రెస్టారెంట్ స్టైల్ పనీర్ భుర్జీ మసాలా గ్రేవీ.. ఇంట్లోనే ఇలా ఈజీగా చేసుకోండి!

రోజూ ఇంట్లో ఉదయం అల్పాహారంగానో లేదా రాత్రి భోజనంగానో చపాతీలు, పూరీలు చేసుకోవడం మనందరికీ అలవాటే. అయితే వాటిల్లోకి రొటీన్‌ గా తినే ఆలు కుర్మా, వెజిటబుల్ కర్రీ లేదా సాధారణ పప్పు లాంటివి కాకుండా ఏదైనా కొత్తగా, ఎంతో రుచిగా చేయాలని ఆలోచిస్తున్నారా?

మీ కుటుంబ సభ్యులకు, ముఖ్యంగా ఇంట్లోని పిల్లలకు పనీర్ అంటే ఇష్టమా? అయితే ఈ సారి చపాతీలోకి అద్భుతమైన రుచినిచ్చే పనీర్ భుర్జీ మసాలా గ్రేవీని తప్పకుండా ట్రై చేయండి. పనీర్ భుర్జీ మసాలా కేవలం చపాతీ, పూరీలకే కాకుండా.. నాన్, పరాఠా, పుల్కాలతో కూడా తింటే అమృతంలా ఉంటుంది. దీనిని ఎలా తయారుచేసుకోవాలో ఇక్కడ చూడండి.

కావలసిన పదార్థాలు

నూనె - 2 టేబుల్ స్పూన్లు
వెన్న (బటర్) - 1 టేబుల్ స్పూన్
జీలకర్ర - 1 టేబుల్ స్పూన్
ఉల్లిపాయ - 1
అల్లం వెల్లుల్లి పేస్ట్ - 1 టేబుల్ స్పూన్
పసుపు పొడి - పావు టీస్పూన్
కారం పొడి - 1 టేబుల్ స్పూన్
జీలకర్ర పొడి - అర టీస్పూన్
ధనియాల పొడి - 1 టీస్పూన్
శనగపిండి - 1 టేబుల్ స్పూన్
ఉప్పు - మీ రుచికి తగినంత
టమాటాలు - 3
క్యాప్సికమ్ - సగం
నీళ్లు - 1 కప్పు
తురిమిన పనీర్ - 200 గ్రాములు
గరం మసాలా పొడి - అర టీస్పూన్
కసూరి మేతి - 1 టేబుల్ స్పూన్
కొత్తిమీర - 2 టేబుల్ స్పూన్లు

అతిథులను ఆశ్చర్యపరిచే అద్భుతమైన దీపావళి స్వీట్..ఈజీగా ఎలా చేసుకోవాలంటే..

తయారీ విధానం

-ముందుగా స్టవ్ వెలిగించి ఒక మందపాటి కడాయి లేదా బాండీ పెట్టుకోండి. అందులో 2 టేబుల్ స్పూన్ల నూనెతో పాటు 1 టేబుల్ స్పూన్ వెన్న వేసి వేడి చేయండి. వెన్న పూర్తిగా కరిగాక 1 టేబుల్ స్పూన్ జీలకర్ర వేయండి. జీలకర్ర నుండి చక్కటి సువాసన వస్తూ చిటపటలాడే వరకు వేయించాలి.

-ఇప్పుడు అందులో సన్నగా తరిగి పెట్టుకున్న ఉల్లిపాయ ముక్కలు, 1 టేబుల్ స్పూన్ అల్లం-వెల్లుల్లి పేస్ట్ వేసి కలపాలి. ఉల్లిపాయలు పచ్చివాసన పోయి, చక్కటి లేత బంగారు గోధుమ రంగులోకి మారేంత వరకు మీడియం మంటపై దోరగా ఫ్రై చేసుకోండి.

-ఆ తర్వాత స్టవ్‌ ను మీడియం మంట మీదే ఉంచి.. పావు టీస్పూన్ పసుపు, ఒక టేబుల్ స్పూన్ కారం, అర టీస్పూన్ జీలకర్ర పొడి, ఒక టీస్పూన్ ధనియాల పొడి, అలాగే మీ రుచికి సరిపడా ఉప్పు వేసి బాగా కలుపుకోవాలి. ఇందులోనే ఒక టేబుల్ స్పూన్ శనగపిండి కూడా వేసి, మసాలాల పచ్చి వాసన పోయేలా వేయించాలి. ఈ శనగపిండి వల్లే గ్రేవీకి మంచి చిక్కదనం, అద్భుతమైన రుచి వస్తాయి.

-మసాలాలు వేగిన తర్వాత, సన్నగా తరిగిన 3 టమాటా ముక్కలు వేసి బాగా కలియబెట్టాలి. టమాటాలు మెత్తగా మగ్గిపోయి నూనె పైకి తేలే వరకు ఉడికించాలి. ఆ తర్వాత తరిగి పెట్టుకున్న సగం క్యాప్సికమ్ ముక్కలను కూడా వేసి మరో నిమిషం పాటు వేయించుకోండి.

-ఇప్పుడు గ్రేవీకి తగినట్లుగా ఒక కప్పు నీళ్లు పోసి మసాలాను బాగా కలుపుకోవాలి. నీళ్లు మరగడం ప్రారంభించగానే, తురిమి పెట్టుకున్న 200 గ్రాముల పనీర్‌ ను ఇందులో వేసి నెమ్మదిగా కలపాలి. ఇప్పుడు దీనిపై మూత పెట్టి, మీడియం మంట మీద సరిగ్గా రెండు నిమిషాలు ఉడికించండి. చివరగా అర టీస్పూన్ గరం మసాలా, చేతితో కాస్త నలిపిన కసూరి మేతి, సన్నగా తరిగిన తాజా కొత్తిమీర ఆకులను చల్లి కూరను బాగా కలపండి. స్టవ్ ఆఫ్ చేసుకుంటే చాలు ఘుమఘుమలాడే పనీర్ భుర్జీ మసాలా గ్రేవీ రెడీ.

-ఈ వేడి వేడి పనీర్ భుర్జీని చపాతీలు, పూరీలు లేదా పుల్కాలతో వడ్డించి చూడండి. మీ ఇంట్లో అందరూ ఈ రుచికి వంద శాతం ఫిదా అవ్వడం ఖాయం.