ప్రోటీన్ రిచ్ బ్రేక్‌ ఫాస్ట్: బయట స్పాంజ్, లోపల ఘాటు..నోరూరించే పనీర్ చిల్లీ ఇడ్లీ ఎలా చేసుకోవాలంటే..

రోజూ తినే పోహా, పరాఠా, ఉప్మా లేదా సాదా ఇడ్లీలు తిని మీకు, మీ కుటుంబ సభ్యులకు బాగా విసుగు వచ్చిందా? రొటీన్‌ కు భిన్నంగా ఏదైనా కొత్తగా, రుచికరంగా ఎందుకు ప్రయత్నించాలని ఉందా? అయితే సౌత్ ఇండియన్, ఇండో-చైనీస్ రుచుల కలయికతో అద్భుతమైన పనీర్ చిల్లీ స్టఫ్డ్ ఇడ్లీని ట్రై చేయండి.

ఇందులో ఉపయోగించే పనీర్, క్యాప్సికమ్ వల్ల ఇది నోటికి రుచిని మాత్రమే కాకుండా, శరీరానికి అవసరమైన ప్రోటీన్‌ ను కూడా పుష్కలంగా అందిస్తుంది. బయట చూసేందుకు తెల్లగా మెత్తగా ఉండే ఇడ్లీ.. లోపల ఘాటైన పనీర్ చిల్లీ రుచితో అద్భుతంగా ఉంటుంది. పిల్లల లంచ్ బాక్స్‌ కు, ఉదయం బ్రేక్‌ఫాస్ట్‌ కు ఇది పర్ఫెక్ట్ ఛాయిస్.

పనీర్ చిల్లీ స్టఫ్డ్ ఇడ్లీ తయారీకి కావలసిన పదార్థాలు

నూనె - 1 టేబుల్ స్పూన్
సన్నగా తరిగిన వెల్లుల్లి, అల్లం - చెరో 1 టేబుల్ స్పూన్
పచ్చిమిర్చి తరుగు - 1 టేబుల్ స్పూన్
ఉల్లిపాయ, క్యాప్సికమ్ ముక్కలు - చెరో అర కప్పు
సోయా సాస్, రెడ్ చిల్లీ సాస్ - చెరో 1 టేబుల్ స్పూన్
వెనిగర్ - 1 టీ స్పూన్
నల్ల మిరియాల పొడి - ఒక చిటికెడు
ఉప్పు - రుచికి సరిపడా
పనీర్ ముక్కలు - అర కప్పు
ఉల్లికాడలు (స్ప్రింగ్ ఆనియన్స్) - 1 టేబుల్ స్పూన్
ఇడ్లీ పిండి తయారీ కోసం:
బొంబాయి రవ్వ (సూజీ) - 1 కప్పు
పెరుగు - 1 కప్పు
నీళ్లు - ముప్పావు కప్పు
ఉప్పు - రుచికి తగినంత
ఫ్రూట్ సాల్ట్ (ఈనో లాంటిది) - 1 టీస్పూన్

తెల్ల ఇడ్లీ కాదు..అసలైన శక్తి ఉన్న నల్ల ఇడ్లీ ఎలా చేసుకోవాలంటే..

పనీర్ చిల్లీ స్టఫ్డ్ ఇడ్లీ తయారీ విధానం

-ముందుగా ఒక పెద్ద మిక్సింగ్ బౌల్ తీసుకుని అందులో బొంబాయి రవ్వ, రుచికి సరిపడా ఉప్పు, పెరుగు వేసి ఉండలు లేకుండా బాగా కలుపుకోవాలి. రవ్వ, పెరుగును పీల్చుకునేందుకు ఈ మిశ్రమాన్ని కనీసం 30 నిమిషాల పాటు మూతపెట్టి పక్కన ఉంచాలి.

-అరగంట తర్వాత, పిండి కాస్త గట్టిపడుతుంది కాబట్టి, కొద్దికొద్దిగా నీళ్లు పోస్తూ ఇడ్లీ పిండి జారుగా వచ్చేలా గిలకొట్టి మరో 15 నిమిషాలు వదిలేయండి. ఇడ్లీలను ఉడికించే ముందు మాత్రమే ఫ్రూట్ సాల్ట్ కలపాలి. దీనివల్ల ఇడ్లీలు మెత్తగా, స్పాంజ్ లాగా వస్తాయి.

-ఇప్పుడు స్టవ్ వెలిగించి ఒక బాండీలో నూనె వేడి చేయాలి. అందులో సన్నగా తరిగిన అల్లం, వెల్లుల్లి, పచ్చిమిర్చి వేసి పచ్చివాసన పోయేంతవరకు 1-2 నిమిషాలు వేయించాలి. ఆ తర్వాత ఉల్లిపాయ, క్యాప్సికమ్ ముక్కలు వేసి మరో 2 నిమిషాలు వేయించాలి.

-ఇప్పుడు సోయా సాస్, రెడ్ చిల్లీ సాస్, వెనిగర్, ఉప్పు, మిరియాల పొడి వేసి ఒక నిమిషం పాటు ఎక్కువ మంట మీద కలుపుతూ వేయించాలి. చివరగా పనీర్ ముక్కలు వేసి మసాలా అంతా పనీర్‌ కు పట్టేలా నెమ్మదిగా కలపాలి. దించే ముందు తాజాగా తరిగిన ఉల్లికాడలు చల్లుకుంటే ఎంతో గుమగుమలాడే పనీర్ చిల్లీ స్టఫింగ్ రెడీ.

-ఇప్పుడు ఇడ్లీ అచ్చులకు కొద్దిగా నూనె లేదా నెయ్యి రాయండి. ప్రతి ఇడ్లీ గుంటలో సగం వరకు మాత్రమే రవ్వ పిండిని నింపండి. ఇప్పుడు ముందుగా సిద్ధం చేసుకున్న పనీర్ చిల్లీ మిశ్రమాన్ని కొద్దిగా తీసుకుని, పిండి మధ్యలో ఉంచండి. ఆ తర్వాత స్టఫింగ్ కనపడకుండా పైన మిగిలిన సగాన్ని పిండితో కవర్ చేయండి.

-ఇడ్లీ పాత్రను స్టవ్ మీద పెట్టి, కనీసం 7 నుండి 8 నిమిషాల పాటు ఆవిరి మీద ఉడికించండి. ఇడ్లీలు ఉడికాయో లేదో తెలుసుకోవడానికి ఒక టూత్‌ పిక్‌ తో గుచ్చి చూడండి. దానికి పిండి అంటుకోకుండా శుభ్రంగా బయటకు వస్తే మీ ఇడ్లీలు పర్ఫెక్ట్‌గా ఉడికినట్లే.

-అంతే పనీర్ చిల్లీ స్టఫ్డ్ ఇడ్లీలు రెడీ.