అందుకు సమయం లేదు అమ్మడూ....!

Relationship

oi-Nageswara

By B N Sharma

Published: Thursday, June 7, 2012, 12:29 [IST]

సమయంతో స్ధిరపడే సంబంధాలు! ప్రేమించేటపుడు తీరికగా ప్రేమించండి అనే సామెత ఒకటి గతంలో వుండేది. ప్రేమించటం బిజీగా చేసేస్తే, మీరంటే ఏమిటో మీ డార్లింగ్ కు తెలియదు, ఆమె అంటే ఏమిటో మీకు పూర్తిగా తెలియదు. బహుశ నేడు అందరం ఇంత బిజీ అయిపోతామని గతంలోని వారు ఊహించివుండరు. ఏ సంబంధానికైనా సరే మనకు సమయం వుండకపోవటం నేటి రోజులలో ఒక పెద్ద సమస్య అయింది. మీ భార్య లేదా ప్రియురాలితోనే కాదు, మీ కుమారుడు లేదా తల్లి లేదా సోదరి వంటి వారితో కూడా సమయం కొరత కారణంగా సరైన సంబంధాలు నిర్వహించలేకపోతున్నాం. సంబంధాలు సరిగా పెరగకుంటే మన జీవన విధానాలు ఎలా వుంటాయనేదాన్ని అంశంగా అనేక సినిమాలు నేడు మనం చూస్తున్నాం. ఎన్నో అపార్ధాలు? సంబంధాలు చెడిపోవటం, విడాకులు, దూరాలకు తొలగిపోవడం వంటివి నేడు జరుగుతున్నాయి. కనుక సంబంధం ఏదైనప్పటికి అందులోని లోతుపాతులు అర్ధంర చేసుకోవాలంటే మనం కొంత సమయాన్ని దానికి కేటాయించాలి.

1. ట్రావెలింగ్ జాబ్ - ఆఫీస్ పనుల కారణంగా సంవత్సరానికి పది నెలలో టూర్లలో గడిపే వారికి ఇంటిలో భార్యను ప్రేమించే అవకాశం ఆమెను అర్ధం చేసుకొనే అవకాశం వుండదు. వచ్చి వున్న రెండు నెలలు ఇద్దరి మధ్యా ఎన్నో సమస్యలు కలిగి వుంటారు. ఇంటివద్ద గడిపే కొద్దిపాటి సమయం మీ సంబంధానికి సరిపోదని గ్రహించాలి.

2. బిజీ ఉద్యోగులు - వీరు ఎపుడు చూసినా కంపెనీల ఉద్యోగాలలో ముణిగి తేలుతూ, రోజుకు 16 గంటలు, మీటింగులు, తోటి ఉద్యోగులు, బాస్, వర్క్ అంటూ తిరిగేస్తారు. అవసరమనుకుంటే నెలకు మూడు వారాలు ప్రయాణాలలోనే వుంటారు. విదేశాలు ప్రయాణిస్తారు. వీరికి ఇంటివద్ద వుండే భార్యతో గల సంబంధం ప్రేమగా మారే అవకాశం వుండదు.

3. బదిలీ బాబులు - వీరి ఉద్యోగాలలో అన్ని చోట్లకు బదిలీలే. కంపెనీ లేదా బ్యాంకు బ్రాంచీలు దేశంలో ఎన్ని వుంటే, షుమారుగా అన్ని ప్రదేశాలకు వీరికి బదిలీలు అవుతూనే వుంటాయి. వీరికి ప్రేమలో పడేందుకు అవకాశం వుండవచ్చు కాని వీరి పార్టనర్ ఎపుడు చూసినా బదిలీకి అవసరమైన ఇంటిసామాన్లు సర్దుతూనే వుండాలి. వీరు ఏ ప్రదేశంలోను పట్టుమని పది సంవత్సరాలు వుండరు. ఇక పార్టనర్ ఏదేని ఉద్యోగం చేసే అవకాశం అసలే వుండదు. ఇక దూరంలో వున్న బంధువులెవరో కూడా వీరికి తెలియని స్ధితిలో వుంటారు.

4. వర్కోహాలిక్ - పని ప్రేమికుడు, ఈ తరహా వ్యక్తులు ఒక సారి ఆఫీస్ లోకి వెళ్ళారంటే, బయట ఏం జరుగుతోందో తెలియదు. ఇంటివద్ద జరిగేది అసలే తెలియదు. ప్రేమంటే అసలు తెలియదు. దాని రుచి, రంగు, వాసన పట్టని వ్యక్తి. ఇంటివద్ద భార్యకు అన్నీ అడియాసలుగానే వుంటాయి. వీరు స్వచ్ఛందంగా ప్రేమను చంపేసుకుంటారు. పని తప్ప వేరే ధ్యాస వుండదు. కనుక వీరు కొద్దిపాటిగా బయటి ప్రపంచంలో తొంగి చూసి తమ సంబంధాలను మెరుగుపరచుకోవాలి.

పైన తెలిపినవన్నీ ఆధునిక జీవన విధానంలోని కష్టాలు, ఇవి సబంధాలకు తగిన సమయం కేటాయించలేనివి. మరి వీటిని అధిగమించాలంటే, ఆన్ లైన్ డేటింగ్ లేదా సుదూర సంబంధాలు వంటివి నేటి తీరులో ఆనందించాల్సిందే. ప్రేమలో పడటం మీ పని లేదా వ్యాపారానికి హాని అని మీరు ఎపుడైనా భావించారా? ఈ అంశంలో మీ అనుభవాలను మాతో పంచుకోండి.