పురుషుల్లో జుట్టురాలడానికి కారణాలు..పరిష్కారం..

Hair Care

oi-Saraswathi

By Sindhu

Published: Friday, March 2, 2012, 11:19 [IST]

నేటి ఉరుకుల, పరుగుల జీవితంలో మన గురించి మనం పట్టించుకునే తీరిక సమయాన్ని కేటాయించుకుంటూ చివరికి మరచిపోతున్నది మాత్రం మన ఆరోగ్యాన్నే. ఒడిదుడుకుల మధ్య సాగుతూ మరింత ఫ్యాషన్ గా కనపడడానికి జుట్టుకు రంగులు, డైలు వాడుతున్నారు. ఆధునిక జీవితంలో పని ఒత్తిడి, వాతావరణ కాలుష్యం ప్రభావంతో జుట్టు నిర్జీవంగా మారుతోంది. అలాంటి జుట్టుపై ట్రిమ్మింగ్, ఫర్మింగ్, కలరింగ్ డై చేయించడం మూలంగా కుదుళ్లు కూడా బలహీనపడుతున్నాయి. ఇలాగే కొనసాగితే కొంత కాలనికి బట్టతల వచ్చేస్తుంది.

జుట్టు రాలడానికి మరొక ప్రధాన కారణం ఒత్తిడి. జుట్టు రాలడానికి ప్రధానంగా శరీర తత్వం, అనారోగ్యం, ఆపరేషన్లు, విటమిన్ల లోపం, థైరాయిడ్ సమస్యలు, హార్మోన్ల అసమానత, మందుల సైడ్ ఎఫెక్ట్స్ కారణాలుగా ఉంటాయి. సాధారణంగా పురుషుల్లో ఈ సమస్య వంశపారంపర్యంగా వస్తుంది. ఒక వయసు దాటాక పురుషుల్లో స్త్రీల కంటే ఎక్కువగా వెంట్రుకలు రాలిపోతుంటాయి. కుటుంబంలో ఎవరికైనా బట్టతల ఉంటే అది పురుషులకు వస్తుంది. ఇలాంటి వారికి జుట్టు ఎక్కువగా రాలుతుంది. దీన్నే ‘మ్యాన్ ప్యాటర్నల్ బాల్డ్ నెస్’ అంటారు. పురుషుల్లో ‘ఆండ్రోజన్’ హార్మోన్ ఎక్కువైనా జుట్టు రాలిపోతుంది. ఇది జుట్టు కుదుళ్లను బలహీనపరుస్తుంది. ఇలా రాలిన జుట్టు తిరిగి రావడం కష్టం తరచుగా చుండ్రు, ఫంగల్ ఇన్ ఫెక్షన్ వస్తూ ఉంటే జుట్టు వేగంగా రాలిపోతుంది. ఫలితంగా బట్టతల వచ్చేస్తుంది..

పరిష్కారం: ఈ రోజుల్లో జుట్టు రాలడం ఒక సాధారణ సమస్య. కొన్ని జాగ్రత్తలతో దీన్నుంచి బయటపడవచ్చు. జుట్టు ఆరోగ్యంగా ఉండాలంటే ప్రోటీన్లు ఎక్కువగా అవసరం. ఆహారంలో ప్రోటీన్లు తక్కువైతే జుట్టు నిర్జీవంగా మారిపోతుంది. జుట్టుకు ఫర్మింగ్, కలరింగ్ స్టయిలింగ్ తగ్గించాలి. మాటమాటికీ షాంపూలను మార్చకూడదు. తరచుగా మాయిశ్చరైజర్ జుట్టుకు వాడాలి. గోరువెచ్చని నూనెతో తలకు మసాజ్ చేయాలి. తలస్నానం తర్వాత జుట్టుకు సీరం, కండీషనర్ తప్పక వాడిలి. నూనెతో మసాజ్ చేస్తే శిరోజాలకు నిగారింపు వస్తుంది. ఆహారంలో పాలు, పండ్లు, పచ్చికూరగాయలు, చేపలు తీసుకోవాలి. నీళ్ళను ఎక్కువగా తాగాలి.