శరవణ భవన్ స్టైల్ వైట్ చట్నీ..ఇంట్లోనే ఎలా చేసుకోవాలంటే..

తెలుగు వారి ఇళ్లలో ఉదయం బ్రేక్‌ ఫాస్ట్ లోకి చాలా ఇళ్లలో రోజువారీగా పల్లీల చట్నీయో లేదా పుట్నాల చట్నీయో చేస్తుంటారు. రోజు అదే రుచిని తిని మీకు బోర్ కొట్టిందా? ఏదైనా కొత్త రుచిని కోరుకుంటున్నారా? అయితే ప్రపంచవ్యాప్తంగా ప్రసిద్ధి చెందిన శరవణ భవన్ స్టైల్ చట్నీని ఇంట్లో ట్రై చేయండి.

శరవణ భవన్ హోటల్స్ లో దొరికే ఇడ్లీ, దోసెల రుచి ఎంత బాగుంటుందో వాటితో పాటు వడ్డించే ఆ తెల్లటి కొబ్బరి చట్నీ రుచి అంతకంటే అద్భుతంగా ఉంటుంది. మన ఇంట్లో చేసే చట్నీకి, హోటల్ చట్నీకి ప్రధాన తేడా దాని రంగు, క్రీమీ టెక్చర్.

సాధారణంగా మనం చట్నీలో పల్లీలు లేదా పుట్నాలు ఎక్కువగా వాడుతాం. శరవణ భవన్ వారి తెల్లటి చట్నీ సీక్రెట్ వేరే ఉంది.. అదే జీడిపప్పు. ఈ చట్నీలో జీడిపప్పు వాడటం వల్ల దానికి మంచి రుచి, చిక్కదనం, ఆకర్షణీయమైన తెల్లటి రంగు వస్తుంది. మీ ఇంట్లో అందరినీ ఆకట్టుకునేలా ఈ స్పెషల్ చట్నీని ఎలా తయారు చేయాలో ఇక్కడ చూడండి.

కావలసిన పదార్థాలు
తాజా కొబ్బరి తురుము - అర కప్పు
పచ్చిమిర్చి - 1-2
జీడిపప్పు - 4 పలుకులు
చింతపండు - చిన్న చిటికెడు
ఉప్పు - రుచికి సరిపడా
నీరు - తగినంత
తాలింపు కోసం:
నూనె - 1 టేబుల్ స్పూన్
ఆవాలు - పావు టీస్పూన్
మినపప్పు - పావు టీస్పూన్
శనగపప్పు - పావు టీస్పూన్
ఎండుమిర్చి - 1
కరివేపాకు - ఒక రెమ్మ

తయారీ విధానం

-ఒక మిక్సీ జార్ లో తాజా కొబ్బరి తురుము, పచ్చిమిర్చి, ఉప్పు, జీడిపప్పులను వేయండి. ముందుగా నీళ్లు పోయకుండా ఒకసారి మిక్సీ పట్టండి. తర్వాత అందులో కొద్దిగా చింతపండు, తగినంత నీళ్లు పోసి మెత్తగా పేస్ట్‌ లా రుబ్బుకోవాలి. కాస్త చిక్కగా ఉండేలా చూసుకోండి. ఈ మిశ్రమాన్ని ఒక గిన్నెలోకి తీసుకోండి.

-ఇప్పుడు స్టవ్ వెలిగించి ఒక చిన్న కడాయి పెట్టి నూనె వేయండి. నూనె వేడెక్కాక ఆవాలు వేయండి, అవి చిటపటలాడాక మినపప్పు, శనగపప్పు వేసి దోరగా వేయించాలి. పప్పులు బంగారు రంగులోకి మారాక, ఎండుమిర్చి తుంచి వేయండి. చివరగా కరివేపాకు వేసి స్టవ్ ఆపేయండి.

-వేడివేడి తాలింపును గిన్నెలో ఉన్న చట్నీపై వేసి బాగా కలపండి. అంతే ఘుమఘుమలాడే శరవణ భవన్ స్టైల్ వైట్ కోకోనట్ చట్నీ రెడీ.

-ఈ చట్నీని వేడి వేడి ఇడ్లీ, దోసె లేదా పొంగల్‌ తో వడ్డిస్తే మీ ఇంట్లో వాళ్ళు లొట్టలేసుకుంటూ తింటారు.