బీహారీ స్పెషల్ చోఖా..పొలం గట్టు మీద కూర్చొని ఈ పచ్చడి కలిపి అన్నం తింటుంటే స్వర్గమే!

రోజూ అవే పచ్చళ్లు, అవే చట్నీలు తిని తిని బోర్ కొట్టేసిందా? ఏం తిన్నా నోటికి రుచించట్లేదా? అయితే ఒక్కసారి చోఖా రుచి చూడాల్సిందే. చోఖా అంటే..నిప్పు మీద కాల్చిన వంకాయ, టమోటాలు, ఉడికించిన బంగాళాదుంపలు, ఆవ నూనె, సాధారణ సుగంధ ద్రవ్యాలను కలిపి మెత్తగా నూరి తయారుచేసే ఒక బీహారీ సాంప్రదాయ వంటకం.

స్మోకీ ప్లేవర్ తో, ఘాటుగా, పూర్తి రుచితో ఉండే చోఖా.. ఒక సాధారణ భోజనాన్ని కూడా అద్భుతంగా మార్చేయగల వంటకం. బీహారీ సంప్రదాయ వంటకం చోఖా మీ ఇంట్లోనే ఈజీగా ఎలా తయారుచేసుకోవాలో ఇక్కడ చూడండి.

చోఖా తయారీకి కావలసిన పదార్థాలు
-ఉడికించిన బంగాళాదుంపలు
-వంకాయలు
-టమోటాలు
-సన్నగా తరిగిన ఉల్లిపాయ
-సన్నగా తరిగిన వెల్లుల్లి
-తరిగిన పచ్చిమిర్చి
-ఎండుమిర్చి
-కొత్తిమీర
-ఉప్పు
-ఆవ నూనె

ఎక్స్ ట్రా చీజీ గార్లిక్ బ్రెడ్..తింటుంటే స్వర్గం కనబడుతుంది..ఎలా చేసుకోవాలంటే..

చోఖా తయారీ విధానం

-బంగాళాదుంపలను మెత్తబడే వరకు ఉడకబెట్టండి. వాటిని కొద్దిగా చల్లారనిచ్చి, తొక్క తీయండి.

-వంకాయ, టమోటాలను నేరుగా మంట మీద చక్కగా వేగి, పొగ వచ్చేంత వరకు కాల్చండి. వాటిని చల్లారనిచ్చి, ఆ తర్వాత మాడిన తొక్కను తీసివేయండి.

-ఒక మిక్సింగ్ బౌల్‌ లో, తొక్క తీసిన వంకాయలు, కాల్చిన టమోటాలు,ఉడికించిన బంగాళదుంపలను వేయండి. అన్నింటినీ కలిపి బాగా మెత్తగా చేయండి. తర్వాత ఇందులోనే సన్నగా తరిగిన ఉల్లిపాయ, వెల్లుల్లి, పచ్చిమిర్చి, తాజా కొత్తిమీర వేసి ఉప్పు కలపండి.

-ఇప్పుడు ఎండు మిరపకాయలను మంటపై కాల్చి, వాటిని నలిపి చోఖాలో కలపండి.
చివరగా కాస్త ఎక్కువగానే ఆవ నూనెను జల్లి, వాటన్నింటినీ బాగా కలపండి.

-అంతే చోఖా రెడీ. దీన్ని పరాఠా, పప్పు-అన్నం, ఖిచిడీ లేదా మీకు నచ్చిన ఇతర వంటకాలతో తింటే ఆహా ఏమి రుచిరా అనాల్సిందే.