పిల్లలలో అవగాహనా శక్తి పెంచటమెలా?

Kids

oi-Nageswara

By B N Sharma

Published: Friday, May 4, 2012, 16:33 [IST]

స్కూలు విద్యనే ధ్యేయంగా పెట్టుకొని అకారణంగా పిల్లలపై కోపం చేస్తూ వుండే పెద్దలు తెలుసుకోదగిన విషయాలు కొన్ని వున్నాయి. పెద్దలు సాధారణంగా అనేక విషయాలు తెలిసినా, సమయానికి వాటిని పరిగణనలోనికి తీసుకోరు. సమాజంకోసమో, తమ గొప్పకోసమో ప్రాణంగా ప్రేమించే పిల్లలను ఒత్తిడికి గురిచేస్తున్నారు. ఇంటినుండి పారిపోవడాలు, ఆత్మహత్యలు ఇవన్నీ ఈ కారణాలచేత వల్లనే. నష్టం జరిగాక బాధపడేకంటే, ముందుగా పిల్లల విషయంలో జాగ్రత్తలు తీసుకోవాలి. పిల్లలు మనకు అన్ని వేళలా ఆనందాన్నీ, తృప్తినీ కలిగిస్తారు. వారిని ఎట్టి పరిస్ధితులలోను నిరుత్సాహ పరచి దూరం చేసుకోరాదు.

పిల్లలు ఎలా నేర్చుకోవాలి? నేర్చుకోవడానికి ఎదురయ్యే అడ్డంకులపై స్కూలులో టీచర్, ఇంట్లో తల్లిదండ్రులు, ఇతర కుటుంబసభ్యులకు సరైన అవగాహన ఉన్నపుడు ఆ పిల్లలకు సహాయం చేయగలుగుతారు. పిల్లలను ప్రోత్సహించాలి. పెద్దలు వారికి తమవంతు సహాయం వారి చదువులలో లేదా ఇతర పనులలో అందించాలి. వారంతటవారు ఏదైనా పనిచేసినపుడు మనస్ఫూర్తిగా పొగడాలి. చిన్నదైనా సరే ఏదో ఒక బహుమతినిచ్చి ఉత్సాహ పరచాలి. పిల్లలను దండించడం వల్ల వచ్చే లాభమేమీ లేదన్న విషయం పెద్దలు గ్రహించాలి.

మరి తల్లితండ్రులు వారికి ఏ రకంగా సహాయ పడాలి? అంటే లెక్కలు సరిగా చేయనపుడు క్యాలిక్యులేటర్‌ ఉపయోగించడం, వ్రాయలేనపుడు నోటితో సబ్జెక్టును చెప్పించడం, విద్యార్థిని ముందు బెంచీలో కూర్చోపెడితే స్కూలులో ఉపాధ్యాయులు వారిపై ఎక్కువ శ్రద్ధ చూపగలరు. పిల్లలకూ నేర్చుకునే విషయంపట్ల ఆసక్తి పెరుగుతుంది. కనుక వీలైనంతవరకు వారిని ముందు బెంచీలలో కూర్చోపెట్టే ఏర్పాటు చేయాలి. వీటివల్ల నేర్చుకునే పద్ధతుల్లో కొంత మెరుగుపడి చదువులో ఆసక్తి కలుగుతుంది.

నేర్చుకోవడం అనేది చుట్టూ వున్న వాతావరణంమీద ఆధారపడి వుంటుంది. సరైన ఉపాధ్యాయులు, పుస్తకాలు, నేర్చుకోవాలనే ఆసక్తి కలిగించేవాళ్లు, వారి చుట్టూ వుండాలి. పిల్లలకు మంచి మానసిక ఆరోగ్యం అవసరం. వారు మానసికంగా ఎదగలేకపోవడం కారణం ఆందోళన అనవసర భయాలు గా వుంటాయి. ఇవి చదువులో అడ్డువస్తాయి. వారు వెనకబడేలా చేస్తాయి. వీటిని పెద్దల సహకారంతో సులువుగా పిల్లలు అధిగమించి విజయాలు సాధిస్తారు. కనుక పెద్దలు పిల్లలకు వారి అభివృద్ధిలో నిరంతరం సహకరిస్తూవుండాలి.