ఒక్క ముద్దతో వేరే లోకానికి.. అద్భుతమైన రుచితో నోరూరించే మ్యాంగో పులావ్..ఈజీగా ఎలా చేసుకోవాలంటే..

వేసవి కాలం అడుగుపెట్టిందంటే చాలు, మార్కెట్లన్నీ పండ్ల రారాజు మామిడి పండ్లతో కళకళలాడుతుంటాయి. మామిడి పండు పేరు చెబితేనే నోట్లో నీళ్లు ఊరతాయి కదూ. సాధారణంగా ఈ సీజన్‌ లో మామిడి పండ్లతో లస్సీ, ఐస్ క్రీమ్, మ్యాంగో షేక్ వంటి ఎన్నో రకాల వంటకాలను ఆస్వాదిస్తుంటాం. కానీ, తీపి.. కాస్త కారం.. అద్భుతమైన సువాసనల కలయికతో ఎంతో భిన్నంగా ఉండే మామిడి పులావ్ గురించి ఎప్పుడైనా విన్నారా? లేదా రుచి చూశారా? లేదంటే మాత్రం మీరు ఒక అద్భుతమైన రుచిని మిస్ అయినట్లే.

పండిన మామిడి పండులోని సహజమైన తీపి, ఘుమఘుమలాడే బాస్మతి బియ్యం సువాసన కలిసి చేసే మ్యాజిక్ అంతా ఇంతా కాదు. మొదటి ముద్దలోనే ఇది మిమ్మల్ని వేరే లోకానికి తీసుకెళ్తుంది. మీ ఇంటికి వచ్చే అతిథులను ఆశ్చర్యపరచాలన్నా, పిల్లలకు కొత్త రుచిని పరిచయం చేయాలన్నా ఇది పర్ఫెక్ట్ రెసిపీ. నోరూరించే మామిడి పులావ్ ఎలా చేయాలో ఇక్కడ చూడండి.

మామిడి పులావ్‌ తయారీకి కావాల్సిన పదార్థాలు

నాణ్యమైన బాస్మతి బియ్యం - 1 కప్పు
పండిన మామిడి పండు ముక్కలు - ఒకటిన్నర కప్పు
తాజా మామిడి గుజ్జు (పల్ప్) - 2 టేబుల్ స్పూన్లు
స్వచ్ఛమైన నెయ్యి - 2 టేబుల్ స్పూన్లు
జీడిపప్పులు, బాదం పప్పులు - 10 చొప్పున
ఎండుద్రాక్ష (కిస్మిస్) - 1 టేబుల్ స్పూన్
పచ్చ యాలకులు - 3
కుంకుమపువ్వు - కొద్దిగా
బెల్లం పొడి లేదా పంచదార - 2 టేబుల్ స్పూన్లు
నీళ్లు - 2 కప్పులు

మామిడి పులావ్ తయారీ విధానం

-ముందుగా బాస్మతి బియ్యాన్ని శుభ్రంగా కడిగి, 20 నిమిషాల పాటు నానబెట్టండి. ఆ తర్వాత బియ్యాన్ని మెత్తగా కాకుండా, ప్రతి గింజ విడివిడిగా, పొడిపొడిగా ఉండేలా ఉడికించుకోండి. ఉడికిన అన్నాన్ని ఒక పళ్లెంలో వేసి కాస్త చల్లారనివ్వండి.

-స్టవ్ మీద మందపాటి బాండీ పెట్టి నెయ్యి వేడి చేయండి. నెయ్యి కరిగాక జీడిపప్పు, బాదం, ఎండుద్రాక్షలను వేసి దోరగా, బంగారు రంగు వచ్చేవరకు వేయించి పక్కన పెట్టుకోండి.

-అదే బాండీలో పచ్చ యాలకులు వేసి వేయించండి. తర్వాత గోరువెచ్చని పాలలో నానబెట్టిన కుంకుమపువ్వును వేసి కొన్ని సెకన్ల పాటు కలపండి.

-ఇప్పుడు అందులో మామిడి గుజ్జు, బెల్లం పొడి (లేదా పంచదార) వేసి బాగా కలపండి. సన్నని మంట మీద 2 నిమిషాలు ఉడికించండి. ఈ మిశ్రమంలో ముందుగా ఉడికించి పెట్టుకున్న అన్నం, పండిన మామిడి ముక్కలు వేసి నెమ్మదిగా కలపండి. అల్ఫోన్సో, కేసర్, లేదా బంగినపల్లి రకాలు ఈ వంటకానికి ప్రాణం పోస్తాయి. మరీ మెత్తగా పండిపోయిన మామిడికాయలను వాడకండి.

-గింజలు విరగకుండా, మామిడి ముక్కలు చిదమకుండా జాగ్రత్తగా కలుపుకోవాలి. చివరగా ముందుగా వేయించి పెట్టుకున్న డ్రై ఫ్రూట్స్‌ తో అలంకరిస్తే, వేడివేడి మామిడి పులావ్ రెడీ.