మ‌గ‌వారి ముఖ సౌంద‌ర్యానికి 5 సులువైన‌ చిట్కాలు

1. స‌రైన ముఖ సంర‌క్ష‌ణ ఉత్ప‌త్తుల ఎంపిక‌

మ‌గ‌వాళ్లు మొహానికి సంబంధించి క్లెన్స‌ర్‌, స్క్ర‌బ్బ‌ర్‌, మాయిశ్చ‌రైజ‌ర్ లాంటివెన్నో వాడ‌వ‌చ్చు. అయితే వీటిల్లో ఆల్క‌హాల్‌, డై, హానిక‌ర ప‌రిమ‌ళాలు లాంటివెన్నో ఉండ‌వ‌చ్చు. ఇలాంటివి లేని ఉత్ప‌త్తుల‌ను ఎంచుకోవ‌డం మంచిది. రెండు ఉత్ప‌త్తుల‌ను మాత్రం ఎట్టి ప‌రిస్థితుల్లోనూ వాడ‌కూడ‌దు. అవి ఆఫ్ట‌ర్ షేవ్ మ‌రొక‌టి ఫోమ్ ఉన్న షేవింగ్ క్రీమ్‌. ఆఫ్ట‌ర్ షేవ్ లోష‌న్‌లో గాఢ‌మైన ప‌రిమ‌ళాలుంటాయి. అవి చ‌ర్మానికి హాని చేస్తాయి. ఇక ఫోమ్ ఉన్న షేవింగ్ క్రీమ్ బాహ్యా చ‌ర్మాన్ని పొడిబారేలా చేస్తుంది. క్లుప్తంగా చెప్పాలంటే హానికార‌క కెమికల్స్ ఉన్న‌వాటికి దూరంగా ఉండాలి.

2. మ‌గవారికి ప్ర‌త్యేక‌మైన‌వే...

చాలా మంది మ‌గ‌వాళ్ల‌కి చర్మ సంర‌క్ష‌ణ అన‌గానే అమ్మాయిలు వాడే ర‌క‌ర‌కాల క్రీములు, టోన‌ర్లు, మాయిశ్చ‌రైజ‌ర్లు వాడాల‌ని చూస్తుంటారు. ఇది చ‌ర్మంపై ప్ర‌భావం చూపించ‌గ‌ల‌దు. అమ్మాయిల కోసం రూపొందించిన కాస్మొటిక్స్ వాళ్ల కోస‌మే ఉద్దేశించిందై ఉంటుంది. అది మీ చ‌ర్మానికి స‌రిపడ‌క‌పోవ‌చ్చు. స్కిన్ అల‌ర్జీలు వ‌చ్చినా రావ‌చ్చు. కాబ‌ట్టి మ‌గ‌వారికోస‌మే ప్ర‌త్యేక‌మైన చ‌ర్మ సౌంద‌ర్య ఉత్ప‌త్తులను వాడ‌డం మంచిది.

3. గ్లైకోలిక్ యాసిడ్‌

మంచి సంర‌క్ష‌ణ పాటించే మ‌గ‌వాళ్లు త‌మ మొహాన్ని ఉద‌యం లేవ‌గానే రాత్రి ప‌డుకోబోయే ముందు క‌డుక్కుంటారు. ఇది చాలా మంచి అల‌వాటు కూడా. కేవ‌లం నీళ్ల‌తో మొహాన్ని క‌డ‌గ‌కుండా కాస్త గ్లైకోలిక్ యాసిడ్ వాడి చూస్తే ఆరోగ్య‌క‌ర చ‌ర్మం సొంత‌మ‌వుతుంది. నేరుగా చ‌ర్మంపై గ్లైకోలిక్ యాసిడ్ వాడ‌టం ఇష్టంలేనివారు గ్లైకోలిక్ యాసిడ్ క‌ల‌గ‌లిసిన క్లెన్స‌ర్ ను వాడ‌వ‌చ్చు.

4. మొహానికి, శ‌రీరానికి ఒక‌టేనా...

మొహానికి శ‌రీరంలోని మిగ‌తా భాగాల అవ‌స‌రాలు వేరువేరుగా ఉంటాయి. బాడీ లోష‌న్‌ను మొహానికి రాస్తే సూక్ష్మ రంధ్రాలు మూసుకుపోయే ప్ర‌మాద‌ముంది. కాబ‌ట్టి మొహానికి ఫేస్ క్రీమ్ లేదా మాయిశ్చ‌రైజ‌ర్‌ను మెడ దాకా రాసుకోవాలి. ఇక మిగ‌తా భాగాల‌కు బాడీ లోష‌న్ పూసుకోవాలి. అన్నింటికి ఒకే క్రీమ్ వాడ‌తామంటే త‌ప్పుడు ట్రాక్‌లో ప‌డుతున్న‌ట్టే లెక్క‌.

5. పొడిబార‌కుండా చూసుకోవాలి...

మొహాన్ని ఎంత బాగా క‌డిగినా, మంచి ఫేస్ క్రీమ్ వాడినా స‌రే ముఖం పొడిబారిన‌ట్టు ర‌ఫ్ గా క‌నిపిస్తుంటుంది. మొహానికి అందాల్సిన తేమ శాతం అంద‌క‌పోవ‌డ‌మే దీనికి కార‌ణం. మీరు మాయిశ్చ‌రైజ‌ర్ వాడే విధానం త‌ప్పు కావొచ్చు. ముఖం కాస్త త‌డిగా ఉన్న‌ప్పుడే మాయిశ్చ‌రైజ‌ర్‌ను పూసుకోవాలి. అప్పుడే అది కాస్త ఎక్కువ సేపు ఉండిపోతుంది. పొడి మొహంపైన అది పూసుకుంటే ఫ‌లితం ఎక్కువ సేపు ఉండ‌దు.