ఇన్సులిన్ చేసుకోవటం ఒక్కసారి ప్రారంభిస్తే?

Diabetes

oi-Nageswara

By B N Sharma

Published: Saturday, June 9, 2012, 10:31 [IST]

షుగర్ వ్యాధి పెద్ద వయసు వారిలోనే వస్తుంది అన్నది చాలామందిలో ఉండే అపోహ, నిజానికి షుగర్ వ్యాధి ఏ వయసు వారికయినా రావచ్చు. ఆరు నెలల పసిబిడ్డకు కూడా షుగర్ వ్యాధి రావచ్చు. ప్రెగ్నెన్సీ సమయంలో జెస్టేషనల్ డయాబిటీస్ తో బాధ పడిన వారు, మా పిల్లలకు కూడా షుగర్ వ్యాధి వస్తుందా అని భయపడుతూంటారు. వీరి భయంలో యదార్ధం లేకపోలేదు. 25 సంవత్సరములు దాటిన తర్వాత వీరి సంతానానికి షుగర్ వ్యాధి వచ్చే అవకాశాలు ఉన్నాయి. చాలామంది షుగర్ వ్యాధిని వెల్లడించే లక్షణాలు మాకేమీ లేవు. కాబట్టి మాకు షుగర్ వ్యాధి ఉండి ఉండదు అని కూడా అపోహ పడుతూంటారు.

షుగర్ కు సంబంధించిన అధిక ఆకలి, అధిక దప్పిక, ఎక్కువసార్లు మూత్రానికి వెళ్ళవలసి రావటం, తదితర లక్షణాలు ఏ మాత్రం లేకుండా కూడా షుగర్ వ్యాధితో బాధ పడేవారున్నారు. ఆ లక్షణాలు లేనంత మాత్రాన నాకు షుగర్ లేదు అనుకోవటం తప్పు. నాకు దెబ్బతగిలినా, పుండు పడినా, గాయం త్వరగానే మానుతుంది. నాకు షుగర్ లేదేమో అన్న అనుమానాన్ని కొందరు వ్యక్తం చేస్తుంటారు. దీర్ఘకాలంగా షుగర్ వ్యాధితో బాధపడుతూ దాన్ని నియంత్రణలో ఏ మాత్రం ఉంచుకోని వారిలో పుండు మానకపోవటం వంటి బాధలు ఉంటాయి. కనుక పుండ్లు సంతోషంగా మానుతున్నాయి కదా అని షుగర్ లేదేమో అనుకోవటం తప్పు.

షుగర్ వున్న వారు గోధుమతో చేసిన ఆహారాలే తినాలని వరి తినకూడదని చాలామంది అనుకుంటారు. అది కేవలం అపోహ మాత్రమే. వరి, గోధుమ, జొన్న, సజ్జ, రాగి వీటన్నింటిలో 70 శాతం పిండి పదార్ధాలే ఉంటాయి కనుక వరి మానేసి గోధుమ, జొన్న తినటం ఏ మాత్రం సమంజసం కాదు. షుగర్ పేషెంట్స్ చాలామంది ఉదయం టిఫిన్ చేసినప్పటికన్నా మధ్యాహ్నం భోజనం తర్వాత షుగర్ ఎక్కువగా ఉంటుందనుకుని ఉదయం మాత్ర వేసుకోకుండా మధ్యాహ్నం భోజనం తర్వాత షుగర్ మాత్రలు వేసుకుంటారు. ఇది పొరపాటు. షుగర్ ఉదయం టిఫిన్ చేశాకనే అధికంగా ఉంటుంది. కనుక ఉదయం టిఫిన్ తో విధిగా మాత్రలు వేసుకోవాలి.

ఇన్సులిన్ చేసుకోవటం ఒక్కసారి ప్రారంభిస్తే, జీవితాంతం ఇన్సులిన్ చేసుకోవలసి వస్తుందని చాలా మంది షుగర్ రోగులు అపోహ పడతారు. ఇది అపోహ మాత్రమే. అత్యవసర పరిస్ధితుల్లో ఇన్సులిన్ ఉపయోగించినా ఆ తర్వాత, పరిస్ధితి చక్కబడ్డాక మరల ఓరల్ మెడిసిన్స్ తో షుగర్ ను కంట్రోల్ చేసుకోవచ్చనేది ఒక వాస్తవం. మాత్రలు, మందులు వేసుకోగానే బ్లడ్ షుగర్ బాగా తగ్గిపోయిందని, ఇక తాము షుగర్ కు మందులు వాడవలసిన అవసరం లేదని చాలామంది అనుకుంటారు. ఇది ఏ మాత్రం నిజం కాదు. షుగర్ ను అదుపులో ఉంచగలమే తప్ప, షుగర్ వ్యాధిని పూర్తిగా నిర్మూలించే మందులు, వైద్యాలు లేవని గుర్తించాలి.

షుగర్ వ్యాధి నియంత్రించుకోటానికి మార్గం ఆరోగ్యకరమైన జీవన విధానాలు పాటించడం. తినే ఆహారం పట్ల శ్రధ్ధ వహించాలి. ఎప్పటికపుడు శరీర పరిస్ధితిని బట్టి షుగర్ వ్యాధి గ్రస్తులు తీసుకోవలసిన ఆహారం మాత్రమే తీసుకోవాలి. అతిగా భుజించరాదు. ప్రతిరోజూ శరీరానికి తగినంత శ్రమ కల్పించే వ్యాయామాలు చేయాలి. అపుడే షుగర్ వ్యాధి నియంత్రణలో వుంటుంది.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.