క్యారెట్‌-ఓట్ మీల్ సూప్: వింటర్ స్పెషల్

వింటర్ లో చలి... గిలి... ముఖ్యంగా ఆహారం మీద ఆసక్తిని తగ్గిస్తుంది. వేడి వేడిగా ఏదైనా తినాలి, ఏదైనా తాగాలి అనిపస్తుంటుంది. అయితే సరిగ్గా ఆహారం తీసుకోక పోవటం వల్ల శరీరానికి తగిన పోషకాలు అందక, అనారోగ్యానికి గురయ్యే అవకాశం ఉంది. దీనికో చక్కని పరిష్కారం సూప్. వేడి వేడిగా ఓ కప్పు సూప్ తాగితే నీరసమూ ఎగిరపోతుంది. శరీరానికి కావలసిన పోషకాలూ అందుతాయి. సూప్ ఒత్తిడిని తొగించి హృదయాన్ని తేలికపరుస్తుంది. ఆహారాన్ని తీసుకోవాలనే ఆత్రుతను రేపుతుంది.

చలికాలంలో వేడి వేడిగా ఈ సూప్ భలే మజా ఇస్తుంది. ఈ సూప్ ను ఏ వేళలో( బ్రేక్ ఫాస్ట్, లంచ్, డిన్నర్) అయినా సరే తీసుకోవచ్చు. పిల్లలు పెద్దలు అమితంగా ఇష్టపడే ఈ క్యారెట్ మరియు ఓట్ మీల్ సూప్ బరువును తగ్గిస్తుంది. కొలెస్ట్రాల్ కంట్రోల్లో ఉంచుతుంది. మరి ఈ హెల్తీ వింటర్ సూప్ ఎలా తయారు చేయాలో చూద్దాం...

కావలసిన పదార్థాలు:
ఓట్‌‌స : 1/4cup
క్యారట్‌: 2
ఉల్లిపాయ : 1 చిన్నది
వెన్న : కొద్దిగా
ఉప్పు : రుచికి తగినంత
మిరియాలపొడి: చిటికెడు
కొత్తిమీర : కొద్దిగా

తయారీ విధానం:
1. ముందుగా క్యారట్‌ చెక్కు తీసి చిన్న ముక్కలుగా కట్‌ చేసుకోవాలి.
2. తర్వాత ఒక గిన్నెలో రెండు కప్పుల నీళ్లు పోసి, సన్నగా తరిగిన ఉల్లిపాయ ముక్కలు, క్యారెట్ ముక్కలు వేసి మెత్తబడేవరకు ఉడికించాలి.
3. తర్వాత స్టౌ ఆఫ్ చేసి, క్రిందికి దించి పెట్టుకోవాలి. చల్లారాక మిక్సీ జార్ లో వేసి గ్రైండ్‌ చేసుకుని వడకట్టుకోవాలి. ః
4. ఇప్పుడు పాన్ లో వెన్న వేడి చేసి ఓట్‌‌ మీట్ వేసి దోరగా వేయించాలి.
5. తర్వాత అందులోనే నీళ్ళు పోసి రెండు-మూడు నిమిషాలు మీడియం మంట మీద ఉడికించాలి.
6. ఓట్స్ ఉడికిన తర్వాత అందులో ముందుగా తయారుచేసి పెట్టుకొన్న క్యారట్‌ రసం, తగినంత ఉప్పు, మిరియాల పొడి వేసి కాస్త చిక్కబడేవరకు మరిగించాలి. ఇందులో టమాటా లేదా చిల్లీ సాస్‌ కూడా వేసుకోవచ్చు. రుచికరంగా చలికి, ఘాటుఘాటుగా ఉంటూ గొంతులో కమ్మగా దింగుతుంది.