బ్రౌన్ రైస్ దోశ.. దీంతో బ్రౌన్ రైస్ అంటే బోర్ కొట్టదు..!!

దోశకు చాలా పెద్ద చరిత్రే ఉంది. రుగ్వేద కాలం నుంచే దోశలు ఉన్నాయంటే మీరు నమ్ముతారా. అప్పటి నుంచి ఇప్పటి వరకు ఎన్నో రకాల దోశలు వచ్చాయ్. దోశలను ఎక్కువగా మన దక్షిణ భారతదేశంలోనే చేసుకుంటాం. అయితే ఈ దోశలను బ్రౌన్ రైస్‌తో వేసుకుంటే ఎలా ఉంటుందో టేస్ట్ చేశారు. బ్రౌన్ రైస్‌ను షుగర్ పేషెంట్లు, బీపీ పేషెంట్లు ఎక్కువగా తీసుకుంటారు. కానీ ఈ బ్రౌన్ రైస్‌తో దోశలు చేసుకుంటే పోషకాలతో పాటు టేస్ట్ కూడా చాలా బాగుంటుంది. మరి ఈ బ్రౌన్ రైస్ దోశను ఎలా తయారు చేసుకోవాలో తెలుసుకుందాం.

బ్రౌన్ రైస్ దోశ తయారు చేయడానికి కావాల్సిన వంట పదార్ధాలు ఇవే

బ్రౌన్ రైస్ - 1 కప్పు
ఉల్లిపాయ - 1 (బాగా తరిగి పెట్టుకోవాలి)
పచ్చి మినప్పప్పు - 1/2 కప్పు
మెంతి గింజలు - 1/2 టీస్పూన్
నూనె - అవసరమైనంత
ఉప్పు - రుచికి తగినంత
పచ్చిమిర్చి - 2
అల్లం - 1 అంగుళం ముక్క

బ్రౌన్ రైస్ దోశ తయారు చేసుకునే విధానం :

1. ముందుగా బ్రౌన్ రైస్, పచ్చి మినప్పప్పును శుభ్రంగా కడిగి, వాటిని నీళ్లలో 6-8 గంటలు రాత్రంతా నానబెట్టాలి. అలాగే, మెంతి గింజలను కూడా నానబెట్టుకోవాలి.

2. మిర్చి, అల్లంను చిన్న ముక్కలుగా తరిగి పక్కన పెట్టుకోవాలి.
నానబెట్టిన తరువాత, రైస్, పప్పు, మెంతి గింజలు, పచ్చిమిర్చి, అల్లంను మిక్సీ గ్రైండర్ లేదా బ్లెండర్‌లో వేసి, తగినంత నీళ్లు పోసి, మెత్తగా రుబ్బుకోవాలి.

3. కలుపుకున్న పిండి గట్టిగా కాకుండా, మరీ పలుచగా కాకుండా దోశలు వేసుకునే విధంగా కలుపుకోవాలి. పిండిని బౌల్‌లో తీసుకొని అందులో తగినంత ఉప్పు వేసుకోవాలి. ఒక గంట పాటు ఈ పిండిని పక్కన పెడితే కొంచెం పొంగుకొని వస్తుంది.

4. ప్యాన్ స్టవ్ పైన పెట్టుకొని నూనె రాసి వేడి అయిన తరువాత కలుపుకున్న పిండితో దోశలు వేసుకోవాలి. దానిపై కొంచెం నూనె రాసి, రెండు వైపులా దోశను తిప్పుకోవాలి. దోశ రెండు వైపులా బాగా కాలేలా చూసుకోవాలి.

5. ఇలాగే పిండిని మొత్తం దోశలుగా వేసుకోవాలి. కొబ్బరి చట్నీ, లేదంటే అల్లం చట్నీతో ఈ దోశలను సర్వ్ చేసుకోవచ్చు. చాయ్‌తో నంచుకొని తింటే కూడా చాలా బాగుంటుంది. ఇది బ్రౌన్ రైస్‌తో చేసిన దోశలు కాబట్టి ఇందులో ప్రొటీన్, ఫైబర్, విటమిన్లు పుష్కలంగా ఉంటాయ్.