పురుషుల్లోనే బట్టతలకు కారణం..నివారణోపాయాలు...

Published: Thursday, January 12, 2012, 12:41 [IST]

Tips for taking care of Bald Head in Men's

మన తలపై వెంట్రుకలు కనిపించే వరసను హెయిర్‌ లైన్ అంటారు. ప్రతి వెంట్రుక మొలిచే ప్రదేశాన్ని కుదురు (ఫాలికిల్) అని పేర్కొంటారు. పురుషుల్లో హార్మోన్లలో ప్రధానమైన డైహైడ్రోటెస్టోస్టెరాన్ (డీహెచ్‌టీ) వంటివి స్రవించినప్పుడు కొన్ని జన్యువుల కారణంగా సాధారణంగా వెంట్రుకల మూలాలు సెన్సిటివ్‌ గా మారి జుట్టు రాలిపోవడం సహజం. పురుషుల్లో ఈ డైహైడ్రోటెస్టోస్టెరాన్ స్రవిస్తూ ఉండటం వల్ల క్రమ క్రమంగా హెయిర్‌ లైన్ వెనక్కి పోతూ ఉండటం సర్వసాధారణంగా జరుగుతూ ఉంటుంది.

అంతేకాదు... ఒత్తై జుట్టు కాస్తా క్రమంగా పలుచబారుతూ వస్తుంటుంది. ఇది కాలక్రమంలో బట్టతలకు దారితీస్తుంది. కానీ మెడ వెనుక భాగంలో (నేప్ ఆఫ్ ది నెక్), తల వెనక, కణతల దగ్గర ఎప్పుడూ వెంట్రుకలు రాలవు. దీనికి కారణం ఆ ప్రాంతాల్లోని వెంట్రుకల మూలాలు డైహైడ్రోటెస్టోస్టెరాన్‌ కు సెన్సిటివ్‌ గా ఉండవు. అయితే ఇలా జుట్టు రాలిపోయే జన్యువులు ఉన్నవారిలో డైహైడ్రోటెస్టోస్టెరాన్ పాళ్లు నార్మల్‌ గా ఉన్నా కూడా ఆ పాళ్ల వల్ల కూడా జుట్టు రాలిపోయి బట్టతలకు దారితీస్తూ ఉంటుంది. దీన్నే బట్టతల (పాటర్న్‌డ్ హెయిర్ లాస్) అని పేర్కొంటారు.

మరి నివారణోపాయాలు ఏంటో తెలుసుకుందామా:
1. క్రమం తప్పకుండా తలస్నానం చేయడం, మైల్డ్ షాంపూలు వాడటం, జుట్టును లాగకుండా ఉండటం, తలపై రసాయనాలు ఎక్కువగా వాడకుండా చూసుకోవడం, క్రీమ్స్, జెల్స్, స్ప్రేస్ వంటి వాటి వల్ల జుట్టు చిక్కుబడకుండా చూసుకోవడం వంటి చిన్న చిన్న జాగ్రత్తలతో జుట్టు రాలిపోవడాన్ని నివారించవచ్చు.
2. ఏవైనా ఆరోగ్య సమస్యలకు చికిత్స తీసుకోవడం, కొన్ని రకాల మందులతో జుట్టు రాలిపోతూ ఉంటే మందులు మార్పించుకోవడం వంటి జాగ్రత్తలతోనూ జట్టు రాలిపోవడాన్ని అరికట్టవచ్చు.
3. దీనికి తోడు కొన్ని మందులద్వారా కూడా జుట్టు రాలడాన్ని నివారించవచ్చు. అయితే వాటివల్ల వచ్చే దుష్ఫలితాలను దృష్టిలోపెట్టుకుని వీటిని చాలా జాగ్రత్తగా కేవలం వైద్యనిపుణుల సలహాల మేరకు మాత్రమే వాడాల్సి ఉంటుంది. ఆ మోతాదును సైతం వైద్యనిపుణులు జాగ్రత్తగా నిర్ణయిస్తారు.