ఇలా చేస్తే బరువు తగ్గటం తేలికే...!

Body Care

oi-Saraswathi

By Sindhu

Published: Wednesday, June 6, 2012, 16:30 [IST]

పట్టణాలు, నగరాల్లో సుఖమయ జీవితానికి బాగా అలవాటు పడుతున్నారు. శరీరానికి శ్రమ తగలకుండానే కూర్చొన్న చోట కదలకుండా పనిచేస్తూ జీవనం సాగిస్తున్నారు. ప్రతి పది మందిలో ముగ్గురు ఊబకాయంతో బాధపడుతున్నారనేది తాజా సర్వేలో తేలిన భయకరమైన నిజం. చిన్న చిన్న నీటి బిందువులే మహా సముద్రం అయినట్లు మనం తీసుకునే కొద్దిపాటి జాగ్రత్తలే ఆరోగ్యాన్ని కాపాడతాయి. ఫాస్ట్ ఫుడ్ కల్చర్ కి అలవాటు పడిన తర్వాత దానిని తానకుండా నిగ్రహించుకోలేకపోతున్నారు. సాయంత్రం పిజ్జా, బర్గర్ లు లాగించేసి రాత్రి కేవలం పెరుగన్నం తినేస్తే సరిపోతుంది అన్నది పొరపాటు. పిజ్జా బర్గర్ లతో పాటు పెరుగులో ఉండే వెన్న కూడా శరీరంలోకి చేరి కొవ్వును మరింత పెంచేస్తుంది. డైట్ కంట్రోల్ లో వున్నవారు మీగడను తీసేసిన పాలు, మజ్జిగను మాత్రమే వాడాలి. ఈ ప్రాథమిక సూత్రాన్ని పాటించకపోతే ఎన్ని జాగ్రత్తలు పాటించినా వ్యర్థమే, దీనితో పాటు తప్పనిసరిగా పాటించవలసిన చిట్కాలు మీకోసం కొన్ని అందిస్తున్నాం....

బరువు తగ్గాలనుకొనే వారు కడుపు మాడ్చుకోవలసిన అవసరం లేదు: కడుపు మాడ్చుకొని ఉపవాసలు చేయాల్సిన పనిలేదు. రోజు మొత్తం మీద తీసుకునే ఆహారాన్నే నాలుగైదు భాగాలుగా విభజించుకొని తీసుకోవాలి. కొద్దికొద్దిగా ఎన్ని సార్లు తిన్నా ఎంత తిన్నా ఫర్వాలేదని డైటీషన్లు చెపుతున్నారు. బాగా ఆకలివేసినప్పుడు మాత్రమే తినాలి తప్పించి కొద్దిగా ఆకలి వేయగానే తినేయడం అంత మంచి అలవాటు కాదు.

కాల్షియం అత్యవసరం: బరువు తగ్గడంలో కాల్షియం ముఖ్యం పాత్ర వహిస్తుంది. ఆహారంలో కాల్షియం తప్పనిసరిగా వుండేటట్లు చూసుకోవాలి. కొవ్వు తక్కువగా ఉన్న పెరుగు, పనీర్ చాలా బాగా పనిచేస్తాయి. పాలలో వుండే మీగడలో క్యాలరీలు అధికంగా వుంటాయి. పాలను నేరుగా తీసుకోవడం కన్నీ మజ్జిగ రూపంలో తీసుకుంటే మంచి ఫలితం ఉంటుంది.

స్టాట్యుటరీ ఫాట్ ను తగ్గించాలి: నూనె, నెయ్యిలలో స్టాట్యూటరీ ఫ్యాట్ ఎక్కువగా ఉంటుంది. వంటకాలలో వీటిని సాధ్యమైనంత తక్కువ ఉపయోగిస్తూనే మరికొన్నింటిలో పూర్తిగా మానేయొచ్చు. చపాతీలలోనూనె కన్నా పుల్కాలు ఆరోగ్యకరం. దోశ, వడ కన్నా ఆవిరి మీద తయారు చేసిన ఇడ్లీమేలు. రోజూవారీ భోజనంలో ఉపయోగించే నెయ్యిని కూడా పూర్తిగా నిషేధించాల్సిందే..

నీరే అమృతం: రోజుకి పదిగ్లాసుల నీరు తాగితే అమృతంలా పనిచేస్తుంది. ఎలాంటి ఆరోగ్య సమస్యలు మీ దరిచేరవు. నీరు ఎక్కువ తాగడం వలన ఆకలి త్వరగా వేయదు. నీరు ఎక్కువగా తాగడం వల్ల ఎక్కువ తినాలన్న కోరిక కలగదు. తక్కువ పరిమాణంలో ఆహారం తీసుకొంటారు. నాన్ స్టిక్ పాత్రలలో వంట చేయడం వల్ల నూనె తక్కువ పట్టడంతో పాటు పదార్థాలలో పోషకవిలువలు పోకుండా ఉంటాయి. అప్పడాలను వేయించుకునే బదులు కాల్చుకొని తింటే వాటిని తినాలన్న కోరిక తీరుతుంది. నూనెనుండి తప్పించుకున్నట్లు ఉంటుంది.

తృణధాన్యాలు బెటర్: ఉదయం నిద్రలేచిన తర్వాత భారీ ఎత్తున తీసుకునే బ్రేక్ ఫాస్ట్ సంగతి మరిచిపోండి. కడుపు నిండుగా వుండి క్యాలరీలు తక్కువగా వుండే తృణధాన్యాలను ఉపాహారం కింద తీసుకుంటే మంచిది. ముందు రోజూ నానబెట్టి మొలకలు వచ్చిన తృణధాన్యాలలో కొద్దిగా ఉప్పు, పచ్చిమిరపకాయ ముక్కలు, నిమ్మరసం కలిపి తింటే రుచిగా వుంటాయి. ప్రతి రోజూ తినలేకపోయినా వారానికి రెండు మూడు సార్లు తప్పనిసరిగా తృణధాన్యాలు తీసుకునే అలవాటు చేసుకోండి.

ఫైబర్ తప్పనిసరి-పళ్ళు మరవద్దు: తీసుకొనే ఆహారంలో ఫైబర్ వుండేట్లు చూసుకోవాలి. ఆకు కూరల్లో ఫైబర్ ఎక్కువగా లభిస్తుంది. రోజు మొత్తం మీద కనీసం ఒక పెద్ద పండన్నా తీసుకోవాలి. ప్రతి పండులోనూ పోషక విలువలు, ఫైవర్ ఎక్కువగానే లభిస్తాయి. ఫైబర్ తో పాటు చర్మం సౌందర్యానికి పళ్లు బాగా పనిచేస్తాయి.

మాంసాహారం: మాంసాహారం లేకుండా ముద్ద దిగని వారు ఎందరో ఉన్నారు. మాంసాహారం వండేటప్పుడు చర్మం తీసేసి వండాలి. దీని వలన వందక్యాలరీలు తగ్గిపోతాయి. దీని తయారీలో నూనెకు బదులు నీటిని వాడితే కొవ్వు చేరకుండా జాగ్రత్తపడవచ్చు. చేపలలో తక్కువ పరిమాణంలో కొవ్వు ఉంటుంది. చికెన్, మటన్ కి బదులుగా చేపలు తినడం అలవాటు చేసుకుంటే మంచిది.