పుదీనా-బేబి పొటాటో కర్రీ

Published: Thursday, June 7, 2012, 12:51 [IST]

భారతీయ వంటకాలలో బంగాళదుంప ప్రముఖమైనది. తరచూ వాడబడుతుంది. అయితే మన ఇళ్లలో చాలా మంది బంగాళదుంప ‘ఆరోగ్యానికి' మంచిది కాదని చెబుతుంటారు, కాని స్వచ్ఛమైన బంగాళదుంపలు అత్యధిక కార్బొహైడ్రేట్లను కలిగి ఆరోగ్యానికి మంచి చేకూరుస్తాయి. ఇంట్లో రెండు బంగాళదుంపలు ఉన్నాయంటే చాలు కూరకోసం వెతుక్కోనక్కరలేదు అంటారు. దానిని ముక్కలు చేసి, ఉఢకబెట్టి ఏదో ఒక పొడికూర, వేపుడు చేసుకోవచ్చు. బంగాళా దుంపలు పెద్ద సైజులో కాకుండా చిన్న సైజు బంగాళా దుంపలు మరింతే రుచికరంగా ఉంటాయి. వాటితో చేసిన వంటకం అన్నంలోకి, పూరీ, చపాతీల్లోకి బావుంటుంది. త్వరగా తయారవుతుంది కూడా. రకరకాల వంటకాలుగా వీటిని ఉపయోగిస్తున్నారు . కూరగాను , చిప్స్ గాను , వేపుడు కూరగాను , ఇతర కూరలలోను , చికెన్‌ , మటన్‌ వాటితో కలిపి గాని వాడితే మంచి రుచిగా ఉంటయి. ఇవి రుచింకే కాదు ముఖ్యమైన విటమిన్లు, ఖనిజలవణాలు ఉన్నాయి.... ఉదా : విటమిన్‌ సి , పొటాషియం, ఐరన్‌, బి-కాంప్లెక్స్ పుష్కలంగా ఉన్నాయి.

కావలసిన పదార్థాలు:
బేబి పొటాటో(చిన్న బంగాళాదుంపలు): 1/2kg
గట్టిపెరుగు: 2cups
జీడిపప్పు: 12-15
జీలకర్ర పొడి: 1tsp
చాట్ మసాలా: 1tsp
అల్లం వెల్లుల్లి పేస్ట్: 3tbsp
వెన్న: 1cup
పసుపు: 1/4tsp
పుదీనా ఆకులు: 1cup
ధనియాల పొడి: 1tbsp
పచ్చిమిర్చి: 4-6
ఉప్పు: రుచికి తగినంత
నూనె: కావలసినంత

తయారు చేయు విధానం:
1. ముందుగా బంగాళదుంపలను శుభ్రం చేసి, గిన్నెలో తగినన్ని నీళ్లు పోసి అందులో బంగాళదుంపలు వేసి స్టౌ మీద మీడియం మంట మీద ఉడికించి పక్కన పెట్టుకోవాలి.
2. కొద్దిసేపటి తర్వాత చల్లారాక పై తోలు తీసి, పాన్ లో కొద్దిగా నూనె వేసి ఉడికించిన పొటాటోను దోరగా వేయించి పక్కన పెట్టుకోవాలి.
3. ఇప్పుడు స్టౌ మీద పాన్ పెట్టి అందులో నూనె వేసి కాగిన తరువాత అల్లం వెల్లుల్లి పేస్ట్, అరకప్పు పుదీనా పేస్ట్, జీడిపప్పు పేస్ట్, వేసి దోరగా వేయించుకోవాలి.
4. తర్వాత అందులోనే పెరుగు కూడా వేసి రెండు నిమిషాల పాటు ఉడికించాలి. కావాలనుకుంటే కొద్దిగా నీరు పోసుకోవచ్చు.
5. దీనిలో మిగిలిన అన్ని మసాలాలు, జీలకర్ర పొడి, చాట్ మసాలా, పచ్చిమిర్చి ముక్కలు కూడా వేసుకొని మరికొద్దిసేపు ఉడికించాలి.
6. ఇప్పుడు బేబి పొటాటో(బంగాళాదుంపలు) వేసి సన్నని సెగన ఉడికించాలి. ముక్కలకి గ్రేవీ పట్టేంత వరకూ పొయ్యి మీద వుంచాలి. దించే ముందు పుదీనా ఆకులు లేదా పొడి చల్లి దించేయాలి. ఇది చపాతీల్లోకి లేదా వేడి వేడి అన్నంలోకి బాగుంటుంది.

ఆహార పౌష్టికత పరంగా బంగాళదుంపలలో పిండి పదార్ధాలు (కార్బోహైడ్రేటులు) ప్రధానమైన ఆహార పదార్ధం. ఒక మధ్య రకం సైజు దుంపలో 26 గ్రాములు పిండిపదార్ధం ఉంటుంది. ఇది ముఖ్యంగా స్టార్చ్ రూపంలో ఉంటుంది. ఈ స్టార్చి‌లో కొద్ది భాగం పొట్టలోను, చిన్న ప్రేవులలోను స్రవించే ఎంజైములు వలన జీర్ణం కాదు. కనుక ఈ జీర్ణం కాని స్టార్చి భాగం పెద్ద ప్రేవులోకి తిన్నగా వెళ్ళిపోతుంది. ఈ జీర్ణం కాని స్టార్చి (resistant starch) వలన శరీరానికి ఆహార పీచు పదార్ధాలు (Dietary fiber) వల్ల కలిగే ఉపయోగాలవంటి ప్రయోజనాలే కలుగుతాయని భావిస్తున్నారు

శరీర పౌష్టికత,
కోలన్ క్యాన్సర్ నుండి భద్రత,
గ్లూకోజ్ ఆధిక్యతను తట్టుకొనే శక్తి,
కొలెస్టరాల్ తగ్గింపు,
ట్రైగ్లిజరైడులు తగ్గింపు వంటివి.

దుంపను ఉడకపెట్టి ఆరబెడితే ఇలా జీర్ణంకాని స్టార్చి ఎక్కువవుతుంది. ఉడికిన వేడి దుంపలో ఉండే 7% జీర్ణంకాని స్టార్చి, దానిని ఆరబెట్టినపుడు 13%కు పెరుగుతుంది.

Comments

Story first published: Thursday, June 7, 2012, 12:51 [IST]

Latest Updates

Spicy Baby Potato-Mint Fry | పుదీనా-బేబి పొటాటో కర్రీ