కర్ణాటక స్పెషల్ వాంగి బాత్ పొడి..ఒక్కసారి చేస్తే 4 నెలలు నిల్వ..బోర్ కొట్టించే కూరలు కూడా అమృతమైపోతాయ్..

రెగ్యులర్ గా అవే కూరలు తిని బోర్ కొట్టేసిందా? రెగ్యులర్ కూరలను కూడా అద్భుతంగా మార్చే శక్తి ఉన్నదే కర్ణాటక స్పెషల్ వాంగి బాత్ పొడి. ఈ పొడినే వాంగి బాత్ లో వాడతారు. నిమ్మకాయ పులిహోరలో ఆఖరును ఈ పొడి కొంచెం వేసి కలిపారంటే సూపర్ గా టేస్ట్ ఉంటుంది. చాలా ప్రత్యేకమైన రుచి వస్తుంది.

ఇదే కాకుండా, ఏ వేపుళ్లు,ఇగుర్లు చేసినా చివర్లో ఈ పొడి కొంచెం వేసి చూడండి ప్రత్యకమైన టేస్ట్ ఆ వంటలకు వచ్చేస్తుంది. కర్ణాటక స్పెషల్ వాంగి బాత్ పొడిని మీ ఇంట్లోనే ఈజీగా ఎలా తయారుచేసుకోవాలో ఇక్కడ చూడండి.

వాంగి బాత్ పొడి తయారీకి కావాల్సిన పదార్థాలు

-మినపప్పు
-పచ్చి శెనగపప్పు
-ధనియాలు
-యాలకలు
-దాల్చిన చెక్క
-మరాఠీ మొగ్గ
-లవంగాలు
-గసగసాలు
-ఎండుకొబ్బరి తురుము
-గుంటూరు ఎండుమిర్చి
-బ్యాడిగ మిర్చి
-పసుపు
-ఇంగువ

కృష్ణాష్టమి స్పెషల్..కన్నయ్యకు అత్యంత ఇష్టమైన ధనియాల పంజిరి ఎలా చేసుకోవాలంటే..

వాంగి బాత్ పొడి తయారీ విధానం

-ముందుగా స్టవ్ వెలిగించి కడాయి పెట్టుకోండి. అందులో 2 టేబుల్ స్పూన్లు(25 గ్రా)మినపప్పు, 2 టేబుల్ స్పూన్లు పచ్చి శెనగపప్పు వేసి సన్నని సెగ మీద కలుపుతూ మంచి వాసన వచ్చేదాకా వేయించాక అందులోనే 25 గ్రాముల ధనియాలు వేసి మంచి సువాసన వచ్చేదాకా వేయించి స్టవ్ ఆపేయండి.

-ఇప్పుడు వేయించినవన్నీ ఒక ప్లేట్ లోకి తీసుకొని చల్లారనివ్వండి.

-ఇప్పుడు స్టవ్ ఆన్ చేసి అదే కడాయిలో 4 యాలకలు, 2 ఇంచుల దాల్చిన చెక్క, 15 లవంగాలు, 2 అంగుళాల మరాఠీ మొగ్గ వేసి మంచి వాసన వచ్చేదాకా వేయించాలి. తర్వాత ఇందులోనే 1 టేబుల్ స్పూన్(10 గ్రా) గసగసాలు వేసి చిట్లనిచ్చేదాకా వేయించి వీటిని కూడా ముందుగా ధనియాలు మినపప్పు ఉన్న ప్లేట్ లోకి తీసుకోండి.

-ఇప్పుడు స్టవ్ మీద ఉన్న అదే కడాయిలో అరకప్పు ఎండుకొబ్బరి తురుము వేసి సన్నని సెగ మీద కలుపుతూ వేపుకోవాలి. మంచి వాసన రాగానే దీనిని కూడా ప్లేట్ లోకి తీసుకోండి.

-ఇప్పుడు స్టవ్ మీద ఉన్న అదే కడాయిలో 8 గుంటూరు మిర్చి వేసి కాస్త రంగు మారి పొంగేదాకా వేయించాక తీసి పక్కన పెట్టుకోండి.

-ఇప్పుడు అదే కడాయిలో 75 గ్రాములు తొడిమలు తీసేసిన బ్యాడిగ మిర్చి వేసి తక్కువ మంట మీద కరకరలాడేట్లుగా వేయించాక వీటిని కూడా ప్లేట్ లోకి తీసుకొని చల్లారనివ్వాలి.

-ఇప్పుడు మిక్సీ గిన్నె తీసుకోండి, అందులో ముందుగా వేయించి చల్లార్చిన పప్పులు, ఎండుకొబ్బరి తురుము,అర టీస్పూన్ పసుపు, చిటికెడు ఇంగువ కూడా వేసి మెత్తని పొడిలా గ్రైండ్ చేసుకోండి. ఇప్పుడు ఈ పొడిలోనే చల్లారిన గుంటూరు మిర్చి, బ్యాడిగ మిర్చి వేసి మరోసారి గ్రైండ్ చేసుకోండి. మెత్తని పొడిలా గ్రైండ్ చేసుకున్న ఈ మొత్తాన్ని ఒక ప్లేట్ లోకి తీసుకొని చల్లారనివ్వాలి.

-తర్వాత గాలి చొరబడని డబ్బాలో దీన్ని పెట్టుకుంటే 4 నెలల పాటు నిల్వ ఉంటుంది.