మీ పిల్లలు హింసా ధోరణి అవలంబిస్తున్నారా?

By B N Sharma

Published: Tuesday, March 13, 2012, 10:32 [IST]

Are Your Kids Showing Signs Of Violence?

పిల్లలలో హింసాత్మక ధోరణి గమనించే తల్లితండ్రులు కొన్ని జాగ్రత్తలు పాటించాలి. పిల్లలు కొందరు సహజంగా హింసాత్మక ధోరణి కలిగి వుంటే, మరికొంతమంది పిల్లలు చుట్టూ వున్న వారిని చూసి లేదా అటువంటి సన్నివేశాలను టీ.వీ.లలో చూసి నేర్చుకుని ప్రవర్తించేవారుంటారు. మొదటి తరగతి వారిని మార్చటం కష్టం. అయితే చూసి నేర్చుకునే వారిని తేలికగా సరిదిద్దవచ్చు. వీరి అలవాట్లను మొదటిలోనే పూర్తిగా మాన్పించే ప్రయత్నం చేయాలి. అదే రకంగా పిల్లలు పెరిగిపోతే తర్వాతికాలంలో వారిని మార్చటం కూడా కష్టమవుతుంది.

1. పిల్లాడు స్కూల్ నుండి ఇంటికి వచ్చి పుస్తకాల బ్యాగ్ విసిరేసి, షూస్ కూడా విసిరి అవతల పారేశాడా? అది వాడి తీవ్ర వ్యతిరేక ధోరణికి నిదర్శనం. అపుడే మీరు దానిని సరిచేయండి.

2. చేతికి అందించాల్సిన వస్తువులను సై తం విసిరి అందిస్తూంటే, దానిని సరి చేయండి. కుటుంబంలోని పెద్దలనుండి కూడా ఈ అలవాటు వారు నేర్చుకుంటారు. ముందుగా పెద్దలు ఈ పని చేస్తూంటే దానిని నిలుపండి.

3. కొంతమంది పిల్లలు, కనపడ్డ వస్తువును లేదా బొమ్మను పాడు చేసే ప్రయత్నంలో వుంటారు. అది సరికాదని, అలా చేస్తే వారు శిక్షింపబడతారని, అంతేకాని కొత్త వస్తువు లేదా బొమ్మ వంటివి తిరిగి రావని వానికి తెలిపి సరిచేయండి.

4. పిల్లాడు హింసాత్మకంగా ప్రవర్తిస్తుంటే, ఏడుపు, కేక పెట్టటం లేదా తల్లి తండ్రులను కొట్టటం వంటివి చేస్తూంటే వాడు పెద్ద అయితే మరింత తీవ్ర మొండితనానికి గురవుతాడు. ఈరోజు పిల్లాడు కనుక ఒక బొమ్మకు మారాం చేస్తే రేపు పెద్ద వస్తువులకు కూడా అదే విధంగా ప్రవర్తిస్తాడు. కనుక పిల్లవాడికి మంచి నడవడిక ఎలా? అనేది నేర్పించి సరిచేయండి.

5. టీనేజ్ వచ్చేసిందంటే వారిలో వచ్చే హార్మోన్ల మార్పు కారణంగా మీపై తిరుగుబాటు చేస్తారు. అయితే, హింసాత్మకంగా మీపై తిరుగుబాటు చేసేకంటే, మహాత్మ గాంధీవలే అహింసాత్మకంగా, చక్కటి ప్రవర్తనతో కూడా తిరుగుబాటు చేయవచ్చని వానికి తెలుపండి.

పిల్లలు హింసాత్మకంగా ప్రవర్తించటం సాధారణమే అయితే వాటికి కొన్ని హద్దులు పెట్టండి. మర్యాదగా వారి అసమ్మతిని ప్రకటించేలా నేర్పించండి.