నోరూరించే చెట్టినాడ్ చికెన్.. తింటుంటే వావ్ అనాల్సిందే!

వేడివేడిగా, కాస్త కారంగా ఏదైనా తినాలనిపించిన సమయంలో మనకు వెంటనే గుర్తొచ్చేది నాన్ వెజ్ వంటకాలు. అందులోనూ దక్షిణ భారతదేశంలో అత్యంత ప్రజాదరణ పొందిన, నోటికి అద్భుతమైన రుచిని అందించే చెట్టినాడ్ చికెన్ ఉంటే ఆ మజాయే వేరు.

బయట రెస్టారెంట్లలో దొరికే ఈ ప్రత్యేకమైన వంటకాన్ని, ఎంతో సులభంగా, ఎలాంటి శ్రమ లేకుండా మన ఇంట్లోని వంటగదిలోనే తయారు చేసుకోవచ్చు. అచ్చం హోటల్ రుచిని తలపించే ఈ చెట్టినాడ్ చికెన్ రహస్యం అంతా అందులో వాడే తాజా మసాలాల్లోనే దాగి ఉంది.

చెట్టినాడ్ చికెన్ తయారీకి కావలసిన పదార్థాలు

తాజా చికెన్ - అర కిలో (500 గ్రాములు)
ధనియాలు - 1 టేబుల్ స్పూన్
జీలకర్ర - 1 టేబుల్ స్పూన్
మిరియాల పొడి - 1 టేబుల్ స్పూన్
మెంతులు - పావు టీస్పూన్
దాల్చిన చెక్క - 1 అంగుళం ముక్క
ఎండు మిరపకాయలు - 3
కశ్మీరీ ఎండు మిరపకాయలు- 2
అనాస పువ్వు- 1
యాలకులు - 2
లవంగాలు - 6
పచ్చి కొబ్బరి తురుము - 2 టేబుల్ స్పూన్లు
అల్లం - అర అంగుళం ముక్క
వెల్లుల్లి రెబ్బలు - 4
గట్టి పెరుగు - ఒకటిన్నర టేబుల్ స్పూన్
నిమ్మరసం - 1 టేబుల్ స్పూన్
నెయ్యి - 2 టేబుల్ స్పూన్లు
ఉల్లిపాయ - 1
పసుపు -అర టేబుల్ స్పూన్
ఉప్పు - రుచికి సరిపడా
కరివేపాకు - 2 రెమ్మలు
కొత్తిమీర - కొద్దిగా

చెట్టినాడ్ చికెన్ తయారీ విధానం

-ముందుగా చికెన్‌ ను నీటిలో రెండు మూడు సార్లు బాగా కడగాలి. ముక్కలలో కొద్దిగా పసుపు, ఉప్పు వేసి శుభ్రం చేసుకుంటే నీచు వాసన రాకుండా ఉంటుంది.

-ఇప్పుడు అసలైన చెట్టినాడ్ మసాలా రెడీ చేసుకోవాలి. ఇందుకోసం స్టవ్ మీద పాన్ పెట్టి అందులో ధనియాలు, జీలకర్ర, మిరియాలు, మెంతులు, దాల్చిన చెక్క, లవంగాలు, యాలకులు, అనాస పువ్వు, ఎండు మిర్చి, కాశ్మీరీ మిర్చి వేసి సన్నని మంటపై దోరగా వేయించుకోవాలి. చివరగా కొబ్బరి తురుము వేసి వేయించి స్టవ్ ఆపేయాలి.

-వేయించిన మసాలా దినుసులు చల్లారాక వాటిని మిక్సీ జార్‌ లో వేసుకోవాలి. అందులోనే అల్లం, వెల్లుల్లి, కొద్దిగా నీళ్లు లేదా కొబ్బరి నీళ్లు పోసి మెత్తని పేస్ట్‌ లా రుబ్బుకోవాలి. ఈ మసాలా పేస్ట్ వంటకానికి ప్రాణం లాంటిది.

-ఒక గిన్నెలో శుభ్రం చేసిన చికెన్ తీసుకుని అందులో రుబ్బి పెట్టుకున్న చెట్టినాడ్ మసాలా పేస్ట్, నిమ్మరసం, పెరుగు వేసి ముక్కలకు బాగా పట్టించాలి. మూతపెట్టి కనీసం గంట పాటు మ్యారినేట్ చేయాలి. దీనివల్ల చికెన్ లోపలి వరకు మసాలాలు వెళ్లి ముక్క మృదువుగా, రుచిగా మారుతుంది.

-ఇప్పుడు మందంగా ఉన్న కడాయిని తీసుకుని స్టవ్ మీద పెట్టి నెయ్యి వేడి చేయాలి. నెయ్యి కరిగాక సన్నగా తరిగిన ఉల్లిపాయ ముక్కలు, పసుపు వేసి లేత బంగారు రంగులోకి మారేంత వరకు వేయించాలి.

-ఉల్లిపాయలు వేగిన తర్వాత మ్యారినేట్ చేసి పెట్టుకున్న చికెన్‌ ను అందులో వేసి బాగా కలపాలి. తగినంత ఉప్పు, చికెన్ ఉడకడానికి సరిపడా నీళ్లు పోసి మూతపెట్టాలి. సన్నని మంట మీద చికెన్ ముక్కలు మెత్తగా ఉడికి, గ్రేవీ చిక్కబడే వరకు ఉడికించాలి.

-చివరగా కరివేపాకు, తాజా కొత్తిమీర చల్లుకుని దించేసుకోవాలి. ఘుమఘుమలాడే చెట్టినాడ్ చికెన్ రెడీ.