చలికాలంలో ఈ సాంబార్ చేసుకుంటే..జలుబు, తలనొప్పి అన్నీ పరార్!

చలికాలం వచ్చిందంటే చాలు జలుబు, దగ్గు, తలనొప్పి వంటి చిన్నపాటి అనారోగ్య సమస్యలు సర్వసాధారణంగా మారుతుంటాయి. చిన్నపిల్లల నుండి పెద్దల దాకా అందరూ ఈ వాతావరణ మార్పుల కారణంగా ఇబ్బంది పడుతుంటారు. ఈ చలిగాలులకు చెక్ పెట్టి, మీ కుటుంబాన్ని ఆరోగ్యంగా ఉంచడానికి వంటింట్లో ఉండే పదార్థాలతోనే ఒక అద్భుతమైన పరిష్కారం ఉంది. అదే పోషకాలు నిండిన ఉలవల సాంబార్.

ఈ సాంబార్ కేవలం రుచికరంగా ఉండటమే కాకుండా, శరీరానికి వెచ్చదనాన్ని అందించి జలుబు నుంచి తక్షణ ఉపశమనాన్ని ఇస్తుంది. మరీ ముఖ్యంగా, వేడివేడి అన్నంలో కొద్దిగా నెయ్యి వేసుకొని ఈ సాంబార్‌ తో తింటే అమృతంలా ఉంటుంది. ఆరోగ్యకరమైన ఉలవల సాంబార్‌ ను సులభంగా ఎలా తయారు చేయాలో ఇక్కడ చూడండి.

కావలసిన పదార్థాలు

మసాలా కోసం వేయించి రుబ్బుకోవడానికి:

ఉలవలు- 60 గ్రాములు
ధనియాలు- 3 టీస్పూన్లు
జీలకర్ర- ఒకటిన్నర టీస్పూన్లు
మిరియాల పొడి- అర టీస్పూన్
ఎండు మిరపకాయలు - 3
చింతపండు - చిన్న ముక్క
తురిమిన కొబ్బరి - అర కప్పు
నీరు - సరిపడా

సాంబార్ తాలింపు,కూరగాయల కోసం:

నూనె - 2 టీస్పూన్లు
ఆవాలు - 1 టీస్పూన్
ఎండు మిరపకాయలు - 2
జీలకర్ర పొడి - పావు టీస్పూన్
కరివేపాకు - 1 రెమ్మ
వెల్లుల్లి - 6 రెబ్బలు
సాంబార్ ఉల్లిపాయలు - 8
పెద్ద టమాటాలు - 2
పసుపు - పావు టీస్పూన్
పొడి మసాలాలు - రుచికి తగినట్లుగా
నీరు - సాంబార్ కన్సిస్టెన్సీకి తగినంత
ఉప్పు - రుచికి సరిపడా
కొత్తిమీర - కొద్దిగా

100 ఏళ్లు గుర్తుండిపోయే పచ్చిమిర్చి పచ్చడి..ఎందులోకి అయినా అమృతమే!

ఉలవల సాంబార్ తయారీ విధానం

-ముందుగా ఉలవలను శుభ్రంగా నీటిలో కడిగి, నీటిని పూర్తిగా వడకట్టండి. ఇప్పుడు పొయ్యి మీద ఒక పాన్ పెట్టి, కడిగి పెట్టుకున్న పప్పును వేసి మంచి సువాసన వచ్చి, బంగారు గోధుమ రంగులోకి మారే వరకు బాగా వేయించి పక్కన పెట్టుకోండి.

-అదే పాన్‌ లో ధనియాలు, జీలకర్ర, మిరియాల పొడి, ఎండు మిరపకాయలు వేసి మంచిగా వేయించి, వాటిని పూర్తిగా చల్లారనివ్వండి.

-ఇప్పుడు ఒక మిక్సర్ జార్ తీసుకొని, అందులో వేయించి పెట్టుకున్న పప్పులు, సుగంధ ద్రవ్యాలు, చింతపండు, తురిమిన కొబ్బరి వేయండి. వీటికి కొద్దిగా నీరు పోసి మెత్తగా, మృదువైన పేస్ట్‌లా గ్రైండ్ చేసి పక్కన ఉంచుకోండి.

-ఇప్పుడు మరో గిన్నె లేదా పాన్‌ ను పొయ్యి మీద పెట్టి, 2 టీస్పూన్ల నూనె పోయండి. నూనె వేడెక్కిన తర్వాత ఆవాలు, ఎండు మిరపకాయలు, జీలకర్ర పొడి, కరివేపాకు వేసి చిటపటలానివ్వండి. దీనిలోనే సన్నగా తరిగిన వెల్లుల్లి రెబ్బలు, చిన్న ఉల్లిపాయలను వేసి, ఉల్లిపాయలు పారదర్శక రంగులోకి మారే వరకు వేయించండి. వెల్లుల్లి, ఉల్లిపాయల కలయిక ఈ సాంబార్‌కు అద్భుతమైన రుచిని ఇస్తుంది.

-తర్వాతి దశలో తరిగిన టమోటా ముక్కలు, పసుపు పొడి వేసి టమోటాలు పూర్తిగా మెత్తబడి గుజ్జులా అయ్యే వరకు మగ్గనివ్వండి.

-ఇప్పుడు మనం ముందుగా సిద్ధం చేసుకున్న మసాలా పేస్ట్‌ ను ఇందులో కలపండి. అలాగే సాంబార్‌ కు సరిపడా నీరు, తగినంత ఉప్పు, పొడి మసాలాలు వేసి బాగా కలపండి.

-మంటను మీడియం వేడిలో ఉంచి, సాంబార్‌ ను సుమారు 10 నిమిషాల పాటు బాగా మరగనివ్వండి. సాంబార్ చిక్కబడి, పచ్చి వాసన పోయి గుమగుమలాడే సువాసన వస్తుంది.

-చివరగా, సన్నగా తరిగిన కొత్తిమీరను చల్లి దించేయండి. అంతే ఎంతో రుచికరమైన, పోషకాలతో కూడిన వేడివేడి ఉలవల సాంబార్ రెడీ.