పల్లెటూరి స్టైల్ ఉల్లికారం రోటి పచ్చడి.. ఒక్కసారి తింటే వదిలిపెట్టరు!

రోటీ పచ్చళ్లు అంటే ఇష్టపడని వాళ్లు ఎవరుంటారు చెప్పండి. ఫైవ్ స్టార్ హోటల్ ఫుడ్ తిన్నా కూడా ఒక్క ముద్ద రోటి పచ్చడి లేకుంటే ఏదో వెలితిగా ఉన్నట్లే అనిపిస్తుంది. ముఖ్యంగా మన తెలుగు వాళ్లకి రోట్లో చేసిన పచ్చళ్లు తింటుంటే అమృతం తిన్నట్లు ఫీల్ అవుతారు. సినిమా సెలబ్రిటీలు కూడా లంచ్ లోకి రోటి పచ్చడి తప్పనిసరి ఉండాల్సిందేనని చాలా వీడియోలలో చెప్పడం మనం చూస్తున్నాం.

పూర్వకాలంలో మిక్సీలు అందుబాటు లేని రోజుల్లో రోట్లో చేసిన పచ్చళ్లు తినేవాళ్లు మన పూర్వీకులు. రోట్లో చేసిన పచ్చడి, మిక్సీలో చేసిన పచ్చడికి టేస్ట్ మారిపోతుంది. రోట్లో చేసిన పచ్చడినే కమ్మగా ఉంటుంది. ఇవి చాలా ఈజీగా తయారవ్వడమే కాకుండా టేస్ట్ లో ది బెస్ట్ గా ఉంటాయి. అలాంటి రోటి పచ్చళ్లలో ఉల్లికారం టాప్ ప్లేస్ లో ఉంటది. ఒక్కసారి ఉల్లికారం ట్రై చేశారంటే..రోజూ అదే కావాలనడం గ్యారెంటీ. ఉల్లికారం రోటి పచ్చడిని మీ ఇంట్లోనే ఈజీగా ఎలా తయారుచేసుకోవాలో ఇక్కడ చూడండి.

కావాల్సిన పదార్థాలు

-ఉల్లిపాయ
-ఎండుమిర్చి
-ధనియాలు
-ఉప్పు
-వెల్లుల్లి రెబ్బలు
-కొత్తిమీర
-నూనె
-ఆవాలు
-పసుపు
-కారం
-పెరుగు

చలికాలంలో శరీరాన్ని వెచ్చగా ఉంచే ఆవాల చట్నీ..ఇడ్లీ, దోశల్లోకి సూపర్.. ఆరోగ్యానికి ఎంతో మేలు

తయారీ విధానం

-ముందుగా 4 ఎండుమిరపకాయలను కొద్దిసేపు నీటిలో నానబెట్టుకోవాలి.

-తర్వాత రోట్లో 1 టేబుల్ స్పూన్ ధనియాలు వేసి మెత్తగా నూరుకోవాలి. తర్వాత ఇందులోనే నానబెట్టుకున్న 4 ఎండుమిరపకాయలు, రుచికి సరిపడా ఉప్పు, పొట్టు తీసిన 4 వెల్లుల్లి రెబ్బలు వేసి మెత్తగా దంచుకోవాలి.

-ఇప్పుడు అందులోనే 1 పెద్ద ఉల్లిపాయను పెద్ద ముక్కలుగా చేసి వేయండి. కొత్తిమీర, కొద్దిగా పెరుగు, సరిపడా కారం, కొద్దిగా పసుపు కూడా వేసి మొత్తాన్ని మెత్తగా చిదిమినట్లుగా నూరుకోండి.

-ఇప్పుడు చట్నీకి తాలింపు కోసం స్టవ్ మీద బాండీ పెట్టుకోండి. అందులో తాలింపుకి సరిపడా నూనె వేసి వేడయ్యాక అందులో కొద్దిగా ఆవాలు వేసి చిటపటలాడనివ్వాలి. తర్వాత రోట్లో ఉన్న చట్నీ మొత్తాన్ని స్టవ్ మీద ఉన్న బాండీలో వేసి 2 నిమిషాల పాటు సన్నని సెగ మీద వేయించి స్టవ్ ఆపేయండి.

-అంతే సూపర్ టేస్టీ ఉల్లిపాయ కారం రెడీ. వేడి అన్నంలో దీన్ని కలుపుకుని తింటుంటే స్వర్గమే.