‘త్వరలో నా పెళ్లి... కానీ నా ఎక్స్ నన్ను బ్లాక్ మెయిల్ చేస్తూ...’

రెండేళ్లు డేటింగ్..

నా పేరు రాణి (పేరు మార్చాం). ‘నేను కాలేజీ చదువుకునే రోజుల్లో నా క్లాస్ మేట్ తో తొలుత బాగా ఫ్రెండ్ షిప్ చేశాను. మా ఇద్దరికీ తెలియకుండానే మేమిద్దరం తక్కువ టైమ్ లోనే లవ్ లో పడిపోయాం. అలా తనతో నేను రెండేళ్ల పాటు డేటింగులో ఉన్నాను.

ఇష్టపూర్వకంగా బ్రేకప్..

అయితే మేమిద్దరం కలిసి ఉన్నప్పుడు చాలా సమయం మేమిద్దరం గొడవ పడే వాళ్లం. దీంతో మా ఇద్దరం ఇలాగే లైఫ్ ను లీడ్ చేయలేమని డిసైడ్ చేసుకున్నాం. మేమిద్దరం ఇక నుండి కలిసి ఉండలేమనే ఉద్దేశ్యంతో ఇద్దరూ ఇష్టపూర్వకంగానే బ్రేకప్ చెప్పుకున్నాం. మేమిద్దరం ఇటీవలే విడిపోయి ఎవరి బతుకు వారు బతుకుతున్నాం.

ఇంతలో నా పెళ్లి..

తనతో బ్రేకప్ చెప్పి, నా బతుకు నేను హాయిగా బతుకుతుంటే.. ఇంట్లో పెద్దలు సడెన్ గా పెళ్లి సంబంధం తీసుకొచ్చారు. నేను ఓకే అంటే.. వివాహ కార్యక్రమం మొదలుపెడతామన్నారు. నాకు ఎలాంటి అభ్యంతరం లేదని చెప్పడంతో.. వారు పెళ్లి పనుల్లో నిమగ్నమయ్యారు.

నా మాజీ ప్రియుడు..

ఈ విషయం తెలుసుకున్న నా ఎక్స్ బాయ్ ఫ్రెండ్ మాత్రం మాట తప్పాడు. ఇప్పుడు నేనే కావాలని మంకు పట్టు పడుతున్నాడు. త్వరలో పెళ్లి చేసుకోవాలనుకుంటున్న నన్ను చాలా ఇబ్బంది పెడుతున్నాడు. తననే పెళ్లి చేసుకోవాలని, లేదంటే ఈ పెళ్లి ఎలా జరుగుతుందో అని బెదిరిస్తున్నాడు.

భయంతో ఇంట్లో చెప్పేశా..

ఈ విషయం గురించి నేను మా ఇంట్లో చెప్పేశాను. దీంతో వారు వారి ఇంట్లో వెళ్లి మాట్లాడి వచ్చారు. అనంతరం తన వల్ల నాకు ఎలాంటి సమస్య ఉండదని ప్రామీస్ చేశారు. ప్రాబ్లమ్ సాల్వ్ అయ్యిందని ఆనందించే లోపే.. నా ఊపిరి ఆగిపోయినంత పనైపోయింది.

సడెన్ గా సోషల్ మీడియాలో..

నేను సోషల్ మీడియాలో పోస్టులను చూస్తుంటే.. నాకు ఒక్కసారిగా షాక్ తగిలింది. ఎందుకంటే తను నన్ను మిస్ అవుతున్నానని.. నన్ను లవ్ చేస్తున్నట్టు స్టేటస్లు పెట్టాడు. అక్కడితో ఆగకుండా తనతో క్లోజ్ గా మూవ్ అయిన ఫొటోలను కూడా పోస్ట్ చేశాడు.

కాబోయే భర్తకు..

మరోవైపు నేను పెళ్లి చేసుకునే అబ్బాయికి ముందే ఈ విషయం గురించి వివరంగా చెప్పాను. దీనికి అతను కూడా ఎలాంటి అభ్యంతరం చెప్పలేదు. అయితే తన వల్ల నా పెళ్లి సమయంలో ఏదైనా ప్రాబ్లమ్స్ వస్తాయోమనని భయంగా ఉంది.. నా మ్యారేజ్ లోపే నా సమస్యకు పరిష్కారం లభించాలంటే.. ఏం చేయాలి.. నాకు విలువైన సలహాలు ఇవ్వగలరు''అని ఓ యువతి నిపుణులను సంప్రదించింది.

మద్దతు మంచిదే..

మీ మాజీ ప్రియుడి గురించి.. మీ ఇంట్లో వారికి, మీకు కాబోయే భర్తకు ముందే తెలియజేయడం మంచి పరిణామం. వారు మీకు మద్దతుగా ఉండటం కూడా మీకు సానుకూలమైన అంశం. అయితే రెండేళ్ల పాటు మీతో రిలేషన్ లో ఉన్న తను మిమ్మల్ని పూర్తిగా మరువలేకపోతున్నాడు. కాబట్టి తనకు చివరగా ఒక అవకాశం ఇవ్వాల్సింది.

మీతో చెప్పుకోలేక..

ఇప్పటికైనా మించిపోయింది ఏమీ లేదు. మీ మాజీ ప్రియుడు తనలోని ఫీలింగ్స్ ను మీతో చెప్పుకోలేక.. మీపై కోపంలో అలా చేస్తున్నాడు. పగ పెంచుకునే ఆలోచనలో ఉన్నాడు. అయితే మీరు ఒకసారి తనను కలిసి మాట్లాడితే కొంతవరకు కూల్ అయ్యే ఛాన్స్ ఉంది.

మార్పు రాకపోతే..

అప్పటికీ తనలో ఎలాంటి మార్పు రాకపోతే.. మీరు చివరగా సైబర్ టీమ్ ను సంప్రదించాలి. అయితే మీ గురించి అంతదూరం వెళ్లకూడదనుకుంటే.. ఒకసారి తనను కలిసి మాట్లాడితే.. మీ సమస్య సాల్వ్ అవ్వొచ్చు.