చలికాలంలో మాత్రమే దొరికే లక్నో ఫేమస్ మఖన్ మలై.. మీ ఇంట్లోనే ఈజీగా చేసుకోండిలా..

నవంబర్ నెల ప్రారంభం నుంచే వాతావరణంలో ఓ రకమైన ఆహ్లాదకరమైన చలి మొదలవుతుంది. ఈ చలికాలంలో వెచ్చని ఆహారంతో పాటు, మనసును దోచే అద్భుతమైన స్వీట్స్ తినాలనిపించడం సహజం. ఈ కాలంలో ఉత్తర భారతదేశంలో, మరీ ముఖ్యంగా లక్నో వీధుల్లో ఒక అద్భుతమైన స్వీట్ సువాసనలు పర్యాటకులను కట్టిపడేస్తాయి. అదే మఖన్ మలై.

దీని ఆకృతి చాలా తేలికగా, నురుగులా ఉండి తింటుంటే అమృతంలా అనిపిస్తుంది. నోట్లో వేసుకోగానే ఇట్టే కరిగిపోయే ఈ నురుగులాంటి అద్భుతమైన డెజర్ట్‌ ను ఢిల్లీలో దౌలత్ కి చాట్ అని కూడా అంటారు. పాలు, మీగడతో చేసే ఈ స్వీట్‌ ను ఇప్పుడు మీరు లక్నో వెళ్లకుండానే మీ ఇంట్లోనే సులభంగా ఎలా తయారు చేసుకోవాలో ఇక్కడ చూడండి.

తయారీకి కావాల్సిన పదార్థాలు

తాజా మీగడ (ఫ్రెష్ క్రీమ్) - 1 కప్పు
చల్లని ఫుల్ క్రీమ్ పాలు - 1 కప్పు
పొడి చక్కెర - 3 టేబుల్ స్పూన్లు
కుంకుమ పువ్వు - 4 రేకులు
యాలకుల పొడి - అర టీస్పూన్
కెవ్రా వాటర్- అర టీస్పూన్
బాదం, పిస్తా- అలంకరణ కోసం

జలుబు, దగ్గు పరార్.. కేవలం 5 నిమిషాల్లో ఆరోగ్యకరమైన వెల్లుల్లి కొత్తిమీర సూప్ చేసుకోండిలా..

తయారీ విధానం

-ముందుగా ఒక పెద్ద గిన్నె తీసుకుని, అందులో ఫ్రెష్ క్రీమ్, పొడి చక్కెర వేసి బాగా కలపాలి. ఆ తర్వాత చల్లని పాలను కొద్దికొద్దిగా పోస్తూ కలుపుకోవాలి. ఇప్పుడు ఈ మిశ్రమాన్ని ఎలక్ట్రిక్ బీటర్ లేదా హ్యాండ్ బీటర్ సహాయంతో బాగా గిలకొట్టాలి. మిశ్రమం మొత్తం తేలికపాటి నురుగులా పైకి తేలేంత వరకు బీట్ చేస్తూనే ఉండాలి.

-ఆ నురుగు లాంటి మిశ్రమంలో కుంకుమపువ్వు, యాలకుల పొడి, కెవ్రా వాటర్ వేసి నురుగు చెదిరిపోకుండా నెమ్మదిగా కలపాలి. ఈ గిన్నెను సుమారు 30 నిమిషాల పాటు ఫ్రిజ్‌ లో ఉంచి చల్లబడనివ్వాలి.

-అరగంట తర్వాత ఫ్రిజ్ నుంచి బయటకు తీసి, అందమైన సర్వింగ్ బౌల్స్‌లోకి మార్చుకోవాలి. పైన సన్నగా తరిగిన బాదం, పిస్తా పప్పులతో గార్నిష్ చేసి సర్వ్ చేసుకోవడమే.

చలికాలంలోనే ఎందుకు ప్రత్యేకం?

ఈ మఖన్ మలై కేవలం శీతాకాలంలోనే ఎందుకు దొరుకుతుందంటే.. దీని తయారీలో చల్లని వాతావరణం, మంచు కీలక పాత్ర పోషిస్తాయి. సాంప్రదాయ పద్ధతిలో పాలు, మీగడ మిశ్రమాన్ని రాత్రంతా ఆరుబయట పడే మంచులో ఉంచుతారు. ఉదయాన్నే ఆ చల్లని వాతావరణంలో పాలను చిలికి నురుగును తీస్తారు. ఎండ కాస్త వచ్చినా, వాతావరణంలో వేడి పెరిగినా సరే ఆ నురుగు కరిగిపోయి పాలులా మారిపోతుంది. అందుకే ఈ అద్భుతమైన స్వీట్ చలికాలంలో మాత్రమే లభిస్తుంది.