వేసవి ప్రతాపం శరీరంపై పడకుండా...

Body Care

oi-Saraswathi

By Sindhu

Published: Saturday, March 3, 2012, 16:16 [IST]

వేసవిలో జాగ్రత్తలు-వేసవిని కూల్‌ కూల్‌గా గడపండి ప్రతి సీజన్‌ కూ ఒక ప్రత్యేకత వుంటుంది. సమ్మర్‌ సీజన్‌ (వేసవి) కి అయితే, ప్రత్యేకతలెన్నో వున్నాయి. అలాగే వేసవిలో తీసుకోవలసిన జాగ్రత్తలూ ఎన్నో రకాలు. ఏ మాత్రం అజాగ్రత్తగా వున్నా సమ్మర్‌ ప్రభావం శరీరంపై పడక తప్పదు. ఉదయం లేచింది మొదలు, తీసుకునే ఆహారంలో త్రాగే నీటిలో పానీయాలలో ధరించే దుస్తులలో ఇక బయటకు వెళ్లినపుడు తగిన జాగ్రత్తలెన్నో తీసుకోక తప్పదు. ముఖ్యంగా చర్మ సంరక్షణ అనేది పెద్ద సవాల్ లాంటిదే. ముఖం, చేతులు, కాళ్ళు కూడా బానుడు తాపానికి బలికాక తప్పదు. కాబట్టి కొన్ని జాగ్రత్తలు తీసుకొంటే మంచిది

1. అధిక వేడికి చర్మం కమలటం ఈ కాలంలో సర్వసాధారణం. ఇలాంటప్పుడు ముఖం, చేతులు, పాదాలు లాంటివాటిని అధిక వేడి నుంచి కాపాడుకునేందుకు చందనం, పువ్వులు ఎంతగానో మేలు చేస్తాయి. ముఖ్యంగా రోజా, లిల్లీ, తామర, బంతి, చేమంతి, మల్లెపువ్వులతో వేసవిలో చర్మ సౌందర్యాన్ని మెరుగుపరచుకోవచ్చు.
2. ఎండలో వెళ్లాల్సి వచ్చినపుడు సన్ స్క్రీన్ లోషన్ రాసుకోండి. గొడుగు పట్టుకెళితే మరీ మంచిది. నీరు ఎక్కువగా తాగండి. ఎన్ని నీళ్లు తాగితే అంత మంచిది. కొబ్బరి నీరు తీసుకుంటే ఇంకా మేలు. స్మోకింగ్, డ్రింకింగ్‌కు దూరంగా ఉండండి.
3. పాదాలు కోమలత్వాన్ని సంతరించుకోవటానికి నిమ్మచెక్క తో పాదాలను రుద్దాలి. ఇలా తరచూ చేయటంవల్ల పాదాలు తెల్లగా, కోమలంగా తయారవుతాయి.
4. నిమ్మరసం, పంచదార కలిపి మిశ్రమంతో ముందుగా పాదాలను శుభ్రపరచాలి. ఇది స్క్రబ్ లా పనిచేసి చర్మం పై పేరుకున్న మృతకణాలన్ని తొలగిపోతాయి. తర్వాత పాలు, తేనె, గోధుమపిండి ఒక్కో చెంచా చొప్పున తీసుకోవాలి. వీటన్నిటినీ పేస్టులా చేసి పాదాలకు ప్యాక్ వేసుకోవాలి. పది నిమిషాల తర్వాత చల్లని నీటితో కడిగేయాలి.
5. బయట తిరిగే వారందరూ తలపై ఆచ్ఛాదనగా, టోపీ గాని, గొడుగు, తలపాగా వంటివి సిద్ధం చేసుకుని, కళ్లకు నల్లద్దాల కళ్లజోళ్లు (కూలింగ్‌ గ్లాసెస్‌) పెట్టుకుంటే వేసవి ప్రతాపం ఫిఫ్టీ పర్సెంట్‌ తక్కువగానే అనిపిస్తుంది. ఎన్ని సాధనాలతో బయటకు వెళ్లినా తట్టుకోలేని వేడిమి వున్న సమయంలో అసలు తిరగడం తగ్గించడమే అసలైన జాగ్రత్త. ఉదయం 10, 11 గంటలలోపు సాయంత్రం, 4, 5 గంటల తరువాత పనులు చేసుకోవటానికి బయలుదేరితే, మంచిది.