పాతకాలపు సూపర్ ఫుడ్..మునగాకు మసాలా రాగి కళి.. హీరో అర్జున్ సీక్రెట్ రెసిపీ

రాగి పిండి అనగానే మనకు వెంటనే గుర్తొచ్చేది రాగి జావ లేదా రాగి సంగటి. కానీ, ఎప్పుడైనా మునగాకు మసాలా రాగి కళి గురించి విన్నారా? రాగులలోని పుష్కలమైన కాల్షియం, మునగాకులోని ఐరన్ కలిస్తే... అది ఆరోగ్యానికి బ్రహ్మాస్త్రమే. హీరో అర్జున్ కూడా ఒక ఇంటర్వ్యూలో తాను రాగి కళి తినేందుకు ఇష్టపడతానని చెప్పారు.

మునగాకు రాగి కళి తయారీకి కావలసిన పదార్థాలు

రాగి పిండి - 1 కప్పు
నీళ్లు - 2 కప్పులు (1:2 నిష్పత్తిలో)
ఆవాలు - అర టీస్పూన్
పచ్చి శనగపప్పు - 1 టేబుల్ స్పూన్
ఎండు మిర్చి - 3 లేదా 4
ఉల్లిపాయలు - 1 (సన్నగా తరిగినవి)
మునగాకు - 1 కప్పు (లేత ఆకులను శుభ్రం చేసుకున్నవి)
ఉప్పు - రుచికి సరిపడా
నూనె లేదా నెయ్యి - 2 టేబుల్ స్పూన్లు

మునగాకు రాగి కళి తయారీ విధానం

-ముందుగా స్టవ్ వెలిగించి ఒక కడాయిలో కొద్దిగా నూనె లేదా నెయ్యి వేడి చేయండి. అందులో ఆవాలు వేసి చిటపటలాడాక, పచ్చి శనగపప్పు, ఎండు మిర్చి వేసి దోరగా వేయించండి. ఆ తాలింపు కమ్మటి వాసన వస్తున్నప్పుడు, సన్నగా తరిగిన ఉల్లిపాయ ముక్కలు వేసి పారదర్శకంగా మారేంతవరకు వేయించాలి.

-ఇప్పుడు శుభ్రం చేసి పెట్టుకున్న లేత మునగాకును అందులో వేసి, ఆకులోని పచ్చివాసన పోయి మెత్తబడే వరకు సన్నని మంటపై మగ్గనివ్వాలి.

-మరొక మందపాటి గిన్నె తీసుకుని, అందులో 2 కప్పుల నీళ్లు పోసి బాగా మరగబెట్టాలి. నీళ్లు బుడగలు వస్తూ మరుగుతున్నప్పుడు అందులో మీ రుచికి సరిపడా ఉప్పు వేయాలి. ఇప్పుడు అసలైన ఘట్టం.. స్టవ్ మంటను పూర్తిగా సిమ్ లో పెట్టి, 1 కప్పు రాగి పిండిని మెల్లగా పోస్తూ, ఉండలు కట్టకుండా ఒక చెక్క గరిటెతో వేగంగా తిప్పాలి.

-రాగి పిండి నీళ్లను పీల్చుకుని మెత్తటి ముద్దలా దగ్గర పడుతున్నప్పుడు, ముందుగా వేయించి పెట్టుకున్న మునగాకు మసాలా తాలింపు మిశ్రమాన్ని ఈ రాగి కళిలో వేసి బాగా కలపాలి. రాగి పిండి, మునగాకు, ఉల్లిపాయల రుచులన్నీ కలిసిపోయి ఒక అద్భుతమైన మిశ్రమంగా తయారవుతుంది. స్టవ్ ఆఫ్ చేసి కాస్త చల్లారాక చేతికి నెయ్యి రాసుకుని గుండ్రటి ముద్దలుగా చుట్టుకోవాలి.

-మునగాకు మసాలా రాగి కళి రెడీ. దీనిలో ఇప్పటికే మసాలా తాలింపు ఉంది కాబట్టి విడిగా కూర లేకపోయినా అలాగే తినేయవచ్చు. కానీ కాస్త కమ్మటి నెయ్యి వేసుకుని, పల్లి చట్నీతో గానీ లేదా ఘాటైన నాటుకోడి పులుసుతో గానీ తింటే ఆ రుచికి ఫిదా అవ్వాల్సిందే.

మునగాకు రాగి కళి పోషక విలువలు

తృణధాన్యాలన్నింటిలోకెల్లా రాగుల్లో అత్యధికంగా కాల్షియం (100 గ్రాములకు సుమారు 344 మి.గ్రా) ఉంటుంది. అలాగే డైటరీ ఫైబర్, ప్రోటీన్లు, ఐరన్, శరీరానికి అవసరమైన అమైనో యాసిడ్స్ పుష్కలంగా ఉంటాయి.

మునగాకును మల్టీ విటమిన్ ట్రీ అంటారు. ఇందులో పాలలో కంటే ఎక్కువ కాల్షియం, క్యారెట్లలో కంటే ఎక్కువ విటమిన్-ఏ, అరటిపండ్లలో కంటే ఎక్కువ పొటాషియం, నారింజలో కంటే ఎక్కువ విటమిన్-సి, పాలకూరలో కంటే ఎక్కువ ఐరన్ ఉంటాయి. శక్తివంతమైన యాంటీ ఆక్సిడెంట్లు ఇందులో ఉన్నాయి.

ఆరోగ్య ప్రయోజనాలు

-రాగులు, మునగాకు రెండింటిలోనూ కాల్షియం అపారంగా ఉంటుంది. ఎదిగే పిల్లలకు ఇది తినిపిస్తే వారి ఎముకలు, దంతాలు అత్యంత దృఢంగా మారతాయి. వయసు పైబడిన వారిలో వచ్చే ఆస్టియోపోరోసిస్, కీళ్ల నొప్పుల సమస్యలను ఇది అద్భుతంగా నివారిస్తుంది.

-రాగులలో గ్లైసెమిక్ ఇండెక్స్ (GI) చాలా తక్కువ. దీనికి తోడు మునగాకు, రాగులలో ఫైబర్ (పీచు పదార్థం) ఎక్కువగా ఉండటం వల్ల, ఇది తిన్న తర్వాత రక్తంలో చక్కెర స్థాయిలు అకస్మాత్తుగా పెరగవు. గ్లూకోజ్ నెమ్మదిగా రక్తంలో కలుస్తుంది. కాబట్టి షుగర్ పేషెంట్లకు ఇది బెస్ట్ ఫుడ్.