండి. వారితో ఆటలాడి వారు మీతో అనుబంధం పెంచుకునేలా చేయండి. వారి ఆటలలో మీరు కూడా పాల్గొని ఆనందించండి.

పిల్లాడు మీ మాట వినటం లేదా. అయినప్పటికి వాడిపై అరవటం, కోపం చేయటం వంటివి చేయకండి. చేస్తే మొండి వాడయిపోతాడు. ఒకటికి రెండుసార్లు వివరించి తగిన కారణాలు చెపితే, మీరు చెప్పిన విషయాలు ఆచరిస్తాడు.