మీ లివర్ ఆరోగ్యంగా ఉందా లేదా అనేది ఈజీగా తెలుసుకోండిలా!

మన శరీరంలో అత్యంత కీలకమైన, విశ్రాంతి లేకుండా పనిచేసే అవయవం కాలేయం(లివర్). ఇది మన శరీరానికి ఒక పవర్‌హౌస్ లాంటిది. మనం తీసుకునే ఆహారాన్ని జీర్ణం చేయడం, పోషకాలను గ్రహించడం నుంచి.. రక్తంలోని విషపదార్థాలను బయటకు పంపే వరకు ఇది దాదాపు 500 రకాల పనులను ఒంటరిగా చేస్తుందట.

సైలెంట్ కిల్లర్.. ఫ్యాటీ లివర్

ప్రపంచవ్యాప్తంగా దాదాపు 40 శాతం మంది ఫ్యాటీ లివర్‌ తో బాధపడుతున్నారు. ఇందులో అత్యంత ఆశ్చర్యకరమైన విషయం ఏమిటంటే.. వీరిలో సగానికి పైగా మంది అసలు మద్యం ముట్టని వారే, దీనికి ప్రధాన కారణం..మనం రోజూ తీసుకునే అదనపు చక్కెర, చెడు జీవనశైలి. కాలేయానికి కొవ్వు అతిపెద్ద శత్రువు. ఇది పెరిగితే లివర్ పనితీరు మందగించి, క్రమంగా దెబ్బతింటుంది. ఫ్యాటీ లివర్ ప్రారంభంలో ఎలాంటి లక్షణాలు చూపించదు. కానీ కళ్లు, చర్మం పసుపు రంగులోకి మారడం, ముదురు రంగు మూత్రం, కడుపు లేదా కాళ్లలో వాపు, చర్మంపై దురద, నల్లటి మలం, విపరీతమైన అలసట వంటివి కనిపిస్తే ఏమాత్రం నిర్లక్ష్యం చేయకండి.

ఏటా చేయించుకోవాల్సిన 5 ముఖ్యమైన పరీక్షలు

లివర్ ఆరోగ్యాన్ని ముందే పసిగట్టేందుకు తక్కువ ఖర్చుతో పూర్తయ్యే 5 టెస్టులను వైద్య నిపుణులు సూచిస్తున్నారు.

లివర్ ఫంక్షన్ టెస్ట్ (LFT): ఇది కాలేయ పనితీరును అంచనా వేస్తుంది.

కంప్లీట్ బ్లడ్ కౌంట్ (CBC): శరీరంలోని ప్లేట్‌లెట్స్, మొత్తం ఆరోగ్యాన్ని చెబుతుంది.

హెపటైటిస్ బి, సి: నీరసం, ఆకలి లేమి ఉంటే ఈ ఇన్ఫెక్షన్ పరీక్ష తప్పనిసరి.

అబ్డామినల్ అల్ట్రాసౌండ్: కడుపు నొప్పి ఉన్నప్పుడు లివర్ నిర్మాణాన్ని స్పష్టంగా చూడటానికి ఉపయోగపడుతుంది.

బయోకెమికల్ ప్యానెల్: లివర్ సంబంధిత లక్షణాలు తీవ్రంగా ఉన్నప్పుడు ఈ టెస్ట్ చేస్తారు.

ఈ అలవాట్లు మానుకోండి.. ఆరోగ్యాన్ని పెంచుకోండి

నీళ్లు తక్కువగా తాగడం, కూర్చునే పనిచేయడం, జంక్ ఫుడ్స్ తినడం, నిద్రలేమి, పొగతాగడం, మద్యపానం, అలాగే డాక్టర్ సలహా లేకుండా ఇష్టానుసారం పెయిన్ కిల్లర్స్ వాడటం వల్ల కాలేయం తీవ్రంగా దెబ్బతింటుంది.

వీటికి బదులుగా.. రోజూ ఉదయాన్నే నిమ్మరసం తాగడం అలవాటు చేసుకోండి. ఇది కాలేయాన్ని సహజంగా శుద్ధి చేస్తుంది. రోజుకు 8-10 గ్లాసుల నీరు తాగాలి. నారింజ, క్యారెట్, పాలకూర లాంటి ఫైబర్ ఉన్న ఆహారంతో పాటు ఒమేగా-3 ఫ్యాటీ యాసిడ్స్ ఉండే చేపలు, వాల్ నట్స్ తీసుకోవాలి. వీటికి వ్యాయామం తోడైతే మీ లివర్‌ కు తిరుగుండదు.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.