ఇంట్లో బ్రెడ్ మిగిలిపోయిందా? అయితే పడేయకుండా ఇలా రుచికరమైన బ్రెడ్ ఉప్మా చేసేయండి!

ఉదయం నిద్ర లేవగానే ఈ రోజు అల్పాహారం ఏం చేయాలి? అనే ప్రశ్న ప్రతి ఇంట్లోనూ వినిపిస్తూ ఉంటుంది. ఉరుకులు పరుగుల జీవితంలో, ముఖ్యంగా ఉదయం పూట సమయం తక్కువగా ఉన్నప్పుడు అందరికీ వెంటనే గుర్తొచ్చేది సులభంగా, త్వరగా పూర్తయ్యే వంటకం. అలాంటి సమయంలో అద్భుతమైన రుచితో, చిటికెలో తయారయ్యే వంటకమే బ్రెడ్ ఉప్మా. ఇంట్లో మిగిలిపోయిన బ్రెడ్ ఉందా? అయితే దాన్ని పడేయాల్సిన అవసరం లేదు. దాంతో ఎంతో అద్భుతమైన, నోరూరించే బ్రెడ్ ఉప్మాను తయారు చేయవచ్చు.

ఇది సమయాన్ని ఆదా చేయడమే కాకుండా, కడుపు నింపే ఆరోగ్యకరమైన బ్రేక్ ఫాస్ట్ గా కూడా ఉపయోగపడుతుంది. ఉల్లిపాయలు, టమోటాలు, కమ్మని మసాలాల కలయికతో తయారయ్యే ఈ ఉప్మాను పిల్లల నుండి పెద్దల వరకు అందరూ ఇష్టంగా తింటారు. మీకిష్టమైన కూరగాయలను జోడించి దీనిని మరింత పోషకభరితంగా కూడా మార్చుకోవచ్చు. ఈ కమ్మని బ్రెడ్ ఉప్మా తయారీకి కావలసిన పదార్థాలు, తయారీ విధానం ఇక్కడ చూడండి.

బ్రెడ్ ఉప్మా తయారీకి కావలసిన పదార్థాలు

బ్రెడ్ ముక్కలు (స్లైసెస్) -6
ఉల్లిపాయ - 1
టమోటా - 1
పచ్చిమిరపకాయలు - 2
కరివేపాకు - 10 ఆకులు
ఆవాలు - అర టీస్పూన్
పసుపు - పావు టీస్పూన్
ఉప్పు - మీ రుచికి తగినంత
వంట నూనె - 2 టీస్పూన్లు
నిమ్మరసం - 1 టీస్పూన్
పచ్చి కొత్తిమీర - కొద్దిగా

నోరూరించే బ్రెడ్ ఉప్మా తయారీ విధానం

-ముందుగా బ్రెడ్ స్లైస్‌ లను తీసుకుని, వాటిని చిన్న చిన్న చదరపు ముక్కలుగా (క్యూబ్స్ లాగా) కత్తిరించి ఒక ప్లేట్‌ లో పక్కన పెట్టుకోండి.

-ఇప్పుడు స్టవ్ వెలిగించి ఒక పాన్ పెట్టి, అందులో రెండు టీస్పూన్ల నూనె వేడి చేయండి. నూనె కాస్త వేడెక్కాక ఆవాలు వేయండి. అవి చిటపటలాడుతూ చక్కటి సువాసన వస్తున్నప్పుడు, తాజా కరివేపాకు, పచ్చిమిరపకాయలు వేసి వేయించండి. ఆ తర్వాత సన్నగా తరిగి పెట్టుకున్న ఉల్లిపాయ ముక్కలను వేసి, అవి లేత బంగారు రంగు వచ్చే వరకు దోరగా వేయించాలి.

-ఉల్లిపాయలు వేగిన తర్వాత, టమోటా ముక్కలను వేయండి. టమోటాలు బాగా మగ్గి, గుజ్జులా మెత్తబడే వరకు ఉడికించండి. ఈ ఉల్లి-టమోటా మిశ్రమంలో పావు టీస్పూన్ పసుపు, రుచికి సరిపడా ఉప్పు వేసి బాగా కలుపుకోవాలి.

-ఇప్పుడు ముందుగా కత్తిరించి పెట్టుకున్న బ్రెడ్ ముక్కలను పాన్ లో వేయండి. మసాలా మిశ్రమం బ్రెడ్ ముక్కలకు ప్రతి వైపునా బాగా పట్టేలా గరిటెతో నిదానంగా కలపండి. మంటను బాగా తగ్గించి మసాలాల రుచి బ్రెడ్ కు పట్టేలా 2-3 నిమిషాల పాటు మూతపెట్టి ఉడికించండి.

-చివరగా స్టవ్ ఆఫ్ చేసి, ఉప్మా పైన ఒక టీస్పూన్ నిమ్మరసం చల్లి బాగా కలపండి. సన్నగా తరిగిన పచ్చి కొత్తిమీరతో అందంగా అలంకరించుకోండి.

-దీనికి మరింత రుచిని జోడించాలనుకుంటే వేయించిన పల్లీలు (వేరుశెనగ గుళ్లు) లేదా క్యారెట్, బఠానీ లాంటి కూరగాయలను కూడా వాడుకోవచ్చు.

-అంతే వేడి వేడి, రుచికరమైన బ్రెడ్ ఉప్మా రెడీ. ఉదయం బ్రేక్‌ ఫాస్ట్‌ గా లేదా సాయంత్రం స్నాక్‌ గా టీతో పాటు తీసుకుంటే దీని రుచి అమోఘంగా ఉంటుంది