తల్లితండ్రుల పోట్లాటలు....పిల్లల బెంగలు?

Kids

oi-Nageswara

By B N Sharma

Published: Thursday, May 10, 2012, 9:48 [IST]

జంటలు వివాహాలు అయిన కొత్తల్లో ఎంతో సంతోషంగా, ఆనందంగా, గడిపేస్తారు. వివిధ ప్రదేశాలు విహరిస్తారు. మహిళ గర్భం దాల్చే సరికి వారి మధ్య కొన్ని అవగాహనా సమస్యలు వస్తాయి. అవి పెరిగి పెద్దవై వారికి తెలియకుండానే వారి మధ్య తగవులు, పోట్లాటలు కలిగిస్తూంటాయి. పిల్లలు పుట్టి వారు ఎదిగినప్పటికి ఈ రకమైన తగవులు జంటల మధ్య కొనసాగుతూనే వుంటాయి. కొంతమేరకు వారిలో వారు సర్దుకోవడం, మరోమారు తగవులాడుకోవటం చేస్తారు. చిన్న అంశాలైనప్పటికి కొన్ని మార్లు సర్దుకోలేరు.

ప్రత్యేకించి వీరి తగవులు, అపుడపుడే ఊహ తెలుస్తున్న చిన్నారులకు సమస్యగా వుంటుంది. తగవు ప్రభావం వీరి ప్రవర్తనపై పడుతుంది. వీరు చిన్నగా తగవులాడుకున్నా సరే బిడ్డ కనుక బాగా సున్నిత మనస్కుడైతే వానిపై ప్రభావం తీవ్రంగా వుంటుంది. దానికి కారణం అతను చూస్తున్న మొట్టమొదటి వ్యక్తులు తల్లితండ్రులు కావటమే. వారిలో ఆందోళన, నిస్సహాయత, చోటుచేసుకుంటాయి. కొన్నిమార్లు తల్లితండ్రుల తగవుల కారణంగా, వాటిని ప్రత్యక్షంగా చూసే చిన్న పిల్లలు ఎంతో నష్టపోయే స్ధితికి వస్తారు. మనోఘాతమై మరోమారు కోలుకోలేని స్ధితికి కూడా వచ్చేస్తారు.

తల్లితండ్రులమధ్య ఎంత చిన్న తగవు అయినప్పటికి పిల్లల మనసులు వాటిని తట్టుకోలేవు. బేబీ లేదా పిల్లవాడిలో ఎంతో ఒత్తిడి కలిగించి వారిని ఆ జ్ఞాపకాలు జీవితాంతం వెంటాడుతూనే వుంటాయి. తాజాగా చేసిన ఒక సర్వేలో రీసెర్చర్లు షుమారు 532 మంది పిల్లలను వారి తల్లితండ్రులను అధ్యయనం చేశారు. తల్లితండ్రుల హింసాత్మక ప్రవర్తనకు పిల్లల మానసిక వ్యధకు ఎంతో దగ్గర సంబందం వున్నదని కనుగొన్నారు. వీరు నిర్వహించిన పరిశోధాన చాలావరకు పట్టణ ప్రాంతాల పిల్లలపైనే జరిగింది.

కనుక తల్లి తండ్రులు తమ పిల్లల ముందు హింసాత్మక ధోరణిలో తగవులు చేసుకోకుండా తమ స్పర్ధలను పోగొట్టుకోవాలని, ఏదేని జరిగినప్పటికి అటువంటివి తమ పిల్లలముందు జరుగకుండా చూసుకోవాలని, ఇది పిల్లలకు ఎంతో మంచిదని అంతేకాక, తల్లితండ్రుల, పిల్లల మధ్య సంబంధాలు కూడా చెడకుండా వుంటాయని రీసెర్చర్లు వెల్లడించారు.