పిల్లల పరీక్షలకు పెద్దల పాట్లు!

Kids

oi-Nageswara

By B N Sharma

Published: Saturday, December 3, 2011, 10:12 [IST]

స్కూలుకు వెళ్ళే రోజులన్నీ పిల్లలకు, తల్లితండ్రులకు హేపీగా గడిచిపోతాయి. పరీక్షలు వచ్చాయంటే...అందరికి బెంగ. పిల్లలు మనోవేదనతో పరీక్షలు సరిగా వ్రాయలేరు కూడాను. లెక్కలు పరీక్ష కష్టమనుకుంటే...అందులోనే ఫెయిలైపోతారు. సరిగ్గా పరీక్షలముందర పిల్లలలో ఎంతో ఆందోళన, భయం, అజాగ్రత్త, ఎన్నో వచ్చేస్తాయి. అయితే, వీరిని సరైన పరీక్షల మార్గంలో పెట్టటం తల్లితండ్రుల వంతు. అందుకుగాను కొన్ని చిట్కాలు చూడండి.

పిల్లలను పరీక్షలకు ఎలా తయారు చేయాలి?
1. పరీక్షలు మొదలయ్యేటందుకు రెండు లేదా మూడు వారాలకు పిల్లలకు చదివే సమయాన్ని నిర్ణయించండి.
2. పరీక్షలకు ముందు 1 లేదా 2 రోజులే ఆ సబ్జక్టు చదివించే బదులుగా ముందునుండే చదివించి పిల్లాడిని తయారు చేయండి.
3. ఉద్యోగాలు చేసే తల్లితండ్రులకు పిల్లల పరీక్షల తయారీ కష్టమే. అందుకనే వారు సాధారణంగా ప్రయివేటు ట్యూషన్లకు పంపుతారు. కాని పిల్లాడు కనుక వినయ విధేయతలతో చదువుకునే వాడైతే మీరే బోధించవచ్చు.
4. తల్లి ఉద్యోగం చేసే వారైతే ఆఫీసుకు వెళ్ళే ముందు కొంత హోం వర్కు ఇవ్వండి. తిరిగి వచ్చిన తర్వాత పిల్లాడు ఎలా చేశాడనేది పరిశీలించండి. బాగా చేస్తే, వాడిని అభినందించండి. పిల్లలు మెచ్చుకుంటే మరింత బాగా చదువుతారు.
5. పిల్లాడు సరిగా పరీక్షలకు చదవకపోతే, కఠినంగా వుండండి. తప్పటంవలన వచ్చే నష్టాలు వివరించండి. బాగా ఒత్తిడి చేయకండి. ఒత్తిడి చేస్తే వాడు చదవాల్సింది కూడా చదవక పుస్తకాలు అంటేనే భయపడతాడు.
6. పిల్లాడు సరిగా నేర్చుకోలేకపోతే, అర్ధమయ్యేలా వీలైనన్ని సార్లు చెప్పండి. మీరు సహనం వహిస్తే, పిల్లలు పరీక్షలలో బాగా వ్రాస్తారు.
7. వారికి ముందస్తు పరీక్షలు పెట్టండి. ఇది చాలా మంచిది. ప్రతి చాప్టర్ మొదట నేర్చుకోడం తర్వాత అందులో సమాధానాలు రాయటం వంటిది చేయాలి. పిల్లాడు బాగా ప్రిపేర్ అయితే, ఇక వాడికి ఇంటిలో ముందస్తు పరీక్ష పెట్టండి.
8. రివిజన్ చాలా ప్రధానం. దీనివలన పిల్లాడికి సమాధానాలు గుర్తుంటాయి. పిల్లాడు స్కూలుకు వెళ్ళేముందు రివిజన్ కు కొంత సమయం కేటాయించండి.

ఈ ఎనిమిది చిట్కాలు మీరు, మీ పిల్లాడు పాటిస్తూ వుంటే, పిల్లాడు పరీక్షలు బాగా వ్రాయవచ్చు. పరీక్షకెళ్ళేముందు పిల్లాడు బాగా రిలాక్స్ అయ్యేలా చూడండి. భయపడాల్సిందేమీ లేదని ధైర్యాన్ని అతనిలో నింపి బాగా వ్రాయగలననే విశ్వాసం చేకూర్చండి.