ముడతలు..జిడ్డు సమస్య కి మట్టితో నివారణ...

Skin Care

oi-Saraswathi

By Sindhu

Published: Tuesday, March 20, 2012, 9:00 [IST]

సాధారణంగా మట్టిని రకరకాల సౌందర్య సాధనాలల్లో వాడటం కొందరికి మాత్రమే తెలుసు. దీనివల్ల చర్మం నునుపు తేలి, మృదువుగా మారుతుంది. చర్మంపై మచ్చల్లాంటివి తగ్గి.. మంచి రంగు రావాలంటే.. ఈ క్లే(మట్టి)లకు అదనంగా మరికొన్ని పదార్థాలు కలిపి సౌందర్య సాధనాల్లో ఉపయోగించాలి. దీనివల్ల జిడ్డు సమస్య అదుపులో ఉండటమే కాకుండా. ముడతలు మాయమవుతాయి. చర్మం బిగుతుగా మారుతుంది. మట్టితో ప్యాక్‌లు వేసుకున్న తరవాత పదిహేను నిమిషాలకు కచ్చితంగా తొలగించాలి. మొటిమలు ఉన్నచోట ఈ ప్యాక్‌ వేయకూడదు. కళ్ల అడుగున, కనురెప్పల పైన కూడా రాయకూడదు. పూతకోసం వాడే మట్టి ముల్తానీ, చైనా క్లే, వండర్‌ మట్టి, గ్రీన్‌ క్లే, బ్లాక్‌ క్లే.. వంటి రకాల్లో దొరుకుతుంది. చర్మతత్వాన్ని బట్టి వేసుకోవాల్సి ఉంటుంది.

1. జిడ్డు చర్మం కలవారు: టీ స్పూన్ ముల్తానీమట్టి, నిమ్మరసం, తేనె, పుదీనా పొడి సమపాళ్ళలో తీసుకుని అన్నింటినీ బాగా కలిపి ముఖానికి రాసుకుంటే చర్మంలో ఎంతో మార్పు ఉంటుంది.
2. చైనా క్లే ఒకటిన్నర చెంచా, గ్రీన్‌ టీ డికాక్షన్‌ టీస్పూన్, కమలాఫలం తొక్కల పొడి, తేనె సమంగా తీసుకుని వీటన్నింటినీ రోజ్‌వాటర్‌ తో మిశ్రమంలా చేసుకుని ముఖానికి పట్టించాలి. అరగంటతర్వాత కడిగేయాలి. చర్మం మరీ జిడ్డుగా ఉంటే.. ఐదు రోజులకోసారి వేసుకోవచ్చు. జిడ్డు తక్కువగా ఉంటే.. నెలకు మూడుసార్లు రాసుకోవచ్చు. చర్మంలో మొటిమలు, జిడ్డు తగ్గడమే కాదు.. అందంగానూ మారుతుంది.
3. సహజ చర్మం కలవారు: ముల్తానీమట్టి టీస్పూన్ లో, పాలమీగడ లేదా పాలు టీస్పూన్, గులాబీ రేకలపొడి టీస్పూన్, తేనె టీస్పూన్తీసుకుని పాలు లేదా సోయా పాలతో కలిపి ముఖానికి పూతలా వేసుకోవాలి. అరగంట తర్వాత చల్లటి నీటితో శుభ్రం చేసుకోవాలి.
4. వండర్‌ క్లే బాదం పొడి టీస్పూన్, పాలు రెండు టీస్పూన్ , మామిడిగుజ్జుటీస్పూన్ తీసుకుని వీటన్నింటినీ కలిపి చర్మానికి పూతలా రాయాలి. ఆరాక చల్లటి నీటితో కడిగేయాలి.
5. ముల్తానీమట్టి, టమాటాగుజ్జు, కీరదోస రసం చెంచా చొప్పున తీసుకుని అరచెంచా తేనె కలిపి రాసుకోవాలి. పదినిమిషాల తరవాత కడిగేస్తే చాలు.
6. పొడిబారిన చర్మానికి: ఈ తరహా చర్మ తత్వం ఉన్నవాళ్లు ఎనిమిది నిమిషాల కంటే ఎక్కువ సేపు ఉంచుకోకూడదు. వండర్‌ క్లే, కలబంద గుజ్జు చెంచా చొప్పున, విటమిన్‌ ఇ మాత్ర ఒకటి తీసుకుని చిక్కని పాలతో కలిపి ముఖానికి రాసుకోవాలి. ఆరాక కడిగేస్తే మోము మృదుత్వాన్ని సంతరించుకుంటుంది.