చపాతీ, రోటీలోకి అదిరిపోయే ధాబా స్టైల్ ఆలూ పాలక్..ఈ ఒక్క కూరతో ఇల్లంతా కమ్మని వాసన

చల్లని సాయంత్రం వేళ హైవే పక్కన ధాబాలో పొగలు కక్కే తందూరీ రోటీతో వేడివేడి కూర తింటుంటే ఆ అనుభూతే వేరు. అలాంటి అద్భుతమైన రుచిని మీ ఇంటికే తీసుకువచ్చే వంటకం ధాబా స్టైల్ ఆలూ పాలక్. పాలకూరలోని పోషకాలు, బంగాళాదుంపలోని మెత్తదనం, పంజాబీ మసాలాల ఘుమఘుమలు కలిసి ఈ వంటకానికి ఒక ప్రత్యేకమైన స్థానాన్ని అందిస్తాయి.

దీనిని చపాతీ, నాన్, పుల్కా లేదా జీరా రైస్‌ తో తింటుంటే, ఆ రుచి మాటల్లో వర్ణించలేం. ఇది ఆరోగ్యానికి కూడా ఎంతో మేలు చేస్తుంది. పాలకూరలో ఉండే ఐరన్, విటమిన్లు మన ఆరోగ్యానికి బలాన్నిస్తే, బంగాళాదుంపలు శక్తిని అందిస్తాయి. ధాబా స్టైల్ ఆలూ పాలక్ ఇంట్లోనే ఎలా తయారు చేయాలో ఇక్కడ చూడండి.

కావలసిన పదార్థాలు
బంగాళాదుంపలు: 3
పాలకూర: 2 పెద్ద కట్టలు
ఉల్లిపాయలు: 2
టమోటాలు: 2
అల్లం వెల్లుల్లి పేస్ట్: 1 టేబుల్ స్పూన్
పచ్చిమిర్చి: 2
జీలకర్ర: 1 టీస్పూన్
పసుపు: అర టీస్పూన్
కారం: 1 టేబుల్ స్పూన్
ధనియాల పొడి: 1 టేబుల్ స్పూన్
గరం మసాలా: అర టీస్పూన్
తాజా క్రీమ్ లేదా వెన్న: 1 టేబుల్ స్పూన్
ఉప్పు: రుచికి సరిపడా
నూనె: 3 టేబుల్ స్పూన్లు

తయారీ విధానం

-ముందుగా పాలకూరను శుభ్రంగా కడిగి వేడి నీటిలో కేవలం 2 నిమిషాలు ఉంచి వెంటనే తీసి చల్లటి నీటిలో వేయండి. చల్లారిన తర్వాత, మిక్సీలో వేసి మెత్తని పేస్ట్‌ లా గ్రైండ్ చేసి పక్కన పెట్టుకోండి.

-ఇప్పుడు స్టవ్ మీద ఒక లోతైన పాన్ పెట్టి అందులో నూనె వేసి వేడి చేయండి. నూనె వేడెక్కాక జీలకర్ర వేసి చిటపటలాడనివ్వండి. ఆ తర్వాత సన్నగా తరిగిన ఉల్లిపాయ ముక్కలు, పచ్చిమిర్చి వేసి బంగారు రంగులోకి మారి, మంచి సువాసన వచ్చేంత వరకు బాగా వేయించాలి.

-ఉల్లిపాయలు వేగిన తర్వాత అల్లం వెల్లుల్లి పేస్ట్ వేసి పచ్చి వాసన పోయే వరకు ఒక నిమిషం పాటు వేయించండి. ఇప్పుడు టమోటా ప్యూరీని వేసి మిశ్రమం నుండి నూనె నెమ్మదిగా పైకి తేలేంత వరకు తక్కువ మంట మీద ఉడికించాలి. ఆ తర్వాత పసుపు, కారం, ధనియాల పొడి, రుచికి సరిపడా ఉప్పు వేసి బాగా కలపండి. మసాలాలు మాడిపోకుండా ఒకటి రెండు నిమిషాలు వేయించాలి.

-ఇప్పుడు ముందుగా సిద్ధం చేసుకున్న పాలకూర పేస్ట్‌ ను ఈ మసాలాలో వేసి అంతా కలిసేలా బాగా కలపండి. ఐదు నిమిషాల పాటు తక్కువ మంట మీద ఉడికించాలి.

-గ్రేవీ చక్కగా ఉడికిన తర్వాత ఉడికించి పెట్టుకున్న బంగాళాదుంప ముక్కలను అందులో వేయాలి. గ్రేవీ ముక్కలకు పట్టేలా నెమ్మదిగా కలపండి. మూతపెట్టి 5-7 నిమిషాల పాటు మగ్గనివ్వండి.

-చివర అందులోగా గరం మసాలా, ఫ్రెష్ క్రీమ్ లేదా వెన్న వేసి మెల్లగా కలిపి ఒక్క నిమిషం ఉంచి స్టవ్ ఆఫ్ చేయండి. అంతే నోరూరించే ధాబా స్టైల్ ఆలూ పాలక్ గ్రేవీ రెడీ.