మేడారం జాతరకు వెళ్లే భక్తురాళ్లు.. హఠాత్తుగా దేవతలయిపోతారా?

ఎప్పుడో ఒకసారి..

మన హిందూ సంప్రదాయ వ్యవస్థలో కుటుంబాలలో ముఖ్యంగా మహిళలకు ఎన్నో అవమానాలు ఎదురవుతుంటాయి. అందుకే వారిలో అనేక అనుమానాలు.. ఆందోళనలు లోలోపల పెరుగుతూ ఉంటాయి. అవన్నీ ఎప్పుడో ఒకసారి బయటపడాలి.

దేవతలను ఆవాహన చేసుకుని..

మహిళల ఆందోళనలు వారిని మానసికంగా ఒత్తిడికి గురి చేస్తాయి. అందుకే ఈ జాతర సమయంలో వారు దేవతల్ని ఆవాహన చేసుకుని.. తామే దేవతలుగా మారి ఆ ఉద్వేగాలన్నింటిని ఓ అలౌకిక స్థితిలో బయటకు కక్కేందుకు ప్రయత్నిస్తారట.

జాతర అంటే..

మామూలుగా జాతర అంటే గద్దెలు, అమ్మవార్లు మాత్రమే కాదని మనందరం గుర్తుంచుకోవాలి. జాతర అంటే కుటుంబ సమేతంగా కలిసి, కష్టసుఖాలను పంచుకుంటూ బయలుదేరే ఒక ఉద్వేగ ప్రదర్శన వంటిదే ఈ నాలుగు రోజుల ఉత్సవం అని అందరూ గ్రహించాలి.

హంగులు వద్దండోయ్..

మనలో చాలా మంది ఈ మధ్యన ఏదైనా వేడుక లేదా జాతర వంటి కార్యక్రమాలొస్తే చాలు హంగులు, ఆర్భాటాలు ప్రదర్శించేందుకు తెగ ప్రయత్నిస్తున్నారు. అచ్చం బతుకమ్మల్లాగే గుడారం నుండి మేడారం రూపాన్ని మార్చేస్తున్నారు. దీంతో ఈ జాతర వైభవం తగ్గిపోతుందని అందరూ తెలుసుకోవాలి.

విగ్రహాలు లేకపోవడం..

సాధారణంగా ఏ గుడి అయినా.. ఏ జాతర అయినా ఎక్కడైనా సరే ఏదో ఒక దేవుడి లేదా దేవత విగ్రహం కచ్చితంగా ఉంటుంది. అయితే ఈ మేడారం జాతరలో మాత్రం ఎలాంటి విగ్రహాలు ఉండవు.

నాలుగు రోజుల ఉత్సవం..

ఈ మేడారం జాతర ఫిబ్రవరి 5వ తేదీ నుండి ప్రారంభమవ్వనుంది. ఈ జాతర 5వ తేదీ నుండి 8వ తేదీ వరకు నాలుగు రోజుల పాటు జరగనుంది. తొలి రోజు కన్నెపల్లి నుండి సారలమ్మను పూజారులు తీసుకుని జంపన్న వాగు నుండి దాటి వచ్చి గద్దెలపై ప్రతిష్టిస్తారు.

రెండో రోజు..

ఫిబ్రవరి ఆరో తేదీన సమ్మక్కను గద్దె మీదకు చేరుస్తారు. సమ్మక్కను కూడా చిలకలగుట్ట మీద నుండి తీసుకొచ్చి గద్దెలపై ప్రతిష్టిస్తారు. ఈ తతంగం చూసేందుకు లక్షలాది మంది భక్తులు తరలివస్తారు. సరిగ్గా ఈ సమయంలోనే కుంకుమ భరిణి రూపంలో సమ్మక్క ఆగమనంతో అందరూ పులకరించిపోతారు. ఈ సమయంలోనే అధికారుల సమక్షంలో గాల్లోకి కాల్పులు జరుపుతారు.

మూడో రోజు..

ఫిబ్రవరి 7వ తేదీన గద్దెలపై సమ్మక్క, సారలమ్మలు కొలువై భక్తులకు దర్శనమిస్తారు. ఈ సమయంలోనే భక్తులందరూ ఎంతో భక్తి శ్రద్ధలతో తమ మొక్కులను చెల్లించుకుంటారు.

చివరి రోజు..

ఫిబ్రవరి 8వ తేదీ అయిన చివరి రోజున దేవతల వన ప్రవేశం ఉంటుంది. ఈ సమయంలో ఆ వనమంతా జనసంద్రంగా మారిపోతుంది. ఈ సమయంలో అమ్మవార్ల ఆగమనంతో భక్తులు పూనకాలతో, శివభక్తుల చిందులతో అక్కడ అంతా కమణీయమైన రమణీయమైన వాతావరణం ఏర్పడుతుంది.